30.03.2017

РЕАБИЛИТАЦИЯ: СИФАТ ВА САМАРАДОРЛИК

Соғлиқни сақлаш вазирлигига қарашли Самар­қанд вилоят ногиронларни реабилитация қилиш марказида даволаш-соғломлаштиришнинг янги усуллари жорий этилган бўлиб, тиббий-ижтимоий реа­билитация хизматларини янада яхшилашга доимий эътибор қаратилмоқда.

— Ногиронларни ижтимоий муҳофаза ва реабилитация қилиш масаласи барчамиздан алоҳида ёндашувни, масъулиятни талаб қилади, — дейди марказ директори Давронбек Жуманиёзов. — Илгари мазкур муассасага тиббиётда бир марта ишлатиладиган буюмлар марказлаштирилган ҳолда келтирилмас эди. Ҳозир бундай ҳолга чек қўйилди. Бир қатор керакли мутахассисликлар учун янги штатлар жорий этилиб, тажрибали шифокорлар жалб этилди.

Марказдаги муҳим янгиликлардан бири — яқинда олиб келинган замонавий тиббий ускуналар ёрдамида йирик бўғимлар касаллигини янгича усулда даволашга ўтилди. Бундан ташқари, бюджет ва бюджетдан ташқари маблағлар ҳисобига яна бешта замонавий тиббий ускуна харид қилиниши натижасида марказ физиотерапия бўлими тўлиқ янгиланди.

Марказ ўтган йили Япония элчихонасининг кичик ҳажмдаги беғараз ёрдам дастуридаги грантни қўлга киритди. Бунинг эвазига 109,5 минг АҚШ долларига саккизта замонавий тиббий аппарат олиб келинди. Ҳозир бу ерда озонатерапия, игнатерапия, оксигенатерапия сингари ноанъанавий даволаш усуллари кенг қўлланиляпти.

Марказда яратилган шарт-шароит­лар ҳақида беморларнинг фикрларига қулоқ тутдик:

Ойша Турдиқулова, Пастдарғом тумани:

— Бир муддат шу марказда даволанишимга тўғри келди. Яратилган шарт-шароитлар менга маъқул. Айниқса, врачлар ва ҳамшира Мастура Ибодованинг муо­маласи, иш услуби ёқди. Улардан миннатдорман.

Сабоҳат Жабборова, Ургут тумани:

— Шифокорлар замонавий тиббий жиҳозлардан жуда усталик билан фойдаланишади. Бу ердан жуда кўп беморлар, ногиронлар шифо топиб кетишяпти.

Умида Самадова, Самарқанд шаҳри:

— Врачлар Фарҳод Ботиров ва Ўктам Эшонқулов, ҳамшира Санобар Сувоновалардан жуда миннатдорман. Улар менинг соғлиғимни тиклаш йўлида жон куйдиришди. Биз учун шунчалик шарт-шароитларни яратаётган давлатимизга раҳмат.

 

Абдурасул САТТОРОВ,

«Ўзбекистон овози» мухбири.



DB query error.
Please try later.