27.05.2017

ДАСТЛАБКИ ҒАЛАБАЛАР ВА МАҒЛУБИЯТЛАР

Жиззахда «Баркамол авлод — 2017» спорт ўйинларининг финал бос­қичи бошланди. Унда 900 нафарга яқин ўғил-қиз спортнинг 17 тури бўйича медаллар учун кураш олиб бормоқда. Мусобақаларни тўртта объект­да ўтказиш режалаштирилган. Хусусан, «Сўғдиёна» универсал спорт мажмуасида бокс, бадиий гимнастика, сузиш ва енгил атлетика, Жиззах олимпия захиралари коллежида гандбол, баскетбол, бадминтон, стол тенниси, эркин ва юнон-рум курашлари, дзюдо, таэквондо ВТФ, оғир атлетика ҳамда теннис, Жиззах политехника институтида волейбол, футбол, мазкур инс­титут қошидаги академик лицейнинг спорт залида шоҳмот бўйича мусобақалар бўлиб ўтмоқда.

«Сўғдиёна» универсал спорт мажмуасида саралаш босқичларидан муваффақиятли ўтган спортчилар брасс, чалқанча, баттерфляй, эркин ҳамда аралаш эстафета усулларида сузиш бўйича ўзаро куч синашди.

 Қизлар ўртасида 50 метрга баттерфляй усулда сузиш баҳсларида қашқадарёлик Фотима Амилова олтин медаль соҳиби бўлди. Шу масофага сузиш бўйича ўғил болалар ўртасида бўлиб ўтган мусоба­қ­а­­да андижонлик Зуфар Абдулазизов биринчи ўринни эгаллади.

Ўғил болалар ва қизлар ўртасида 50 метрга чалқанча усулда сузиш баҳс­ларида пойтахтлик спортчилар Алексей Тарасенко ва Ирина Ушакова ғолиб бўлди.

Юз метрга баттерфляй усулда сузишда қизлар ўртасида қорақалпоғистонлик Маржина Ўразимбетова, ўғил болалар баҳсида пойтахтлик Артём ­Козлюк энг яхши натижа қайд этди.

Қизлар ўртасида 200 метрга эркин усулда сузиш баҳсларида андижонлик Шаҳноза Содиқова, ўғил болалар ўртасида Навоий вилояти вакили Олимжон Одилов ғолиб чиқди. Қизлар ўртасида аралаш эстафета мусобақасида Қаш­қадарё вилояти, ўғил болалар ўртасида Тошкент шаҳри жамоаси биринчи ўринни қўлга киритди.

Сузиш бўйича мусобақаларнинг биринчи куни натижаларига кўра, энг кўп очко жамғарган Тошкент шаҳри жамоа­си биринчи, андижонликлар иккинчи ва қашқадарёлик спортчилар учинчи ўринда бормоқда.

Шунингдек, мусобақанинг футбол, волейбол ва шоҳмот турлари бўйича баҳслар бошланди.

Футбол бўйича финал йўлланмаси учун Тошкент шаҳри ва Фарғона вилоя­ти жамоалари ўртасида ўтган учрашувда 0:2 ҳисоби қайд этилди. Иккинчи ярим финал баҳсида Қашқадарё ва Хоразм жамоалари майдонга тушди. Унда қашқадарёлик футболчилар 5:0 ҳисобида ғалаба қозонди.

Фарғона ва Қашқадарё жамоалари ўртасидаги финал учрашуви бугун бўлиб ўтади.

Волейбол бўйича қизлар ўртасидаги ярим финал учрашувида Андижон вилояти жамоаси хоразмлик тенгдошларидан 3:0 ҳисобида устун келган бўлса, наманганлик спортчилар ҳам финал йўлланмаси учун курашда Фарғона вилояти жамоасини 3:0 ҳисобида мағлуб этди.

Ўғил болалар ўртасидаги ярим финал беллашувида фарғоналик спортчилар Қашқадарё вилояти жамоасидан 3:1 ҳисобида устун келди. Навоий ҳамда Андижон вилояти жамоалари ўртасида кечган иккинчи ярим финал баҳсида навоийлик ёшлар ғалаба қозонди.

Бугун қизлар ўртасида Андижон ва Наманган, ўғил болалар ўртасида Фарғона ва Навоий жамоалари «Баркамол авлод — 2017» ўйинларининг ғолиблиги учун баҳсларга киришади.

Шунингдек, кеча шоҳмот бўйича Швейцарча тизимда 3- ва 4-тур ўйинлари бўлиб ўтди. Шоҳмот баҳсларида ғолиблар номи бугун маълум бўлади.

Мусобақалар давом этмоқда.

 

Шаҳбоз САИДОВ,

«Ўзбекистон овози» мухбири.



DB query error.
Please try later.