06.06.2017

ГУЛЛАРГА БУРКАНГАН ОРАСТА ШАҲАР

Наманганда 57-анъанавий «Гул байрами» ўтказилди

Байрамга тайёргарлик жараёнида Наманган кўчалари, хиёбонлари, майдонлари турфа гуллар, гулсавату гулчироқлар билан пардозланди. Байрам тадбирлари доирасида турли кўрик-танловлар ўтказилди.

Вилоят бош майдонидаги «Тинчлик стелласи» атрофидаги хиёбонда, Заҳириддин Муҳаммад Бобур номидаги маданият ва истироҳат боғи йўлак ва майдонларида тажрибали боғбон ҳамда ҳаваскор гулчилар ўзлари парваришлаётган гуллар кўргазмасини намойиш қилдилар.

Боғнинг турли бурчакларида дизайнерлар композициялари, адабий тадбирлар ташкил этилди.

— Бу галги байрамда гулчиларимиз томонидан яратилган янги гул нави «Хонзодабегим» деб аталади, — дейди «Гул ишқибозлари» клуби раҳбари Дилбар
Содиқова.
— Гул шайдоси бўлган халқимизнинг меҳнати ва маҳорати гулхоналар қиёфасини, хиёбонларнинг гулафшонлик сиёқини батамом ўзгартирди. Наманган кўчаларидан ўтган одамнинг барқ уриб, турфа рангда жилоланаётган гулу райҳонлардан баҳру дили очилади.

Шаҳардаги Мўминовлар оиласини водийлик гул ишқибозлари яхши танишади. Биргина кактус гулининг мингдан зиёд навини парваришлаб, оммалаштираётган бу оилада 4 киши доимий меҳнат билан банд. Абдуҳалим Юнусов, Носиржон Ҳакимжонов сингари гулчилар анъанавий байрам ярмаркасида деярли ҳар йили иштирок этадилар ва совринли ўринларни эгаллайдилар.

Маҳаммаджон Иброҳимов раҳбарлик қилаётган «Деҳқон-М» фермер хўжалигининг 2 гектарлик иссиқхонасида фақат ноёб гуллар етиштирилади. Фермер хўжалигида мавсумга қараб 40-50 нафаргача ишчи гул парвариши билан банд бўлади.

— Биз гулчиларнинг учинчи авлодимиз, — дейди ҳаваскор гулчи Носиржон Ҳакимжонов. — Бобомиз Абдуғанибой Наманган гулчиларининг пешқадами бўлганлар. Оилавий хўжалигимизда 12 киши доимий иш билан банд.

Андижондан Наманганга йўллар туташ, бу йўлларда гулга пайванд диллар туташ. Ўзини Азизбек Мамажонов деб таништирган гулчи йигит 65 турдаги 350 дан зиёд ноёб гулларни кўргазмага қўйган. У ўтган йили ўтказилган байрамда учинчи ўринни олган экан. Бу йил совғага қўйилган «Матиз»лардан бирини қўлга киритишни мўлжаллаб турганини айтди.

— Маълумотларга кўра, дунёнинг саккиз давлатида «Гул байрами» ўтказилар экан, — дейди халқ депутатлари Наманган шаҳар Кенгашидаги ЎзХДП гуруҳи раҳбари Илҳомжон Атабоев. — Лекин жаннатмонанд Наманганда анъанага айланган бу байрам ўзига хос, бетакрор.

Кореялик меҳмон Су Бин ўз ҳайратини шундай ифодалайди:

— Ўзбекистонни қуёшли юрт де­йишларининг сабабини Намангандаги гул сайлида ҳис этдим. Ўзим Алишер Навоий номидаги ўзбек тили ва адабиёти университетида таҳсил оламан. Халқингизнинг ўзига хос анъаналари, қадриятлари орқали тили ва руҳиятини, адабиёти ва маънавиятини ўрганяпман.

Бэй Жинсунинг фикрлари янада эътиборли:

— Кореяда ўтказиладиган гул байрами билан сизлардаги байрамнинг фарқи бор. Бизда хонаки гулларга унча эътибор берилмайди. Бу ердаги гулчи оилалар, сулолалар, ўқув юрти ва меҳнат жамоаларининг кўргазмада қатнашишлари менга жуда ёқди.

— Гул байрами фақат бизда — Хитойда ўтказилади деб ўйларканман, — дейди Хуа Мин. — Очиғи, Намангандаги гул сайли бунчалик кўтаринкилик, уюшқоқлик билан ташкил этилишини тасаввур қилмаган эканман.

 

Носиржон ДЕҲҚОНОВ,

«Ўзбекистон овози» мухбири.



DB query error.
Please try later.