25.03.2017

ИЖТИМОИЙ ҲИМОЯНИ КУЧАЙТИРИШ — ФАОЛИЯТИМИЗНИНГ УСТУВОР ЙЎНАЛИШИ

Ўзбекистонда ижти­моий соҳага эътиборни кучайтириш, манзилли ижтимоий ҳимояни кафолатлаш давлат сиёсатининг асосий устувор йўналишларидан биридир. Мамлакатимизни тараққий эттиришнинг миллий модели асосини ташкил қиладиган беш тамойилнинг бири ҳам кучли ижтимоий сиёсат юритишдан иборат. Мазкур тамойил асосида мустақиллик йилларида мамлакатимизда беқиёс ишлар амалга оширилди.

Ўтган давр мобайнида бу борада қатор қонунлар ишлаб чиқилди, қарорлар қабул қилинаяпти, давлат дастурлари амалга оширилмоқда. Энг муҳими, шу тариқа одамларимизнинг ҳаётга муносабати ўзгариб, яхши яшашга интилиши кучайиб бораяпти.

2017 йил 2 февралда қабул қилинган Ўзбекис­тон Республикаси Президентининг иш ҳақи, пенсия, нафақа ва стипендияларни тўлаш механизмини такомиллаштиришга доир қўшимча чора-тадбирлар тўғрисидаги қарори бу борада муҳим аҳамият касб этди. Унда иш ҳақи, пенсия, нафақа ва стипендияларни тўлаш тизимини тубдан такомиллаштириш, пен­сионерлар, талабалар ва аҳолининг бошқа ижтимоий эҳтиёжманд ­қатламлари ҳуқуқ ва қонуний манфаатлари ҳимоясини сўзсиз таъминлаш алоҳида белгилаб берилди. Олдимизда турган энг муҳим вазифа эса унинг ижросини ­қатъий таъминлашдан иборат. Бу жараёнда партиямиз ташкилотлари, барча даражадаги партия гуруҳлари фаол иштирок этишга ҳаракат қилмоқда. Ҳар бир депутат ўз сайлов округида ижтимоий кўмакка муҳтож фуқароларни манзилли қўллаб-қувватлаш масалаларини доимий равишда ўрганиб бормоқда.

Жумладан, пенсионерлар, ногиронлар, ота-она қарамоғидан маҳрум бўлган болалар ва аҳолининг меҳнатга лаёқатсиз бошқа ижтимоий гуруҳлари ҳаётий ­эҳтиёжлари тўлиқ қондирилишини кафолатловчи пенсия таъминоти ва ижтимоий нафақаларнинг самарали тизимини шакллантириш билан боғлиқ масалалар юзасидан депутатлик назорати олиб бориляпти. Уларнинг аксарияти халқ депутатлари маҳаллий Кенгашлари сессиялари, партия гуруҳлари ва доимий комиссиялар йиғилишларида муҳокама этилмоқда.

Масалан, халқ депутатлари Қашқадарё вилоят, туманлар ва Қарши шаҳар Кенгашларидаги партиямиз гуруҳлари ташаббуси билан охирги икки йил мобайнида доимий комиссияларда 25 масала ҳамда сессияларда 4 масала муҳокама этилди. Сессияларда мансабдор шахсларнинг ҳисобот ва ахборотларини эшитиш изчил йўлга қўйилди.

Ўтган йилнинг сентябрь ойида Миришкор туманида аҳолининг кам таъминланган қатламларига ижтимоий ёрдам кўрсатиш, пенсия ва нафақаларни ўз вақтида бериш бўйича олиб борилаётган ишларнинг ҳолати тўғрисидаги масала туман Кенгашидаги партия гуруҳи ҳамда доимий комиссиянинг қўшма йиғилишида муҳокама этилиб, тегишли қарор қабул қилинди. Қарор ижроси устидан назорат ўрнатилган.

Шунингдек, Чироқчи туман Кенгашидаги партия гуруҳи уруш ва меҳнат фронти  қатнашчиларига белгиланган имтиёзларни амалга оширишдаги ишларнинг ҳолати тўғрисидаги масалани ўрганиб чиқди. Косон туманидаги депутатларимиз  ижтимоий нафақаларни тайинлаш тартибини янада такомиллаштириш бўйича амалга оширилаётган ишларнинг аҳволи тўғрисидаги масалани атрофлича ўрганди. Унинг натижалари туман Кенгашидаги маҳаллий бюджетни шакллантириш ва ижро этиш, иқтисодий ислоҳотларни амалга ошириш ва тадбиркорликни ривожлантириш масалалари доимий комиссияси ҳамкорлигида кўриб чиқилди.

Бугунги кунда Қашқадарё вилоя­тида 263,4 минг нафар пенсионер бўлиб, шундан 195 минг нафарини ёшга доир, 52,1 минг нафарини ногиронлик, 16,3 минг нафарини боқувчисини йўқотганлик учун пенсия олувчилар ташкил этади.

Ўтган йиллар давомида Ўзбекистон Халқ демократик партияси вилоят ташкилотлари томонидан ижтимоий ҳимояга муҳтож, имконияти чекланган кишилар, пенсионерлар, ногиронлар, иқтисодиётда банд бўлмаган меҳнатга лаёқатли аҳоли ҳамда ишга жойлашишда қийинчиликка дуч келаётган фуқаролар манфаатлари ҳимоясига қаратилган 5 та чора-тадбирлар режаси ва 2 та  лойиҳа ҳаётга татбиқ этилди. 

Масалан, партиямиз тизимида «Кексаларимизнинг фаровон ҳаёти учун масъулмиз», «Тарғиботчи — маҳаллада» лойиҳалари доирасида қатор тадбирлар ташкил этилди. Ёлғиз кексалар, пенсионерлар ҳамда ногиронлар ҳолидан хабар олинди, муаммоларини ҳал этиш бўйича ҳамкор ташкилотлар билан мустаҳкам алоқа ўрнатилди, керак пайтда ҳуқуқий маслаҳатлар берилди.

Бундан ташқари, ушбу йўналишдаги тадбирлар ва ўтказилган мониторинг натижалари ҳудудлар бўйича умумлаштирилган ҳолда маҳаллий Кенгашлардаги партия гуруҳларимиз орқали доимий комиссия ва сессиялар муҳокамасига киритилди, тегишли қарорлар қабул қилинди.

2017-2021 йилларда Ўзбекистон Республикасини янада ривожлантириш бўйича Ҳаракатлар стратегиясининг «Ижтимоий соҳани ривожлантириш» деб номланган тўртинчи йўналишида белгиланган вазифалар партиямиз учун принципиал аҳамиятга эга. Унга кўра, аҳолининг даромадлари бўйича фарқланиши даражасини янада қисқартириш, бюджет муассасалари ходимларининг иш ҳақи, пенсия, стипендия ва ижтимоий нафақаларнинг ҳажмини инфляция суръатларига нисбатан жадал миқдорда босқичма-бос­қич ошириш белгиланган. Ушбу вазифалардан келиб чиқиб, Ҳаракатлар стратегияси, жумладан, жорий йилга мўлжалланган Давлат дастури ижроси устидан депутатлик назоратини изчил олиб боришимиз талаб этилади. 

Ёлғиз кексалар, пенсионерларни ўйлантираётган ижтимоий-иқтисодий муаммоларни ўрганиш, аниқланган масалаларни ҳамкор ва мутасадди ташкилотлар вакиллари орқали ижобий ҳал этиш, шунингдек, мазкур масалалар юзасидан маҳаллий ҳокимият органлари раҳбарларининг ҳисоботларини эшитиш борасида фаоллик кўрсатишимиз керак. Чунки булар партиямиз дастурий мақсадлари ва электорат манфаатларига ҳамоҳангдир.

Мухтасар айтганда, мамлакатимиз тараққиётининг бугунги бос­қичида ёлғиз кексалар ва ногиронларни ижтимоий ҳимоя қилиш масаласи инсон ҳуқуқ ва эркинликларини ҳимоя қилишнинг муҳим омилига айланмоқда. Зеро, инсон шаъни, қадр-қиммати эъзозланган юртда фаровонлик, хотиржамлик, энг асосийси, тинч­лик барқарор бўлади.

 Олим РАВШАНОВ,

Ўзбекистон ХДП Қашқадарё вилоят кенгаши раиси,

халқ депутатлари вилоят Кенгашидаги партия  гуруҳи раҳбари.



DB query error.
Please try later.