27.05.2017

КИТОБМИ, МУЗҚАЙМОҚ?

Пойтахтимизнинг Ғафур Ғулом номидаги маданият ва истироҳат боғида «Адабиётга эътибор — маънавиятга, келажакка эътибор» шиори остида анъанавий республика «Китоб байрами» бўлиб ўтмоқда.

— Мамлакатимизда истеъдодли ижодкор ёшларни қўллаб-қувватлашга, уларнинг асарларини чоп этишга, тарғибот қилишга алоҳида эътибор берилаётгани қувонарли ҳол, — дейди Вазирлар Маҳкамасининг масъул ходими Собир Шукуров. — Аҳоли ўртасида китобхонлик маданиятини шакллантириш, ёшлар маънавиятини юксалтиришда китобнинг ўрни ва аҳамия­тини ошириш масаласи барчамизнинг диққат марказимизда бўлиши лозим. Шу кунларда Қорақалпоғистон Республикаси, барча вилоят, шаҳар ва туман марказларида китоб байрамлари ўтказилмоқда.

— Мен Биринчи Президентимизнинг «Китоб ўқимаган одам фикрлашдан тўхтайди» деган ҳикматларини тез-тез эслаб тураман, — деди Ўзбекистон халқ шоири Иқбол Мирзо. — Фарзандларимиз китоб ўқиши учун, аввало, биз ота-оналар китоб ўқишимиз керак. Ўшанда катталардан ўрнак олиб, болалар ҳам китобсевар бўлиб улғаяди.

— Боққа кириб, аввало, турли наш­риётлар томонидан ташкил этилган бири-биридан чиройли китоб ярмаркаларини томоша қилдим, — дейди Ўзбекистон халқ шоири ­Анвар Обиджон. — Кейин болаларни кузатдим. Бир бола пештахтага қўйилган суратли китоб олдида тўхтаб қолди. Онаси ўша китобни олиб бермагунча, ҳеч қаёққа кетмай туриб олди. Бошқа бир болани музқаймоқ сотадиган дўкон олдидан силжитиб бўлмади. Бу кузатувлардан хулоса шуки, китобга қизиқиш уйғотишда бола характери, тафаккур даражасидан келиб чиққан ҳолда уларнинг ҳар бирига алоҳида, ўзига хос тарзда ёндашиш керак.

Нашриётларимизда болалар учун жуда кўп китоблар чоп қилинмоқда. Бу яхши албатта. Лекин уларни чекка туманларга етказишда қийинчиликлар бор. Биз яқинда Фарғона, Наманган, Сирдарё вилоятларида бўлдик. Жуда катта ўзгариш, қурилиш-ободончиликлар бўлибди. Лекин мен учун уларнинг ҳаммаси бир томон бўлди-ю, вилоят, туман марказларида қурилаётган китоб дўконлари бир томон бўлди. Мамлакатимиз бўйлаб маърифатпарварлик ишлари яна бир поғона кўтарилганидан, эртага ўша жойларга ҳам болалар учун чоп этилган бири-биридан чиройли китоблар етиб боришидан қувондим...

— Байрам руҳи бу йил ниҳоятда баланд, — дейди «Тонг юлдузи» газетаси бош муҳаррири ўринбосари Юсуф Абдуллаев. — Газетамизнинг фаол иштирокчилари бўлган ёш мухбирлар, шоир ва ёзувчилар билан учрашувлар ўтказиляпти. Бир танишим бундан беш йил аввал ўтказилган дас­т­лабки китоб байрамига боғча ёшидаги фарзанди билан келиб, унга эртак китоблар олиб берган экан. Шундан буён бола отасидан «Китоб боғига қачон борамиз?» деб сўрашни қўймас экан.

Сайил иштирокчилари ўртасида «Китоб ўқишни ёқтирасизми?» мавзуида ижтимоий сўровнома ўтказилди ҳамда уларга оилавий китоб ўқиш анъаналарини тарғиб қилиш мақсадида «Болаларда китоб ўқишга меҳр уйғотишда ота-оналарга маслаҳатлар» номли флайерлар тақдим этилди.

Китоб байрамининг иккинчи куни «Китоб — миллатнинг бебаҳо маданий ва маънавий мероси» мавзуида V илмий амалий конференция ўз ишини бошлади. Шунингдек, Халқ таълими вазирлиги тасарруфидаги Республика Болалар кутубхонаси томонидан ташкил этилган «Китоб бизни бирлаштиради» номли китобхонлар фестивали доирасида «Ўзбекистон адабиёти ва санъати», «Китоб дунёси» «Болалар адабиёти» журнали, «Тонг юлдузи», «Класс» газеталари таҳририяти ижодий жамоаси билан учрашувлар ўтказилди. «Бунёдкор» ёшлар телекомплекси орқали Китоб байрамининг Тошкент шаҳри ва ҳудудларда ўтказилиши юзасидан тўғридан-тўғри мулоқотлар ташкил этилди.

Китоб байрами тадбирлари давом этмоқда.

 

Нуруллоҳ ДОСТОН,

«Ўзбекистон овози» мухбири.



DB query error.
Please try later.