30.05.2017

«БАРМОҚЛАРДА ОЛАМ ТАФТИ»

ЎзХДП Марказий Кенгаши ташаббуси билан шу номли махсус кўргазма ташкил қилинди

Чорраҳадан ўтаётган йигитга одамлар ёрдам беришга уринишар, у эса рад этарди. Кўпчилик қатори мен ҳам ҳайрон бўлдим. Кейинроқ шу йигитни Ўзбекистон тарихи давлат музейидаги тадбирда учратдим.

Ўзбекистон ХДП Марказий Кенгаши Хотин-қизларнинг ижтимоий-сиёсий фаоллигини ошириш сектори ва музей ҳамкорлигида ташкил этилган тадбир «Бармоқларда олам тафти», дея номлангани бежиз эмас. Барчамизга маълумки, кўзи ожиз инсонлар дунёни бармоқлари ор­қали кўради ва ҳис этади. Бу кўргазма ор­қали уларга илк бор музей экспонатларини кўриш имконияти берилди. Улар ҳар бир ашёнинг таърифини эшитиб, янада аниқ тасаввурга эга бўлишди.

— Бахтсиз ҳодиса сабабли ўн икки ёшимда кўзим кўрмай қолди, — дейди биз чорраҳада учратган йигит Исломжон Жўраев. — Аввалига қийналдим. Яқинларимнинг қўллаб-қувватлаши натижасида яна ҳаётга қайтдим. Олға юришга аҳд қилиб, ота-онамнинг кўнгли ўксимаслиги учун ҳам ҳеч кимдан кам бўлмасликка интилдим.

Яшнобод тумани 20-махсус мактаб-интернатда ўқиб, Низомий номидаги Тошкент давлат педагогика университетига ўқишга кирдим. Ҳозир тўртинчи босқич талабасиман. Кўплаб маҳаллий ва хорижий нашрларда илмий мақолаларим чоп этилди. «Тарихий тафаккурни ривожлантириш орқали ёшларда миллий ғоя ва ватанпарварлик туйғуларини шакллантириш» лойиҳасини тақдим этиб, «Камолот» стипендиясини олдим. «Биз — буюк юрт фарзандларимиз» фестивали доирасида Қорақалпоғистон Республикаси ва ўн иккита вилоят­да бўлиб, лойиҳамнинг кенг ёйилгани, куртак ёзганини кўриб хурсанд бўлдим. Дўстлар орт­тирдим. Ўзимга ишончим янада орт­ди. Ёлғиз эмаслигим, бошқалардан кам эмаслигимни ҳис этдим. Келажакдаги режаларим ҳақида гапирадиган бўлсам, тадбиркорлик билан шуғулланмоқчиман. Юртимизда бунинг учун барча шарт-шароитлар яратилган. Бу — шунчаки баландпарвоз гаплар эмас. Бир соғлом инсоннинг қўлидан келадиган ишларни бажара оламан. Мустақил ҳаракатланаман. Йўллардан бировнинг ёрдамисиз ўтаман. Кўпчилик ёрдамга шошилади. Ёрдамини рад этганимда ҳайратланишади. Ўйлайманки, жисмоний камчилик ютуқларга эришишимизда тўсиқ бўла олмайди.

Музей директори, тарихчи олим Жаннат Ис­моиловани ташриф буюрганларга Ўзбекистон ҳудудини акс эттирувчи рельефли харитани таништираётган вақтда учратдик.

— Кўзи ожиз инсонлар учун махсус кўргазма ташкил этишни анчадан бери ният қилгандик, — дейди у. — Аммо улар буни қандай қабул қилар экан, деб ўйлардик. Ўзбекистон Халқ демо­кратик партияси бу ғоя амалга ошишига катта ёрдам берди, қўллаб-қувватлади. Музе­йимизга кутганимиздан ҳам кўпроқ инсонлар келганини кўриб хурсанд бўлдик, янада руҳландик.

— Бугунги ислоҳотлар мазмун-моҳияти билан инсонни улуғлашга, унинг шаъни, қадр-қимматини оширишга ва манфаатларини ҳимоя қилишга қаратилгани билан қимматлидир, — дейди Ўзбекистон ХДП Марказий Кенгаши сектор мудири Гулшан Асатова. — Партия­миз Сайловолди дастурида аҳолининг ижтимоий ёрдамга муҳтож қатламларига меҳр-мурувват кўрсатиш, ногиронларнинг ижтимоий инфратузилма объектларидан бемалол фойдаланиши учун шароитларни яхшилаш масалалари кўзда тутилган. Бу борада муайян амалий ишлар қи­линяпти. Бугунги тадбир ҳам электоратимиз вакилларига бироз бўлса-да кай­фият улашиш, уларни тарихий меросимиз билан яқиндан таништириш мақсадида ташкил этилди. Ўйлаймизки, кўргазма уларга манзур бўлди.

Кўргазмада Камолиддин Беҳзод номидаги Миллий рассомлик ва дизайн институти талабаларининг ижодий ишларидан, Геология музейи тақдим этган материаллардан фойдаланилди. Кўзи ожизлар жамияти билан ҳамкорликда мана шундай кўргазмаларни республика миқёсида ўтказишга келишиб олдик.

— Махсус кўргазма ташкил этилишини эшитиб, биринчилардан бўлиб келдим, — дейди Кўзи ожизлар жамияти аъзоси Улуғбек Содиқов. — Келиб, музейдаги тарихий буюмларни ушлаб кўриб, таърифини эшитдик. Жуда хурсанд бўлдик. Ўзбекистон тарихи билан боғлиқ янги маълумотларни билиб олдик. Миллий рассомлик ва дизайн институти талабаларининг ижодий ишлари, айниқса, Ҳайитмирза Ёқубжоновнинг «Куй» деб номланган ҳайкали жуда ёқди. Бундай тадбирлар кўпайишини истардим.

Тадбир якунида кўргазма иштирокчиларига аудиодисклар ва эсдалик сов­ғалари топширилди.

 

Маҳлиё АЛИҚУЛОВА



DB query error.
Please try later.