02.05.2017

ТАРҒИБОТЧИЛАР ГУРУҲИ

Ҳаракатлар стратегияси ижтимоий аҳамиятини аҳолига етказишда
муносиб ўрин тутади

Пойтахтимизда Ўзбекистон Халқ демократик партияси Марказий Кенгаши «2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида белгиланган вазифаларнинг ижтимоий аҳамиятини тарғиб қилишга доир долзарб вазифалар» мавзусида давра суҳбати ўтказди.

Унда партия Марказий Кенгаши масъул ходимлари, Олий Мажлис Қонунчилик палатасидаги фракцияси аъзолари, Тошкент шаҳар ва Тошкент вилоят кенгаши фаоллари иштирок этди.

Таъкидландики, бугун мамлакатимизда давлат ва жамиятни ҳар томонлама жадал ривожлантириш, умум­эътироф этилган демократик қоида ва талабларни изчил жорий қилиш, инсоннинг устувор ҳуқуқ ва манфаатларини таъминлаш борасида кенг кўламли ишлар олиб борилмоқда.

Бундан аҳолининг хабардорлиги, мазмун-моҳиятини тушуниб етиши ислоҳотларнинг янада самарадорлигини таъминлашга хизмат қилади.

Шу мақсадда Ҳаракатлар стратегиясининг бешта йўналиши бўйича партия ташкилотлари қошидаги тарғибот гуруҳлари таркибига малакали мутахассислар, олимларни жалб этган ҳолда такомиллаштириш масаласига алоҳида эътибор қаратилди.

Назира МАТЁҚУБОВА, Ўзбекистон ХДП Марказий Кенгаши бўлим бошлиғи:

— Ҳаракатлар стратегия­сида мамлакатимизда олиб борилаётган ислоҳотлар самарадорлигини тубдан ошириш ва ҳаётимизнинг барча соҳаларини эркинлаштиришга қаратилган эзгу мақсадлар белгиланган. Шу билан бирга, тар­ғибот билан боғлиқ бир қатор вазифаларга ҳам эътибор қаратилган.

Ўтган уч ой давомида Ҳаракатлар стратегиясига бағишланган 140 тадбир ўтказилган. Уларнинг 2 таси Марказий Кенгаш, 14 таси минтақавий кенгашлар, 125 таси туман-шаҳарлар даражасида ташкил этилган. Тадбирлар самарадорлиги энг аввало, тарғиботчилар гуруҳлари фаолиятига боғлиқ.

Хўш, бугун уларнинг таркиби қандай? Буни чуқур ўрганиб чиққан ҳолда, Ҳаракатлар стратегия­сининг бешта йўналиши бўйича малакали мутахассислар, ҳуқуқшунослар, иқти­содчилар, ижтимоий соҳа ходимлари, олимлар ва экспертларни тарғибот гуруҳларига киритишимиз лозим бўлади.

Нурмуҳаммад ҚАРШИЕВ, Ўзбекистон ХДП Бектемир туман кенгаши раиси:

— Президентимиз 2017 йилни юртимизда «Халқ билан мулоқот ва инсон манфаатлари йили» деб эълон қилганида, аҳоли билан доимий мулоқот қилиш, уларни қийнаётган муаммоларни ҳал этишнинг янги механизмлари ва самарали усулларини жорий этиш кераклигини алоҳида уқтириб ўтган эди. Бу барча даражадаги раҳбарлар, депутатлар, хусусан, партия ташкилотлари олдига ҳам янги талабларни қўйди.

Бугун бу борада амалга оширилаётган ишлар кенг жамоатчилик томонидан кўтаринки руҳ, миннатдорлик билан қабул қилинмоқда. Аҳоли вакиллари билан ўтказган учрашувларимизда ҳам бунга яққол амин бўлаяпмиз. Одамлар Ҳаракатлар стратегиясини тараққиётимиз кафолати сифатида юксак баҳоламоқда.

Бизнинг олдимизда ҳам масъулиятли вазифалар турибди. Халқ депутатлари маҳаллий Кенгашларидаги партиямиз гуруҳлари аъзолари билан ҳамкорликда ушбу муҳим ҳужжатнинг мазмун-моҳиятини аҳолига кенг тушунтириш бўйича тарғибот ишларини изчил йўлга қўйишимиз, унинг ижросида ҳар биримиз фаол қатнашишимиз талаб этилади.

Муҳриддин ҲАМЗАЕВ, ЎзХДП Олмалиқ шаҳар кенгаши раиси:

— Бугун юртимизда жамият ҳаётининг барча жабҳасини янада ислоҳ қилиш, одамлар турмуш даражасини ошириш, аҳоли, айниқса, ёшлар бандлигини таъминлаш юзасидан аниқ чора-тадбирлар амалга оширилмоқда.

Бу борада Ҳаракатлар стратегиясида ҳам аниқ вазифалар белгиланган. Дар­ҳақиқат, ҳар қандай давлат бандлик масаласида барқарорликка эришиши учун пухта ишлаб чиқилган иқтисодий ислоҳотларни амалга ошириши талаб этилади. Жорий йилда ишсизлик даражаси энг юқори бўлган минтақаларда кўплаб янги иш ўринлари ташкил этиш, тадбиркорлик фаолиятини бошлаш учун таълим муассасалари битирувчиларига кредитлар ажратиш режалаштирилмоқда. Бу ёшларнинг ўзига бўлган ишончини янада оширишга хизмат қилади, албатта.

Давра суҳбатида «Ўзбекис­тон овози» ва «Голос Узбекис­тана» газеталари Бош муҳаррири Сафар Остонов, ЎзХДП Марказий Кенгаши бўлим бошлиғи Боймурод Юсупов, Тошкент вилоят партия кенгаши раиси ўринбосари Шерали Қутлимуротов, ЎзХДП «Ёшлик» талабалар шаҳарчаси раиси Муҳаббат Абдуллаева ва бошқалар сўзга чиқиб, Ҳаракатлар стратегияси тарғиботининг самарали шакл ва усулларидан фойдаланиш, бу борада янги ғоялар, мавзулар ва шиорларни илгари суриш, партия ташкилотлари ташаббускорлигини ошириш бўйича ўз фикр-мулоҳазаларини билдиришди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.