14.03.2017

ПЕНСИЯ ТЎЛОВЛАРИ ЎЗ ВАҚТИДА МОЛИЯЛАШТИРИЛМОҚДА

Молия вазирлиги ҳузуридаги бюджетдан таш­қари Пенсия жамғармаси матбуот анжумани ўтказди. Унда жамғарма фаолиятидаги янгиликлар ҳақида ахборот берилди.

— Сўнгги беш йилда пенсия ва нафақа олувчилар сони йилига ўртача 4 фоиздан ўсиб, бугунги кунда 3 миллион нафардан ортиқни ташкил этмоқда, — дейди Молия вазирлиги ҳузуридаги бюджетдан таш­қари Пенсия жамғармаси ижрочи директорининг биринчи ўринбосари Маҳмуджон Зиёдуллаев. — Пенсия ва нафақа пулларининг ўз вақтида етказиб берилишини таъминлаш мақсадида жорий йилнинг февраль ойи учун талаб қилинган маблағлар 17 февраль кунига қадар тўлиқ молиялаштирилди ҳамда нақд шаклда етказиб берилди.

Жамғарма томонидан пенсия ва нафақаларни олувчи шахслар учун SMS-Pensiya интерактив хизмати ишга туширилди. Ушбу хизмат пенсия ва нафақа тайинланиши, унинг тўлов муддатлари ҳақидаги маълумотларни мобиль алоқа воситасида олиш имконини беради.

Иш ҳақи, пенсия, нафақа ва стипендияларнинг ўз вақтида ва тўлиқ тўланишида қонунчилик нормаларига амал қилиниши Ўзбекистон Республикаси Бош прокуратураси томонидан қатъий назоратга олинган. Шунингдек, пенсия ва нафақаларни та­йинлаш ва тўловларнинг ўз вақтида амалга оширилиши устидан назоратни кучайтириш мақсадида (1140 қисқа рақамли) «ишонч телефони» жорий қилинган.

Матбуот анжуманида журналистларни қизиқтирган саволларга Зиёдуллаев жавоб берилди.

Хорижда ишлаган давр иш стажи сифатида ҳисобга олинадими?

 Меҳнат ва аҳолини ижтимоий муҳофаза қилиш вазирлигининг Ташқи меҳнат миграцияси масалалари агентлиги орқали шартнома тузиб, чет элда ишлаётган, Пенсия жамғармасига ўрнатилган тартибда суғурта бадаллари тўлаган фуқароларнинг иш стажи пенсия тайинлашда ҳисобга олинади.

Пенсияга чиққан, лекин бирон ташкилот ёки идорада ишлайдиган пенсио­нер иш ҳақи ва пенсиясини тўлиқ олиши мумкинми?

— Қуйидаги тоифадаги ишловчи пенсионерларга пен­сия­лар тўлиқ миқдорда тўланади:

— уруш ногиронлари ва қатнашчиларига, шунингдек, уларга тенглаштирилган шахс­ларга;

— Иккинчи жаҳон уруши йилларида ҳарбий хизматни ўтаган ёки фронт ортида ишлаган шахсларга;

— I ва II гуруҳ ногиронларига;

— фуқаролар йиғинлари ва маҳаллаларнинг раисларига,

— фуқароларнинг ўзини ўзи бошқариш органларида диний маърифат ва маънавий-ахлоқий тарбия бўйича маслаҳатчи лавозимларида ишловчи пенсионер аёлларга — ёшга доир пенсия олганда;

— Ўзбекистон фахрийларининг ижтимоий фаолиятини қўллаб-қувватлаш «Нуроний» жамғармасининг барча ходимлари — пенсионерларга.

Бундан ташқари, 2014 йил 1 январидан бошлаб фуқаролик-ҳуқуқий тарзидаги шартномалар бўйича ишлайдиган ва қонун ҳужжатлари билан белгиланган ёшга доир пенсияларнинг минимал миқдоридан паст даромад (гонорар, мукофот ва бошқалар) оладиган пенсио­нерларга пенсия тўлиқ миқдорда тўланади.

Қолган барча ишловчи пенсионерларга уларга та­йинланган пенсиянинг 50 фоизи тўланади.

 

Тоштемир ХУДОЙҚУЛОВ,

«Ўзбекистон овози» мухбири.



DB query error.
Please try later.