03.06.2017

«ҲАР БИР БОЛАГА МЕҲР, ЭЪТИБОР!»

Мамлакатимизнинг барча туман ва шаҳарларида Халқаро болаларни ҳимоя қилиш кунига бағишланган байрам тадбирлари бўлиб ўтди.

Пойтахтимизнинг Ғафур Ғулом номидаги маданият ва истироҳат боғида Тошкент шаҳар ҳо­кимлиги ва бир қатор жамоат ташкилотлари ташкил этган тадбир «Ҳар бир болага меҳр, эътибор!» деб номланди. Унда кам таъминланган оилаларнинг фарзандлари, Ватан ҳимоя­си йўлида ҳалок бўлган ҳуқуқ-тартибот органлари ходимлари ва ҳарбий хизматчилар фарзанд­лари, Меҳрибонлик уйлари тарбияланувчилари иштирок этди.

Тадбир давомида болажонлар учун ранг-баранг томошалар намойиш этилди. Ёш санъаткорлар иштирокидаги концерт дастури ҳамда «Баркамол авлод» болалар ижодиёт марказининг кўргазмалари-ю Ўзбекистон давлат цирки томошалари болажонларга катта қувонч улашди.

— Байрам жуда қизиқарли ўтмоқда, — дейди Тошкент шаҳар халқ таълими бошқармаси бошлиғи Насиба Мовлонова. — Боғнинг кичик саҳнасида бола ҳуқуқларининг кафолатлари тўғрисидаги Ўзбекистон Республикаси Қонуни ҳамда бола ҳуқуқлари тўғрисидаги Конвенция юзасидан касб-ҳунар коллежи, академик лицей ва умумтаълим мактаблари ўқувчилари иштирокида викторина ўйинлари ўтказилмоқда. Шунинг­дек, спортнинг бадиий гимнастика, шарқ яккакураши турлари бў­йича кўргазмали чиқишлар, ­шахмат-шашка, стол тенниси ­мусобақалари, асфальтга расм чизиш кўрик-танлови ёшларимизга олам-олам ҳаяжон ва қувонч бағишлади. Викторина ва танловлар ғолиблари ташкилотчилар томонидан таъсис этилган сов­ғалар билан тақдирланди.

— Боғда дўстларимиз билан маза қилиб аттракционларда учдик, — дейди Шайхонтоҳур туманидаги 115-мактабнинг 7-синф ўқувчиси Ҳикоят Саидалиева. – Эртак қаҳрамонлари билан учрашдик, концертлар томоша қилдик. Бундан таш­қари, ташкилотчилар томонидан бизга спорт кийимлари ва боғдаги аттракцион ўйингоҳлар учун бепул бир ойлик чипталар берилди. Бугунги ажойиб байрам ҳеч қачон эсимиздан чиқмайди.

— Эрталаб боғда бизни карнай-сурнайлар, эртак қаҳрамонлари қиёфасидаги ғаройиб томошалар билан кутиб олишди, — дейди Олмазор тумани 219 мактабнинг 3-синф ўқувчиси ­Самира Дадилжонова. — Мен мактабимиздаги шахмат тўгараги аъзосиман. Туманлар­аро ўтган мусобақада 1-ўринни олганман. Бугун эса 2-ўринга сазавор бўлдим. Лекин бугунги мусобақалар қизиқарли ўтди. Кўп янги дўстлар орттирдим...

«Ҳар бир болага меҳр, эътибор!» шиори остидаги байрам тадбирлари кечга қадар давом этди.

 

Моҳира СИДИҚМЕТОВА



DB query error.
Please try later.