06.04.2017

ОЁҚ КИЙИМ ХАРИД ҚИЛИШДА НИМАЛАРГА ЭЪТИБОР БЕРИШ КЕРАК?

Пойтахтимиздаги Ёшлар ижод саройида «Чарм, пойабзал, кийим ва аксессуарлар» VI халқаро кўргазмаси бўлиб ўтмоқда. «Ўзбекчармпойабзали» уюшмаси томонидан ташкил этилаётган кўргазмада мамлакатимизда фаолият кўрсатаётган 80 дан ортиқ ҳамда хорижий давлатларнинг 20 га яқин корхона ва ташкилотлари 2500 дан ортиқ маҳсулотлари билан иштирок этмоқда.

— «Exсel» бренди остида эркаклар пойабзали ишлаб чиқарамиз, — дейди «Exсellent East»масъулияти чекланган жамияти директори Фазлиддин Мухторхўжаев. — Иш бошлаганимизга 10 йилдан ошди. Бу муддат давомида пойабзал соҳасида етарлича тажриба орттирдик ва ҳозиргача ҳам ўрганяпмиз. Маҳсулот ишлаб чиқаришда биринчи нав­батда унинг сифатига эътибор қаратамиз. Қолган нарсалар кейинги ўринда туради. Сифатли оёқ кийим ишлаб чиқариш учун аъло даражадаги хомашё зарур. Дастлаб ишни 3 киши билан бошлаганмиз. Ишимиз юришиб, тажрибамиз ошгандан сўнг бизнесимизни кенгайтириш мақсадида кредит олдик, яна қўшимча янги иш ўринлари яратилди. Давлатимиз томонидан чарм пойабзал соҳасини ривожлантириш учун бир қатор имтиёзлар белгиланган. Хусусан, турли хил солиқлардан озод қилинганмиз. Баъзи бир маҳсулотларни кўраман, усти томони сифатли бўлади. Лекин таг қисми аксинча. Аслида биринчи навбатда унинг тагига аҳамият бериш керак. Тананинг оғирлигини кўтарадиган жой бу таг қисми. Бу қисмдаги резина талабга жавоб бериши лозим. Сифатсиз хомашёдан фойдаланиш натижасида пойабзал йидирилиб ҳам, синиб ҳам кетади. Бренд ўз-ўзидан келиб чиқмайди. Унинг тагида катта меҳнат ётади. Сифатли маҳсулот ­ишлаб чиқарсангиз, уни харидор қабул қилади ва у ўз-ўзидан брендга айланади...

— Болаларга мўлжалланган эллик турдан зиёд ортопедик оёқ кийимлар ишлаб чиқарамиз, — дейди «Эркатой болажон» масъулияти чекланган жамияти технологи Муҳаббат Норова. — Шифокорлар бола оёғининг яссилигига қараб тавсия беришади. Биз шу асосида ортопедик оёқ кийимлар тайёрлаймиз. Уларнинг нархи ҳам ҳамёнбоп.

Мазкур кўргазмада замонавий дизайн асосида яратилган янги маҳсулотларнинг мода намойишини ўтказиш, чет эллик иштирокчиларни республикамиздаги ишлаб чиқариш корхоналари фаолияти билан таништириш каби йўналишларга алоҳида эътибор қаратилмоқда.

Кўргазма доирасида Россия Федерациясининг Чарм ва пойабзал ишлаб чиқариш уюшмаси ва Қозоғистон Республикасининг Енгил саноат маҳсулотлари ишлаб чиқариш уюшмаси билан ўзаро ҳамкорлик қилиш бўйича халқаро форум ўтказилади.

Кўргазма якунида бир қатор номинациялари бўйича ғолиблар аниқланади.

«Чарм, пойабзал, кийим ва аксессуарлар» VI халқаро кўргазмаси бугун якунига етади.

 

Шаҳбоз САИДОВ,

«Ўзбекистон овози» мухбири.



DB query error.
Please try later.