01.06.2017

БОЛАЛАР – БАХТ ЧЕЧАКЛАРИ

Пойтахтимиздаги Чин­обод санаториясида 1 июнь — Халқаро болаларни ҳимоя қилиш куни муносабати билан «Баркамол авлод — келажак таянчи» шиори остида тадбир ўтказилди. Мазкур тадбир Юнусобод тумани Маънавият ва маърифат кенгаши, Маънавият тарғибот маркази ҳамда бошқа бир қатор ташкилотлар ҳамкорлигида ташкил этилди.

Унда ёзувчи ва шоирлар, Ўзбек Миллий академик драма театри актёрлари, санатория дам олувчилари ҳамда шу ҳудуддаги маҳаллаларда яшовчи оилалар фарзандлари иштирок этди.

— Ҳар йили ушбу сана муносабати билан дунё бўйлаб болалар ҳуқуқларини ҳимоя қилишга, уларга нисбатан зўравонлик қилинишига қарши курашга бағишланган тадбирлар ўтказилади, болалар учун байрам ва концертлар ташкил этилади, — дейди Ўзбек Миллий академик драма театри актрисаси Феруза Бобоёрова. — Бугунги учрашувни ҳам ана шундай тадбирлардан бири сифатида эътироф этиш мумкин. Театримиз жамоаси номидан болажонларимизни табриклайман. Фарзандларимиз бахтини кўриш ҳар биримизга насиб этсин. Болажонларимиз юзидаги қувонч уларни ҳеч қачон тарк этмасин.

— Қарши шаҳридаги 19-мактабда ўқийман, — дейди Шодия Келдиёрова — Санаторияга онам ва отам билан келдим. Цирк­ка, ҳайвонот боғига, аквапаркка бордик. Бугунги тадбирда ёд олган шеърларим билан қатнашдим.

— Амударё туманидан келиб санаторияда дам олаяпмиз, — дейди Ҳалима Ҳайтимбетова. — Ушбу тадбир жуда ҳам мазмунли ўтди, менга ёқди. Фарзандларимиз, набираларимизни энг бахтли болалар, деб айтгим келади. Чунки улар учун юртимизда барча шарт-шароит муҳайё этилган. Демак, болаларимиз ҳам бундай имкониятлардан унумли фойдаланган ҳолда, яхши ўқиб-ўрганишлари керак.

Тадбирнинг бадиий қисмида ёш хонандалар ижросида куй-қўшиқлар янгради. Болалар ўртасида шеър­хонлик баҳслари ҳамда қизиқарли савол-жавоблар ўтказилди. Унда фаол қатнашганларга эсдалик совғалари, китоблар берилди.

 

Шаҳбоз САИДОВ,

«Ўзбекистон овози» мухбири.



DB query error.
Please try later.