01.06.2017

СЕН ЮРТИМ ТАЯНЧИ, АЗИЗ БОЛАЖОН!

Алишер Навоий номидаги Ўзбекистон Миллий боғида турли эртак қаҳрамонлари либосидаги болаларнинг шўх-шодон ҳаракатларини кузата туриб, бир зум болалик хотираларига чўм­дим.

Бу ерда ЎзХДП Марказий Кенгаши ташаббуси билан «Сен юртим таянчи, азиз болажон!» шиори остида маданий-маърифий тадбир ўтказилаётган экан. Жажжи болажонлар, буви-ю боболар йиғилишган. Партия ташкилотлари ходимлари, «Истиқбол» ёшлар қаноти фаоллари ҳам шу ерда.

Байрам тадбири қизиқарли ва кўтаринки руҳда ўтди. ЎзХДП Тошкент шаҳар кенгаши раиси Ҳайдар Бобохонов кичкинтойлар ва уларнинг ота-оналарини байрам билан самимий муборакбод этди. Шундан сўнг болажонлар учун байрам дастури намойиш этилди. «Қувонч» болалар студияси эртаклар асосида қизиқарли саҳна кўринишларини тақдим этишди. Кичкинтойлар ажойиб шеъру қўшиқлари билан йиғилганлар қалбини хушнуд қилди.

— 1 июнни орзиқиб кутмайдиган бола бўлмаса керак, — дейди Юнусобод туман партия кенгаши раиси Нигора Эшматова. — Биргина неварам мисолида айтадиган бўлсам, эрта тонгданоқ байрамона кийиниб, истироҳат боғига боришга шайланиб туради. Бу ерда у турли кўнгилочар ўйинларда қатнашди, хурсанд бўлди. Буларни кўриб, биз катталар ҳам болаликка қайтгандек бўлдик.

Тадбирга фарзандларини, невараларини олиб келган ота-оналар, бувижонлар шўх-шодон рақсга тушаётган болажонларининг бахтидан қувонишди.

— Бугунги байрам бизга жуда ёқди, — дейди икки нафар фарзанднинг онаси Дилноза Убайдуллаева. — Болаларим ҳам хурсанд. Айниқса, «Қувонч» болалар театр студияси томонидан тайёрланган саҳна кўринишлари ўзгача таассурот қолдирди. Ташкилотчиларга раҳмат.

— 68 ёшдаман, — дейди Зулайҳо Умарова. — 21 нафар неварам, 3 нафар эварам бор. Бугун уларни бир сайр қилдирай, деб олиб келгандим. Сув бўйида айланиб юрсак, мусиқа овози эшитиляпти. Тўғри шу томонга келдик. Халқ демократик партияси ташкиллаштирган катта байрамнинг устидан чиқдик. Невараларим хурсанд.

— Юртимизда болаларга эътибор катта, уларни миллий ва умум­инсоний қадриятлар руҳида тарбиялаш масаласи давлат сиёсати даражасига кўтарилган, — дейди ЎзХДП Марказий Кенгаши сектор мудири Гулруҳ Тошматова. — Мазкур жараёнларда партия ташкилотлари ҳамда депутатларнинг иштирокини янада фаоллаштириш, айниқса, меҳрибонлик уйи тарбияланувчилари, эҳтиёжманд ва боқувчисини йўқотган оилалар фарзандлари ҳолидан хабар олиш, уларни ҳар томонлама қўллаб-қувватлаш ишларига алоҳида эътибор қаратилмоқда. Бугунги тадбир ҳам шу мақсадда ташкил этилди. Болаларнинг юз-кўзларидаги қувонч барчамизнинг кўнглимизга илиқлик олиб кирди.

Тадбир давомида болажонларга совғалар берилди. Турли аттракционлар, ўйинчоғу арғимчоқлар шу куни кичкинтойлар хизматида бўлди.

 

Маҳлиё АЛИҚУЛОВА



DB query error.
Please try later.