08.06.2017

ҚОРАҚАЛПОҒИСТОНЛИК ЁШ СИЁСАТЧИЛАР

ЎзХДПнинг «Ёш сиёсатчи» кўрик-танловида кўплаб фаол истеъдодли ёшлар кашф этилмоқда. Масална, Қорақалпоғистонда ўтган танловларда иштирок этган Гулжаҳон Сейтназарова бугун Ўзбекистон Республикаси Президенти стипендианти, Ҳурлиман Нуржанова «Ўзбекистон белгиси» кўкрак нишони соҳиби. Перизат Уразалиева эса «Ёш сиёсатчи — 2016» Қорақалпоғистон Республика босқичи ғолиби бўлган.

Бугунги кунда партия ёшлар қаноти бирлаштирган йигит-қизлар мамлакатда амалга оширилаётган ислоҳотларнинг фаол иштирокчиларига айланмоқда. Улар жаҳонда юз бераётган сиёсий жараёнларга, воқеаларга соғлом муносабатини билдиришга қодир, билимга, дунёқарашга эга. Бунга «Ёш сиё­сатчи — 2017» кўрик-танловининг Қорақалпоғистон Республикаси босқичида ҳам яққол амин бўлдик.

Кегейли туманидан Наврўз ­Нуримбетов Қорақалпоғистон шароитида қандли диабет касаллигининг олдини олиш бўйича ўз лойи­ҳасини тақдим этди. Мўйноқ туманидан Феруза Нурлибаеванинг «Биз бир оиламиз» лойиҳаси доирасида имконияти чекланган инсонларни иш билан банд бўлишига шароит яратиш борасидаги таклиф илгари сурилди.

Танловнинг иккинчи — савол-жавоблар қисмида иштирокчилар билим ва зукколигини намоён қилишди.

— Савол-жавоб шартидаги саволлар қизиқарли бўлиши керак, — дейди Нукус шаҳар Кенгашидаги Ўзбекистон ХДП гуруҳи аъзоси, ҳайъат аъзоси Алишер Реймов. — Ёшларимиз қонун ва кодекслар, партиямиз дастури, «Истиқбол» ёшлар қаноти фаолияти тўғрисида яхши маълумотга эга эканлигини кўрсата олди.

Иштирокчилар сўнгги шартда нотиқлик санъатини намойиш этишди.

Якуний натижаларга кўра, учинчи ўрин Мўйноқ тумани вакили Феруза Нурлибаевага, иккинчи ўрин Қонликўл туманидан Тимур Муратбаев ва Элликқалъа туманидан Озода Рўзимовага насиб қилди. Барча босқичларда юқори балл тўплаган Кегейли туманидан Наврўз Нуримбетов биринчи ўринни қўлга киритди ва танловнинг мамлакат босқичига йўлланма олди.

— Менга билдирилган ишончни оқлашга ва юқори ўринни эгаллашга ҳаракат қиламан, — дейди Наврўз Нуримбетов. — Бундай танловлар биз, ёшларнинг ижтимоий-сиёсий фаоллигини оширишга ва истеъдодини юзага чиқаришга ёрдам беради, деб ўйлайман.

Ғолиблар ташкилотчилар томонидан эсдалик совғалари ва махсус дипломлар билан тақдирланди. Танлов Нукус шаҳар маданият бўлими ходимлари иштирокидаги концерт дастури билан якунланди.

 

Минажатдин ҚУТЛИМУРАТОВ,

«Ўзбекистон овози» мухбири.



DB query error.
Please try later.