07.05.2017

ИЧКИ ИШЛАР ХОДИМЛАРИ АҲОЛИ БИЛАН ОЧИҚ МУЛОҚОТ ЎТКАЗДИ

Пойтахтимизда Ўзбекистон фуқаролигини олиш ёки ундан чиқиш, Тошкент шаҳри ва Тошкент вилоятига доимий прописка қилиш, биометрик паспортни расмийлаштириш, чет элга вақтинчалик чиқиш учун рухсатнома олиш қонун-қоидаларига бағишланган очиқ мулоқот ўтказилди. Тадбирда Наима Тошбоева билан ёнма-ён ўтириб қолдик. Мулоқот бошланишига озгина вақт бор. Фурсатдан фойдаланиб у билан суҳбатлашдим.

— Мирзо Улуғбек туманидаги 209-мактабда ўқитувчи бўлиб ишлайман, — дейди у. — Президентимизнинг жорий йил 22 февралдаги «Ўзбекистон Республикаси фуқаролигига қабул қилиш тўғрисида»ги фармонига мувофиқ Ўзбекистон Республикаси фуқаролигига қабул қилиндим. Бундан хурсанд­ман. Уч нафар фарзандим бор. Улар мана шундай тинч, осо­йишта юртда вояга етаётганидан жуда бахтиёрман.

Давра суҳбати мобайнида Ички ишлар вазирлиги Хорижга чиқиш, келиш ва фуқароликни расмийлаштириш бошқармаси, Ташқи ишлар вазирлиги, Вазирлар Маҳкамаси ҳузуридаги Давлат персоналлаштириш маркази масъул ходимлари Тошкент шаҳри ва Тошкент вилоятида яшовчи аҳоли вакилларини ўйлантираётган муаммоларни эшитишди. Мулоқот давомида уларнинг мурожаатлари кўриб чиқилди, тегишли ҳуқуқий маслаҳатлар берилди.

Тадбирда сўзга чиққанлар ички ишлар тизимида амалга оширилаётган кенг кўламли ислоҳотлар, жумладан, миграция, паспорт-виза тизими, фуқароликни қабул қилиш ва ундан чиқиш масалалари қонун-қоидалари хусусида аҳолига ахборот беришди. Шунингдек, фуқароларнинг тинч ва осойишта ҳаёт кечиришини таъминлаш, юртимизда жиноятчиликнинг олдини олиш бўйича жиддий чора-тадбирлар кўрилаётгани таъкидланди.

Ўзбекистон Республикаси Ички ишлар вазирлиги Хорижга чиқиш, келиш ва фуқароликни расмийлаштириш бошқармаси бошлиғи ўринбосари, подполковник Фахриддин Турсунов тизимда бўлаётган ўзгаришлар ҳамда аҳолини биометрик паспорт билан таъминлаш масаласидаги янгиликлар хусусида иштирокчиларга маълумот берди.

 — Ҳозирги замон талабларидан келиб чиқиб, фуқароларга янада қулайлик яратиш мақсадида Ягона интерактив давлат хизматлари портали орқали масофадан туриб биометрик паспорт олиш учун навбатга туриш ва белгиланган муддатда «биометрик маълумотларни йиғиш пункти»га ташриф буюриш мумкин бўлган хизмат тури жорий қилинди, — дейди у. — Фуқаролар Ягона интерактив давлат хизматлари порталидаги шахсий кабинетга кириш учун ID.UZ (www.id.uz) идентификация тизимида рўйхатдан ўтиши талаб этилиб, сўнгра www.gov.uz интернет саҳифасининг «Фуқаролик» бўлимига кириш йўли орқали биометрик паспорт ҳужжатлаштириш учун On-line тартибда навбатга туриши мумкин. Бу Тошкент шаҳрининг барча «биометрик маълумотларини йиғиш пунктлари»да жорий қилинган бўлиб, фуқаролар ҳамда тизимда фаолият юритаётган масъул ходимларга янада қулайликлар яратади.

Тадбир давомида Тошкент вилоятига доимий яшашга ҳужжат топширган 56 нафар фуқаролиги бўлмаган шахсларга доимий рўйхатга ўтиш ва яшаш гувоҳномасини бериш тўғрисида охирги хулоса чиқарилди. Яшаш жойидаги туман паспорт тизимига мурожаат қилишлари айтилди.

«Ўзбекистон Республикасининг фуқаролиги тўғрисида»ги қонуннинг 15-моддасига биноан ота-онаси фуқаролиги бўлмаган шахс бўлиб, ўзлари Ўзбекистон Республикасида туғилиб, 16 ёшга тўлиб вояга етган болаларга фуқаролик паспортлари тантанали равишда топширилди.

Мулоқот давомида, шунингдек, аҳолининг мурожаатлари тингланди. Қолаверса, ушбу мурожаатларни кўриб чиқиб, тезда ечимини топиш бўйича соҳа ходимларига аниқ вазифалар юклатилди.

Дарҳақиқат, Ички ишлар ходимлари билан аҳоли ўртасидаги ўзаро ишонч мана шундай очиқ мулоқотлар орқали янада мустаҳкамланади. Бу эса ватанимизда тинч ва осуда ҳаёт таъминланишига хизмат қилади.

 

Маҳлиё АЛИҚУЛОВА



DB query error.
Please try later.