06.06.2017

БИТИРУВЧИЛАР БАНДЛИГИНИ ТАЪМИНЛАШ

доимий эътиборда

Марғилон шаҳрида Ўзбекистон Халқ демократик партияси Марказий Кенгаши ташаббуси билан «Партиянинг Сайловолди дастури ижроси: амалий ишлар ва мавжуд муаммолар» мавзусида тадбир ташкил этилди. Унда партия ташкилотлари ходимлари, Марказий банк Фар­ғона вилоят бошқармаси мутахассислари, партия электорати ҳамда оммавий ахборот воситалари вакиллари иштирок этди.

Халқ билан мулоқот ва инсон манфаатлари йилида партия томонидан кўплаб долзарб вазифаларга эътибор қаратилмоқда. Хусусан, аҳолининг ижтимоий ҳимоясини таъминлаш, янги иш ўринлари яратиш ва кам таъминланган аҳолининг реал даромадлари миқдорини ошириш масалалари кун тартибидан ўрин олган. Мазкур тадбир ҳам депутатлар томонидан маҳаллий давлат органлари ва ташкилотлари билан ҳамкорликда ечимини кутаётган муаммоларни аниқлаш ва уларни бартараф этишга кўмаклашиш мақсадида ташкил этилди.

Марғилон шаҳридаги енгил саноат ва туризм касб-ҳунар коллежида шаҳардаги барча касб-ҳунар коллежи битирувчилари, ишсиз ёшлар иштирокида меҳнат ярмаркаси ўт­казилди. 40 га яқин ташкилот- муассасалар 400 дан ортиқ иш ўрни билан қатнашди. Шунингдек, депутатлар, пар­тия ходимлари, шаҳардаги тижорат банкларининг вакиллари кредитлар ёрдамида ўзининг кичик бизнесини йўлга қўйган хонадонларга бориб, уларнинг иш фаолияти билан танишишди.

— Марғилон енгил саноат ва туризм касб-ҳунар коллежи ­битирувчисиман, — дейди ­Моҳларой Солиева. — Бугунги меҳнат ярмаркасида менга Марказий банк вилоят бош­қармаси томонидан имтиёзли кредит олиш учун сертификат берилди. Бу орзуларимни рўёбга чиқариш учун қўйилган илк қадам бўлди десам, янглишмайман. Коллежни битиргач, болалар учун трикотаж маҳсулотлари ишлаб ­чиқарадиган оилавий корхона очмоқчиман. Бундан ташқари, миллий либосларни тикишга мўлжалланган тикувчилик цехи ташкил этиб, тенгдошларимни иш билан таъминлаш ниятим ҳам бор. Бунинг учун менда барча имкониятлар етарли.

— Аҳолининг ижтимоий фаоллигини ошириш мақсадида турли тадбирларни ўтказяпмиз, — дейдиЎзбекистон ХДП Марказий Кенгаши ­мутахассиси  Дурбек Худойқулов. — Электоратимиз вакилларига қишлоқ хўжалиги маҳсулотларини етиштириш, чорвачиликни йўлга қўйиш, шунингдек, боғдорчиликни ривожлантириш учун микрокредитлар ажратилишига кўмаклашиляпти. Бу электорат вакилларининг жамиятнинг фаол аъзосига айланишига замин яратмоқда.

Тадбир давомида ҳамкор ташкилотлар вакиллари билан лойиҳалар йўналишида келишувлар амалга оширилди ва ўз бизнесини бошламоқчи бўлган партия электорати вакилларига тижорат банклари томонидан кредит олиш учун сертификатлар топширилди. Шунингдек, халқ депутатлари Мар­ғилон шаҳар Кенгашидаги партия гуруҳи олдида турган вазифалар бўйича аниқ йўналишлар белгилаб олинди.

Семинар якунида кўчма Жамоатчилик қабулхонаси ташкил этилди. Электорат вакиллари турли масалаларда депутатларга мурожаат қилишди.

 

Муҳаммаджон ОБИДОВ,

«Ўзбекистон овози» мухбири.



DB query error.
Please try later.