10.06.2017

ОМОНАТЧИЛАРГА ҚУЛАЙ ИМКОНИЯТЛАР ЯРАТИЛМОҚДА

Яқинда «Асака» акциядорлик тижорат банки томонидан матбуот анжумани ўтказилди.

Тадбирда банк томонидан нақд пул маблағларининг банк­дан ташқари айланмасини кескин қисқартириш ва аҳолининг бўш пул маблағларини омонатларга жалб қилиш бўйича олиб борилаётган ишлар тўғрисида маълумот берилди.

— Фуқароларнинг банклардаги омонатларини кафолатлаш жамғармасига ўтказилган маблағлар миқдори жорий йилнинг 1 июнь ҳолатига 3 миллиард сўмни ташкил этди, — дейди «Асака» акциядорлик тижорат банкининг пул муомаласи ва чакана банк хизматлари департаменти мудири Баҳодир Мирбобоев. — Аҳоли омонатларининг асосини ташкил қилувчи муддатли омонатлар қолдиғи 2017 йил 1 июнь ҳолатига 699 миллиард сўмни ташкил этиб, жорий йил бошига нисбатан 133 миллиард сўмга ёки 123 фоизга ўсиши таъминланди. Ҳозирда омонатчилар сони 1,9 миллион нафардан зиёдни ташкил этмоқда. Бу ўтган йилнинг шу даврига нисбатан 194 минг нафарга кўпайганидан далолатдир. Бугунги кунда аҳоли учун қулай шартлардаги 39 омонат тури жорий этилган бўлиб, 26 таси миллий валютада ва 13 таси хорижий валютадаги омонатлар ҳисобланади. Шундан миллий валютадаги 3 та янги омонат тури жорий қилинди.

Банкда кўрсатилаётган хизматлар кўламини кенгайтириш борасида ҳам бир қатор ишлар амалга оширилмоқда. Хусусан, СМС-хабарнома хизмати жорий қилинган бўлиб, ушбу хизмат тури омонатчиларга ихтиёрий равишда ўрнатилади. Унинг қулайлиги — омонатчи депозит ҳисоб-варағидаги барча ўзгаришлардан мобиль телефони орқали доимий равишда хабардор бўлиб туради.

Шунингдек, тадбирда мижозларга ўз омонатларига ҳисобланган фоизларни банкнинг интернет сайти орқали билиш имкониятини яратиш бўйича дастур ишлаб чиқилаётгани тўғрисида маълумот берилди.

Анжуман сўнгида журналистларни қизиқтирган саволларга жавоблар қайтарилди.

 

Ўз мухбиримиз.



DB query error.
Please try later.