02.05.2017

ИККИНЧИ ЖАҲОН УРУШИ

Ғалаба ва Тинчлик қон ва жон эвазига келганини, унда ўзбек халқининг ҳам улкан ҳиссаси борлигини қуйидаги тарихий ҳужжатлар ҳам тасдиқлайди

Дарҳақиқат, Иккинчи жаҳон урушида эришилган Буюк ғалабага ўзбек халқининг асл ўғил-қизлари жанг майдонларида кўрсатган мардлиги ва матонати, жасорати ва фидойилиги билангина эмас, фронт ортидаги мардонавор меҳнати ва мисли кўрилмаган саховати билан ҳам улкан ҳисса қўшдилар.

 

УРУШ ҲАҚИҚАТЛАРИ

Статистик ҳисоботларга қараганда, Иккинчи жаҳон уруши арафасида, яъни 1940 йилда Ўзбекистоннинг умумий аҳолиси 6,5 миллиондан сал ошиқроқ бўлган. Шундан 3 миллион 387 мингини эркаклар ташкил қилган. Уларнинг 1,5 миллиони урушга сафарбар қилинган. Ярим миллионга яқин юртдошларимизга Ватанни қайта кўриш насиб этмаган, уларнинг ҳоклари Европа мамлакатларининг тупроғида қолган.

Беш йилдан ортиқ давом этган қирғин баротлардан омон чиққан бир миллиондан ошиқ ўзбекистонликнинг баъзилари қариндош-уруғлари бағрига ногирон, яримжон ҳолда қайтган. Уларнинг соғ­лиқларини тиклашлари, турмушларини ўнглаш­лари учун бир неча йиллар керак бўлган албатта.

Шунга қарамасдан, собиқ жангчилар юртнинг издан чиққан иқтисодиётини тиклаш, уруш асоратларини тугатиш, халқ­нинг турмушини ўнглаш йўлида ғайрат ва шижоат намунасини кўрсатдилар.

Қақшатқич жанглар кетаётган кезларда фронт ортида меҳнат қилиб, Ватан ҳимоячиларига қурол-яроғ, озиқ-овқат, кийим-кечак етказиб берган ўзбекистонликларнинг ҳиммати ва саховати таҳсинга лойиқдир.

 

142 МИЛЛИОН 265 МИНГ СЎМ МАБЛАҒ ТЎПЛАНДИ

13 декабргача республика Давлат банкининг бўлимларига танк колоннаси ва авиаэскадрилья қуриш учун меҳнаткашлардан 142 миллион 265 минг сўм маблағ тушди.

Самарқанд областида 29 миллион 587 минг сўм, Тошкент областида (Тошкент шаҳри билан бирга) 27 миллион 817 минг сўм, Хоразм областида 18 миллион 647 минг сўм, Фарғона областида 18 миллион 588 минг сўм, Наманган областида 14 миллион 9 минг сўм, Қорақалпоғистонда 14 миллион 836 минг сўм, Бухоро областида 7 миллион 983 минг сўм, Сурхондарё областида 6 миллион 910 минг сўм, Қашқадарё областида 2 миллион 594 минг сўм тўпланди.

Маблағ тўплаш давом этмоқда.

«Қизил Ўзбекистон» газетаси (ҳозирги «Ўзбекистон овози»), 15 декабрь 1944 йил.

№ 246 (6158).

 

ЎЗБЕК ЖАНГЧИЛАРИНИНГ ЖАСОРАТИ

«Немис-фашист йиртқичларига қарши олиб борилаётган улуғ Ватан уруши кунларида Ўзбекистон меҳнаткашлари улуғ юртимизнинг содиқ ватанпарварлари эканликларини яққол кўрсатдилар...

Ишчилар ва колхозчилар кўпгина озиқ-овқат ва юз минглаб комплектдан иборат иссиқ кийимлар тўплаб, уларни ўнларча эшелонларга ортиб, фронтга юбордилар. Танк колоннаси ва авиаэскадрильяси қурилиши учун 450 миллион сўм маблағ тўпланди...

Ўзбек халқи шу кунларда Армиянинг қудратини янада ошириш учун танк колоннаси ва авиаэскадрилья қуриш учун яна маблағ тўплашга киришди. Қисқа муддат ичида Ўзбекистон колхозчилари, ишчилари ва интеллигентлари ўзларининг жамғарган маблағларидан шу мақсад учун 170 миллион 531 минг сўм тўпладилар...

Ватан урушининг оғир кунларида немис галалари Украи­на ва Белоруссия ерларига бостириб кирган, Москва ва Ленинградга хавф солган вақтда меҳмондўст ўзбек хал­қи юз мингларча кўчиб келган совет гражданларига бошпана берди. 35 мингдан ошиқ бола интернат ҳамда болалар уйларига жойлаштирилди, йўқолган ота-оналари ўрнига ота ва она бўлган меҳнаткашлар оилалари бу болаларни ўз бағриларига олдилар...

Қўлига қурол олиб ватанимизнинг ор-номусини, озодлигини ва мустақиллигини ҳимоя қилиш учун ўзбек хал­қи ўзининг энг яхши фарзандларини Қизил Армияга жўнатди. Ўзбек йигитлари рус, белорусь, украин, грузин, озарбайжон ва бош­қа халқлар ўртасидан чиққан аскарлар билан бир ёқадан бош чиқариб, Ватан уруши фронтларида жанг қилмоқдалар...

Даҳшатли жангларда ўзбек жангчилари юзлаб немис бос­қинчиларини қириб ташладилар ва ўз номларини шон ва шараф билан қопладилар...

Уруш бошидан буён 24 минг 185 ўзбек жангчиси ва офицери орден ва медаллар билан мукофотланди, 50 га яқин ўзбек жангчиси ва командири Совет Иттифоқи Қаҳрамони деган юксак унвонни олишга сазавор бўлдилар. Бу қаҳрамонларнинг ҳаммаси урушгача тинч меҳнат билан шуғулланиб келган эдилар. Ватанга муҳаббат ва душманга нафрат уларни қаҳрамонлик зафарларига илҳомлантирди».

(Ўзбекистон ССР Халқ Комиссарлар Советининг раиси Абдулла Абдураҳмоновнинг маърузасидан.)

«Қизил Ўзбекистон» газетаси,

24 декабрь 1944 йил.

№ 253 (6165).

 

Фашизм устидан ғалаба қозонишда мардлик ва матонат кўрсатган 338 нафар юртдошимиз юксак мукофот — қаҳрамонлик унвонига сазовор бўлган эди.

Фронтга — жангчиларга совға жўнатиш пайти – 1942 йил.

«Ўзбекистон» деб номланган бронепоезд урушга жўнатилмоқда.

Уруш кетаётган ўлкалардан олиб келинган минглаб болаларни Ўзбекистон ўз бағрига олди.

 

«Ўзбекистон овози» мухбири

Бахтиёр РИЗАЕВ

тайёрлади.



DB query error.
Please try later.