04.05.2017

НЕФТЬ ВА ГАЗ МАҲСУЛОТЛАРИ ТАЪМИНОТИ ДЕПУТАТЛАР НАЗОРАТИДА

Президентимиз Вазирлар Маҳкамасининг мажлисида «Ўзбекнефтгаз» компанияси томонидан 2010-2016 йиллар давомида қарийб 20 миллиард долларлик капитал қўйилмалар киритилганига қарамасдан, суюқ углеводород ва табиий газ қазиб олиш камайганлиги, хом-ашё импорт қилиш ҳажми 1,3 баробар кўпайганлиги, белгиланган вазифаларнинг ўз вақтида бажарилиши устидан етарли даражада назорат ўрнатилмаганлигини алоҳида таъкидлаган эди.

Олий Мажлис Қонунчилик палатасининг Саноат, қурилиш ва савдо масалалари қўмитаси томонидан «Ўзбекистон Республикаси аҳолисининг нефть маҳсулотлари, табиий ва сую­лтирилган газга бўлган эҳтиёжларини таъминлаш» мавзусида ташкил этилган тадбирда республикамизда углеводород захиралари геологик-қидирув ишларининг бориши, иқтисодиёт тармоқлари ҳамда аҳолини нефть ва газ маҳсулотлари билан таъминлашнинг ҳолати, бу борадаги муаммолар ҳамда истиқболдаги режалар хусусида атрофлича сўз юритилди.

Йиғилишда «Ўзбекнефтгаз» Миллий холдинг компанияси тизимидаги компания ва корхоналар томонидан Республикада аҳолининг нефть маҳсулотлари, табиий ва суюлтирилган газга бўлган эҳтиёжларини таъминлаш борасида олиб борилаётган комплекс ишлар тўғрисида маълумот берилди.

Таъкидландики, «Ўзбекнефтгаз» компаниясининг углеводород қазиб чиқариш ишлари 5 та нефт-газли ҳудудда яъни, Устюрт, Бухоро-Хива, Ҳисор, Сурхондарё ва Фарғонада олиб борилади. Бугунги кунга келиб аҳолининг нефть маҳсулотларига, айниқса, автобензин ва дизель ёнилғисига бўлган талаби ортиб бормоқда. Аҳоли даромадининг тобора ўсиб бораётганлиги туфайли республика бўйича автотранспортларнинг умумий сони ошди. Шу билан бирга, автотранспорт воситалари сиқилган ва суюлтирилган газга ўтказилишига қарамай, автобензинга бўлган эҳтиёж камаймаяпти.

— Тадбир давомида биз асосий эътиборни нефть ва газ захираларини аниқлашга йўналтирилган геология қидирув ишлари, углеводород қазиб чиқаришнинг жорий ҳолати, аҳолини ҳамда иқтисодиёт тармоқларини табиий ва суюлтирилган газга бўлган эҳтиёжларини тўлиқ қоплаш масалалари, мавжуд муаммолар ва истиқболдаги режаларга қаратдик, — дейдиОлий Мажлис Қонунчилик палатасининг Саноат, қурилиш ва савдо масалалари қўмитаси аъзоси, ЎзХДП фракцияси аъзоси Аҳад Аҳмедов. — Чунки аҳолидан келиб тушаётган эътирозлар ушбу тизимни янада такомиллаштиришни, унинг қонунчилик асосларини кўриб чиқишни талаб этмоқда. Энг муҳими, бу борадаги имкониятлардан самарали фойдаланиш, нефть-газ захираларини тежаш, мақсадли ишлатиш масалалари парламент ва жамоатчилик назоратининг доимий ишига айланиши зарур.

Йиғилиш якунида муҳокама этилган масалалар юзасидан тегишли тавсиялар ишлаб чиқилди.

 

Лазиза ШЕРОВА,

«Ўзбекистон овози» мухбири.



DB query error.
Please try later.