13.04.2017

УЛУҒ ИНСОНГА ЭҲТИРОМ

Сурхондарё вилояти Ахборот-ресурс марказида Ўзбекистон Ёзувчилар уюшмаси ҳамда Ўзбекистон Журналистлари ижодий уюшмаси вилоят бўлимлари ҳамкорлигида атоқли давлат арбоби ва ёзувчи Шароф Рашидов таваллудининг 100 йиллигига бағишланган хотира кечаси ўтказилди.

Президентимиз Шавкат Мирзиёевнинг 2017 йил 27 мартдаги «Атоқли давлат арбоби ва ёзувчи Шароф Рашидов таваллудининг 100 йиллигини нишонлаш тўғрисида»ги қарори ижроси доирасида ташкил этилган тадбирда шоир ва ёзувчилар, педагоглар, ўқувчи-ёшлар иштирок этди.

Тадбирда собиқ тузумнинг ўта қалтис ва мураккаб даврида республикамиз раҳбари бўлган, миллий маданиятимиз ва адабиётимиз равнақига улкан ҳисса қўшган Шароф Рашидов ўзининг фидокорона меҳнати, ибратли ҳаёт йўли, ижтимоий-ижодий фаолияти билан халқимиз қалбидан чуқур ўрин олгани алоҳида таъкидланди.

Сурхондарёликлар ҳам Шароф ­Рашидовнинг вилоятни ривожлантириш йўлида амалга оширган бунёдкорлик ишлари, инсонпарварлик фазилатлари ҳақида фахр билан сўзлайди. Вилоятда янги каналлар барпо этиш, чўл ҳудудларини ўзлаштириш, аҳоли ва экин майдонларининг сув таъминотини яхшилашга муносиб ҳисса қўшганини алоҳида миннатдорлик билан эслайди.

— Меҳр-оқибатли халқмиз, — дейди Ўзбекистон Ёзувчилар уюшмаси вилоят бўлими раҳбари М.Алламуродов. — ­Бундай юксак фазилат халқимизнинг юрт равнақи йўлида хизмат қилган фарзандларини унутмаслиги, уларнинг фидокорона меҳнатини юксак қадрлашида ҳам яққол намоён бўлади. Собиқ тузум даврида марказнинг кўрсатмаси билан баъзи «шахс»лар Шароф Рашидовга хос бўлмаган ноўрин гап-сўзлар айтишга, номини ёмонотлиқ қилишга ҳаракат қилди. Лекин халқимиз содиқ фарзандининг хотирасини авайлаб-асради, инсонпарварлик фазилатларини унутмади. ­Мустақиллик шарофати билан номи қайта тикланди. Биз улуғ юртдошимизни нафақат атоқли давлат арбоби, балки ­Ватанга муҳаббат, эл-юртга садоқатни, сабр-қаноат, матонат ва ҳалолликни тараннум этган кўплаб асарлар муаллифи сифатида ҳам яхши биламиз. Жойларда ташкил этилаётган хотира кечалари ва учрашувларда кекса авлод вакиллари Шароф Рашидовнинг ибратли ҳаёт йўли ва сермаҳсул ижодий фаолияти хусусида ёш авлодга сўзлаб бермоқда.

Тадбирда адиб асарларидан намуналар ўқилди, куй-қўшиқлар янгради.

 

Х.МАМАТРАЙИМОВ,

ЎзА мухбири.



DB query error.
Please try later.