28.02.2017

СУРХОНДАРЁГА ЯНА БАҲОР КЕЛДИ

Яна баҳор келди, яна оламда,

Ажиб бир гўзаллик, ажиб бир баёт,

Мен сени қутлайман шу улуғ дамда,

Улуғ елкадошим, музаффар ҳаёт!

 

Абдулла Орипов

 

Баҳор фаслларнинг келинчаги. Бунда гуляпроқларнинг муаттар ҳиди, жонбахш елларнинг ажиб шўхлиги, уйғонган ҳаётнинг нафис нафаси қалбларни жунбушга келтиради. Дарахтлар гулга бурканади, қушларнинг оромбахш саси оламни тутади.

Тупроқ ҳидини соғинган бободеҳқон кетмонини олиб, даласига ошиқмоқда. Ким кўчат қадаган, ким ер чопган, ким дарахт бутаган. Бошқаси ариқ қазиган. Барча-барча тириклик ташвишлари билан банд.

Сурхон эли бу йил баҳорни ўзгача энтикиш, соғинч ва янги орзу-умидлар билан кутиб олмоқда. Яратиш, бунёд этиш туйғулари ила яшаётган одамларнинг интилишларида, изланишларида эртанги кунга бўлган ишонч намоён бўлмоқда.

Термиз туманидаги «Gold Agro Fresh» агрофирмаси миришкорлари 434 гектар ерда мавсумий экинлар экиб, 23 миллион долларлик маҳсулотни экспорт қилиш, 2 минг 100 кишини иш билан таъминлаш, 100 гектар ерда интенсив боғ яратишни мақсад қилишган.

Ангор туманидаги мева-сабзавот етиштириш, сақлаш ва қайта ишлашга ихтисослаштирилган «Angor Gold Fruits» масъулияти чекланган жамиятида 530 гектар майдонда интенсив боғ яратилаётган бўлса, Жарқўрғондаги «Файзулло стройсервис» корхонасида мева-сабзавотларнинг ноанъанавий турларига эътибор қаратилмоқда.

Сурхондарё вилояти иқтисодиётини барқарор ривожлантириш, одамлар даромадини кўпайтириш мақсадида Президентимиз тавсия­си билан қўшимча 10 гектар майдонга анор ва лимон экиш ишларига ҳозирлик кўрилмоқда. Мутахассисларнинг ҳисоб-китобига қараганда, бир сотих ерга лимон экиш учун 5 миллион сўм харажат қилинади. Йил якунида барча чиқимлардан ташқари 20 миллион сўмдан ортиқ даромад олинади. Агар қишлоқ жойларда одамларнинг томорқаси 20-30 сотих эканлигини инобатга олсак, ўртача 4 сотих лимон экилган майдондан бир йилда 100 миллион сўм атрофида фойда кўриш имкони мавжуд.

— Паррандачилик кони фойда, — дейди меҳнат фахрийси Равшан Мамарайимов. — Мен узоқ йиллар Бойсун туманидаги мактабда ўқитувчилик қилдим. Ишдан бўш вақтларда томор­қамда деҳқончилик билан шуғулланардим. Товуқ боқардим. Бир кунда 100 товуқдан ўртача 60-70 дона тухум олганмиз. Мен хонадонларда товуқ боқиш масаласи тўғри кўтарилди, деб ўйлайман.

Вилоятда балиқчиликни ривожлантириш борасида ҳам катта микониятлар мавжуд. Бироқ бир муддат ана шу тармоққа эътибор берилмади. Масалан, вилоятда 1990 йилда минг тонна балиқ етиштирилган бўлса, 2002 йилга келиб бу кўрсаткич беш олти баравар камайиб кетди. Узун туманидаги «Ат-Термизий», «Абу Ҳурайра», «Шерали­бобо» ҳамда «Азизбобо» фермер хўжаликлари деярли оқсаб қолди. Натижада «Сурхонбалиқ» акциядорлик жамияти санацияга учраб, банкрот деб эълон қилинди.

Бугунги кунда халқимизни балиқ маҳсулотлари билан таъминлаш мақсадида, ана шу тармоққа қайтадан эътибор берилмоқда. «Ипотека банк» томонидан 51 балиқчилик хўжаликларига 6,5 миллиард сўм кредит ажратилди.

Вилоятдаги мавжуд 186 балиқчилик хўжаликлари сафига «Термизагрофишэкспорт» агрофирмаси ҳам қўшилди. Бу ерда балиқ етиштириш билан бирга, балиқ учун озуқа ишлаб чиқариш, балиқ маҳсулотларини экспортга йўналтириш ишлари амалга оширилади.

Балиқчилик корхоналарида Вьетнам технологиялари асосида Африка лаққаси, карп каби балиқлар етиштирилади. Мутахассислар фикрига қараганда, ушбу технология асосида интенсив балиқ боқиш маҳсулот етиштиришни 4-5 бараварга оширади. Комплексда 500 тонна балиқни қайта ишлаш, 105 иш ўрни яратиш режалаштирилган.

Ўлкамизга яна баҳор келди. Деҳ­қонлар бу йилги баҳорни янги-янги режалар билан кутиб олмоқда. Улар тадбиркор ва фермерларга яратилаётган имкониятлардан руҳланиб, меҳнат қучоғига ошиқмоқда. Буни уларнинг ғайрат ва шижоати, кайфиятидан ҳам билса бўлади.

 

...Баҳоринг муборак бўлсин ушбу дам,

Менинг Ўзбекистон — дилбар ватаним.

 

Абди ҚОДИРОВ,

 «Ўзбекистон овози» мухбири.



DB query error.
Please try later.