08.06.2017

ҲАЁТИЙ ВАЗИФАЛАР БЕЛГИЛАБ БЕРИЛДИ

Президентимизнинг ҳудудларга амалга ошираётган амалий ташрифи жойларда ижтимоий-иқтисодий ислоҳотларни ривожлантириш, аҳоли турмуш даражасини юксалтиришда муҳим аҳамият касб этмоқда. Буни Андижон вилоятида ўтказилган учрашувлар, ҳаётга татбиқ этилиши режалаштирилган лойиҳалар мисолида ҳам кўриш мумкин.

Давлатимиз раҳбарининг андижонликлар билан учрашувлари самимий мулоқотларга айланиб кетди.

 

Абдулҳамид НУРМАТОВ, ЎзХДП Андижон вилоят кенгаши раиси, халқ депутатлари вилоят Кенгашидаги партия гуруҳи раҳбари:

— Президентимиз вилоятимизга ташрифи давомида жуда муҳим ижтимоий-иқтисодий масалаларга эътибор қаратди. Кўплаб дастурларни ҳаётга татбиқ этиш бўйича зарур кўрсатмалар берди. Вилоят фаоллари билан бўлган йиғилишда учта энг муҳим масала юзасидан фикр билдирди.

Давлатимиз раҳбари, биринчи навбатда, вилоятда жиноятчиликнинг олдини олиш, ҳуқуқбузарликлар профилактикасига жиддий эътибор қаратиш, бу борада ички ишлар органлари ходимларининг масъулиятини кескин ошириш муҳим эканини таъкидлаб, ҳозир бу йўналишда амалга оширилаётган ишлар талабга жавоб бермаслигини қайд этди.

Сиёсий партия вакили, депутат сифатида жойларда бўлиб, сайловчилар билан учрашганимизда, ҳақиқатан ҳам, мазкур масалада камчиликлар оз эмаслигининг гувоҳи бўляпмиз. Бугун ҳаёт шуни кўрсатмоқдаки, жиноятнинг оқибатлари билан курашиш эмас, балки унинг олдини олиш чораларини кўриш муҳим ва самаралироқдир.

Шунинг учун партиямиз ташаббуси билан ўтказилаётган тарғибот тадбирларига ички ишлар органлари ходимларини таклиф қилиш, бу ишларда улар билан биргаликда фаол қатнашишни режалаштирдик. Ўйлайманки, бу саъй-ҳаракатлар ўз самарасини бермасдан қолмайди.

Президентимиз томонидан ўртага ташланган муҳим масалалардан яна бири вилоятда тиббиёт тизимини тубдан такомиллаштиришдир. Дарҳақиқат, бугунги кунда, айниқса, Андижон вилоятида соғлиқни сақлаш тизими талаб даражасида эмас. Бу эса ўз навбатида, аҳолининг ҳақли норозилигига сабаб бўлмоқда. Йиғилишда камчиликларни бартараф этиш, вилоятимизда ихтисослаштирилган тиббиёт марказларининг филиалларини ташкил этиш, умуман, тиббий хизмат кўрсатиш тизимини замон талаблари даражасига чиқариш юзасидан аниқ топшириқлар берилди. Бу, албатта, андижонликлар кўнглини кўтарди, эртанги кунга бўлган ишончини мустаҳкамлади.

Ўзбекистон ХДП Сайловолди дастурида тиббиёт тизимини ислоҳ қилиш билан боғлиқ муҳим масалалар белгиланган. Ҳозирги кунда уларни рўёбга чиқариш бўйича зарур ишлар амалга оширилмоқда. Хусусан, халқ депутатлари вилоят, туман ва шаҳар Кенгашларидаги депутатлик бирлашмалари орқали соғ­лиқни сақлаш соҳасига тегишли бўлган муаммоларни чуқур ўрганиб, уларни туман, вилоят, республика даражасига олиб чиқиш ва ҳал этиш вазифаси қўйилган.

Шунингдек, партия гуруҳларимиз ташаббуси билан маҳаллий Кенгашлар сессияларида тиббиёт бирлашмалари раҳбарларининг ҳисоботларини эшитиш амалиётини кучайтириш ҳам кўзда тутилган.

Фуқаролар, айниқса, ёшларни турли диний оқимлар таъсиридан асраш, бунинг учун зарур чоралар кўриш мамлакатимиз раҳбари томонидан кўтарилган яна бир муҳим масала бўлди. Бугун диний экстремизм ва терроризм дунё тинчлигига таҳдид солаётган энг катта хавф ҳисобланади. Бундан дунёдаги ҳеч бир давлат четда эмас. Одамлар, айниқса, ёшларни ёвуз иллатлар ва турли оқимлардан асраш, бу борадаги тарғибот ишларини кучайтиришда давлат идоралари билан бирга, жамоат ташкилотлари, сиё­сий партиялар ва депутатлар ҳам фаол иштирок этиши талаб этилади.

Президентимизнинг вилоятимизга ташрифи тарихий ўзгариш ва янгиланишларга асос бўлади. Биз, партия фаоллари ва депутатлар белгиланган вазифаларни амалга оширишда томошабин бўлмасдан, бу жараёнларда фаол иштирок этишимиз лозим.

 

«Ўзбекистон овози» мухбири

Нурали ОРИПОВ

ёзиб олди.



DB query error.
Please try later.