08.04.2017

«УЗОҒИМИЗ ЯҚИН БЎЛДИ»

Президентимизнинг 2017 йил 10 январдаги «Аҳолига транспорт хизмати кўрсатиш ҳамда шаҳарлар ва қишлоқларда автобусларда йўловчилар ташиш тизимини янада такомиллаштириш чора-тадбилари тўғрисида»ги қарори ижросини таъминлаш мақсадида 2017-2021 йилларда Навоий вилоятида 49 янги йўналишда қатнов амалга оширилади. Бунинг учун 83 та янги автобуслар харид қилинади.

Йўловчиларга хизмат кўрсатишни яхшилаш мақсадида ­Учқудуқ, Навбаҳор ва Қизилтепа туманларида 3 янги автобекатлар қурилиб, «Навоий автовокзали» қайта реконструкция қилиниши режалаштирилган.

— Жорий йилда 18 янги йўналиш очилади, — дейди Ўзбекис­тон автомобиль ва дарё транспорти агентлигининг ­Навоий вилояти бўлими бошлиғи Вали Адизов. — Шундан 6 таси Навбаҳор, Конимех, Зарафшон, Учқудуқ, Хатирчи, Қизилтепа тумани аҳолисига хизмат кўрсатади. Яқин кунларда «Навоий — Хатирчи», «Навоий — Мирдош», «Хатирчи — Зарафшон», «Учқудуқ — Қулқудуқ» йўналишлари фаолият бошлайди.

Йўловчиларга сифатли хизмат кўрсатишни таъминлаш мақсадида автобус ва микроавтобусларнинг ишини масофадан онлайн режимида (GPS) доимий кузатишни ташкил этиш ҳамда Навоий шаҳрида автобусларда нақд пулсиз тўловни амалга ошириш тизимини жорий қилиш бўйича тармоқ жадвали ишлаб чиқилган.

— «Қулқудуқ» овул фуқаролар йиғини вилоятимиз марказидан қарийб 480 километр олисда жойлашган, — дейди халқ депутатлари Учқудуқ туман Кенгаши депутати Нурлибай­ ­Тешканбаев. — Автобуслар охирги бекатгача етиб бормаслиги туфайли қийинчиликларга дуч келардик. Энди узоғимиз яқин бўлди.

 

Илҳом САТТОРОВ,

 «Ўзбекистон овози» мухбири.



DB query error.
Please try later.