01.06.2017

МУАММОЛАР ЎРГАНИЛМОҚДА

Феруза ЭШМАТОВА, Олий Мажлис Қонунчилик палатаси депутати, ЎзХДП фракцияси аъзоси:

— Ҳар ойнинг дастлабки кунларида жойларда аҳоли билан учрашиб, ҳақиқий аҳволни ўрганяпмиз. Шу аснода ҳудуддаги камчиликлар, электорат вакилларини ўйлантираётган масалалар билан яқиндан танишиб, уларни ҳал этиш бўйича вазифалар белгилаб олинмоқда.

Май ойида Қарши туманида хизмат кўрсатиш тизими ҳамда ҳуқуқ-тартибот органлари фаолияти билан яқиндан танишдик. Ҳудудни ижтимоий-иқтисодий ривожлантириш, аҳоли турмуш фаровонлигини ошириш борасида қилинаётган ишлар ўрганилиб, таҳлил этилди.

Аҳоли, жумладан, ёшлар, тадбиркорлар, фермерлар, фуқароларнинг ўзини ўзи бошқариш органлари вакиллари ҳамда фаоллар билан бевосита мулоқот олиб борилди. Суҳбат асносида одамлар турли муаммо ва камчиликларни баён этишди. Кўпроқ уй-жой-коммунал, транспорт ва йўл қурилиши, банк-кредит, аҳоли банд­лиги, соғлиқни сақлаш, экология ва атроф-муҳит, таълим, тадбиркорлик, пенсия ва нафақа таъминоти масалаларида мурожаатлар бўлди. Шунингдек, фуқароларнинг ўзини ўзи бошқариш органлари, савдо ва маиший хизмат кўрсатиш, маданият ва спорт, интерактив давлат хизматларини кўрсатиш, ҳуқуқни муҳофаза қилувчи ва назорат органлари фаолияти ва пластик карталар орқали тўловларни амалга ошириш бўйича ҳам қатор фикр-мулоҳазалар, таклифлар билдирилди.

Айрим қишлоқларда мактабгача таълим муассасалари бинолари таъмирталаб ҳолатда экани, болалар учун қаттиқ ва юмшоқ жиҳозлар, ўйинчоқлар, ўйин майдончалари учун мосламаларнинг етишмаслиги, айниқса, иситиш тизимида муаммолар мавжудлиги аниқланди.

Туманда 233 ўринли марказий шифохона, 2 кўп тармоқли поликлиника ва 8 қишлоқ врачлик пункти, 6 қишлоқ оилавий поликлиникаси ҳамда давлат санитария-эпидемиология назорат маркази аҳолига тиббий хизмат кўрсатади. ҚВПларнинг деярли барчасида умумий амалиёт шифокорлари етишмайди. Маълум бўлишича, бугунги кунда туманда 49 нафар умумий амалиёт шифокори, қишлоқ оилавий поликлиникалари учун 6 нафар УТТ мутахассиси ва хирургга эҳтиёж мавжуд.

Туман даражасидаги масалаларни ҳал этиш юзасидан тегишли маҳаллий давлат органлари ва бошқа ташкилотларга тавсиялар берилди ҳамда уларнинг бажарилиши назоратга олинди.

Ўрганишлар давомида аниқланган муаммолар ва камчиликларни парламент ва депутатлик назорати асосида бартараф этиш бўйича зарур чора-тадбирлар белгилаб олинди.

Учрашувлар давом этмоқда. Бу ойда Касби туманида бўламиз. Сайловчилар билан мулоқотлар ҳудудлардаги муаммоларни ўрганиш, уларга ечим топишда катта самара бермоқда.



DB query error.
Please try later.