07.05.2017

ОТАМ ДОИМ «УРУШ БАЛОСИНИ БИЗ КЎРДИК, СИЗЛАР КЎРМАНГЛАР», ДЕР ЭДИ...

Ўтган асрнинг 70-йиллари. Мактабда бошланғич синфда ўқийман. Ҳар йили 9 май — Ғалаба байрами сифатида нишонланар, мактабга уруш қатнашчилари таклиф қилиниб, улар болаларга уруш ҳақида гапириб беришар эди.

Менинг отам Қўзибой Раҳимов ҳам Иккинчи жаҳон уруши қатнашчиси, II гуруҳ уруш ногирони эди. У кишини 16 ёшида урушга олиб кетишган экан. Лекин отамни учрашувларга чақиришмас эди. Кўпроқ бош­қалар таклиф қилинарди. Мен отамнинг ҳам давраларга чақиришларини жуда-жуда истар эдим. Тасаввур қилинг, отангиз ўртоқларингиз олдида уруш хотираларини гапириб берса, албатта фахрланасиз.

Ҳозир ўша вақтларни эсласам, отамни нақадар камтар ва хокисор инсон бўлгани ҳақида ўйлайман. Мактабдаги учрашувлардан кейин уйга келиб, отамга уруш қатнашчилари айтиб берган воқеаларни бирма-бир гапириб берар эдим. У киши диққат билан тинглаб, секин хўрсинарди. Мени уруш хотиралари қизиқтирарди. Отамни саволларга кўмиб ташлардим.

— Эй болам, мен олдинги фронтда фақат 6 ой жанг қилганман холос. Сенга нимани ҳам гапириб бераман, — дерди у.

Кунлардан бир куни телевизорда Курск остонасида бўлган жанг ҳақида кинофильм намойиш этилди. Отам уни жуда ҳаяжон билан кўрди, кўзларига ёш қал­қиди.

Кейин билсам, отам ўша Курск остонасида бўлган жангда иштирок этган экан. Тарихдан маълумки, бу жанг жуда оғир кечган, йўқотишлар ҳам кўп бўлган.

Янглишмасам, 1975 йил 9 май байрами арафасида эди. Отамни ҳарбий комиссариятга чақириб қолишди. Маълум бўлишича, у кишига Курск остонасидаги жангда кўрсатган қаҳрамонлиги учун 3-даражали «Шуҳрат» ордени берилган экан. Бироқ урушнинг жангу жадал кунлари ушбу орден топширилмай қолган, орадан 30 йил ўтиб ўз эгасини топган эди.

Отамнинг айтишича, битта жангга 1000 киши кирадиган бўлса, улардан фақат 5-10 таси жанг майдонидан соғ-омон қайтиб чиққан экан. Ким ярадор, ким ҳалок бўлганини аниқлашга вақт ҳам, имкон ҳам топилмаган.

Отам доим «Уруш балосини биз кўрдик, сизлар кўрманглар», дер эди. Бугун ҳам уруш қатнашчиларининг ҳар бири бу сўзларни такрорлайди. Илоҳим, шундай бўлсин. Аммо отам ва у кишининг кўплаб қуролдошлари бугунги фаровон кунларни, уруш қатнашчиларига кўрсатилаётган юксак эътибор ва ғамхўрликни кўролмай кетганига афсусланаман, қалбимни армон ўртайди...

 

Абдуманноб РАҲИМОВ,

ЎзХДП фаоли.



DB query error.
Please try later.