04.05.2017

СОҒЛИҚНИ САҚЛАШ

соҳасидаги муаммолар юзасидан тушаётган мурожаатлари жиддий назоратга олиниб, уларни ҳал этиш чоралари кўрилмоқда

Бу ҳақда Соғлиқни сақлаш вазирлиги томонидан ўтказилган матбуот анжуманида алоҳида таъкидланди

— Президентимизнинг Виртуал қабулхонасига жорий йилнинг 1 майига қадар тиббиёт соҳасига тааллуқли 25 мингга яқин мурожаат келиб тушган, — дейди Соғлиқни сақлаш вазири ўринбосари Элмира Боситхонова. — Улар ўрганилганда, баъзилар саломатлигини яхшилаш учун тиббий кўмак сўраган, айримлар тиббиёт ходимларининг муомала маданиятидан ранжиб шикоят йўллаган. Меҳнат ва бандлик, моддий ёрдам, дори-дармон нархи, тиббий таълим масалалари, ногиронлик гуруҳини белгилаш, нафақа, протез, техника воситалари сўраб қилинган мурожаатлар вазирлигимиз томонидан алоҳида назоратга олиниб, уларнинг ечимини топиш юзасидан изчил ишлар олиб борилмоқда. Натижада бугунги кунгача уларнинг 93 фоизи ўз ечимини топди.

Шунингдек, бу борадаги ишларни янада кучайтириш мақсадида соғлиқни сақлаш вазирининг виртуал қабулхонаси ташкил этилди. Доимий фаолият юритадиган 1003 рақамли «ишонч телефони» ҳамда www.ssv.uz расмий веб-сайти йўлга қўйилди. Қолаверса, аҳолини қийнаётган муаммоларни жойларга чиқиб ўрганиш ва ҳал этиш мақсадида вазирликнинг масъул ходимлари ҳудудларда ўтказилаётган сайёр қабулларда фаол қатнашмоқда.

Тадбир сўнгида соғлиқни сақлаш тизимида аҳоли мурожаатлари билан ишлаш борасида амалга оширилаётган ишлар, тизимни такомиллаштиришга доир дастур ва лойиҳалар хусусида маълумот берилди. Журналистларни қизиқтирган саволларга жавоб қайтарилди.

 

Тоштемир ХУДОЙҚУЛОВ,

«Ўзбекистон овози» мухбири. 



DB query error.
Please try later.