28.02.2017

АДЛИЯ ВАЗИРЛИГИДА ОЧИҚ МУЛОҚОТ

Адлия вазирлигида «Халқ билан мулоқот ва инсон манфаатлари йили» Давлат дастурида белгиланган вазифаларнинг мазмун-моҳиятига бағишланган матбуот анжумани ўтказилди.

Унда «Ўзбекистон Республикасини янада ривожлантириш бўйича Ҳаракатлар стратегияси тўғрисида»ги Президент фармонининг аҳамия­ти, унда белгиланган устувор йўналишлар, жорий йилга мўлжалланган дастурнинг мазмун-моҳияти, мақсад ҳамда вазифалари тўғрисида маълумотлар тақдим этилди.

Давлат дастурига киритилган тадбирлар тўлиқ, ўз вақтида ва сифатли бажарилишини назорат қилиш Ҳаракатлар стратегияси бешта йўналишининг ҳар бири бўйича тузилган комиссиялар зиммасига юклатилади. Ушбу комиссиялар нафақат юқорида қайд этилган вазифаларни амалга оширади, балки тегишли йиллик давлат дастурлари лойиҳаларини тайёрлашда ҳам қатнашади.

Бугунги жараёнлар аҳолида фаол фуқаролик позициясини кучайтириш, жамиятда ҳуқуқий маданиятни изчил юксалтириб боришни тақозо этаётир. Бунинг учун халқимизни ва ижрочиларни янги қабул қилинаётган қонунлар, фармон ва қарорлар билан ўз вақтида таништириб бориш зарур.

Мулоқот асносида тадбир иштирокчиларининг эътибори Президентимизнинг «Қонун ҳужжатларини тар­қатиш тизимини тубдан такомиллаштириш чора-тадбирлари тўғрисида»ги қарорига қаратилди. Мазкур ҳужжат ҳуқуқий ахборотни тарқатиш ва ҳуқуқий тарғибот ўтказишнинг амалдаги тизимини танқидий таҳлил қилиш асосида ишлаб чиқилгани таъкидланди. Унда янги қабул қилинган қонунлар ва бош­қа норматив ҳужжатларни тарқатишнинг ягона тартибини ўрнатиш, уларнинг моҳияти ва аҳамиятини аҳоли ўртасида тушунтириш назарда тутилмоқда. Анжуманда ҳуқуқий ахборот тарқатишнинг янги механизм­ларидан самарали фойдаланиш масалалари ҳақида ҳам сўз юритилди.

Очиқ мулоқот тарзида ўтган учрашувда журналистларни қизиқтирган масалалар юзасидан мутахассисларнинг жавоблари эшитилди.

 

Ўз мухбиримиз.



DB query error.
Please try later.