Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
11.02.2017

ЎЗБЕКИСТОННИ РИВОЖЛАНТИРИШНИНГ ҲАРАКАТЛАР СТРАТЕГИЯСИ

бешта устувор йўналиш асосида мамлакатимиз тараққиётини янги босқичга кўтаради

Президентимизнинг «Ўзбекистон Респуб­ликасини янада ривожлантириш бўйича Ҳаракатлар страте­гияси тўғри­сида»ги фармони бутун халқимиз томонидан кўтаринки руҳда, қизғин кутиб олинди. Мазкур ҳужжат халқимиз хоҳиш-истакларини ўзида мужассам этгани билан ҳам алоҳида аҳамият касб этади. Бугунги кунда ушбу стратегиянинг мамлакатимиз тараққиёти, аҳоли фаровонлигини оширишдаги ўрни ҳақида кўплаб фикр-мулоҳазалар билдирилмоқда.

 

1

 Шерзод ЗУЛФИҚОРОВ, Ўзбекистон Республикаси Президенти ҳузуридаги Давлат бошқаруви академияси кафедра мудири, юридик фанлар номзоди:

— Бу ҳужжатнинг тарихий аҳамияти шундаки, Ҳаракатлар стратегияси лойиҳаси кенг омма муҳокамасига қўйилди. Бундан кўзланган асосий мақсад давлат ва жамият ривожини янги босқичга кўтариш, ислоҳотларни чуқурлаштириш, бу масалада энг аввало, халқимизнинг фикрини билиш бўлди.

Ҳаракатлар стратегиясида бешта устувор йўналиш белгиланган. Биринчи йўналиш давлат ва жамият қурилишини такомиллаштиришга қаратилган. Бунинг замирида инсон ҳуқуқ ва эркинликлари, манфаатларини таъминлашдек эзгу мақсад мужассамлашган.

Президентимиз томонидан инсон манфаатларини таъминлаш, унинг қонуний ҳуқуқларини амалга ошириш масаласига алоҳида эътибор қаратилмоқда. Шундан келиб чиққан ҳолда, Ҳаракатлар стратегиясининг асосий йўналишлари белгиланган. Яъни, шахс, давлат ва жамият узвийлигини таъминлаш биринчи ўринга қўйилган.

Ҳаракатлар стратегиясининг муҳокамаси давомида 1300 дан ортиқ таклиф келиб тушган бўлса, уларнинг асосий қисми мазмунан ушбу ҳужжатда ўз ифодасини топди. Бу аҳолининг сиёсий-ҳуқуқий маданияти ошиб бораётгани, ­эртанги тақдирига бефарқ эмаслигини кўрсатмоқда.

Ҳаракатлар стратегияси беш йил давомида йилма-йил амалга оширилади. Юртимизда йилларга бериладиган номлардан келиб чиқиб, ҳар бир йил бўйича давлат дастурлари қабул қилинишини назарда тутган ҳолда рўёбга чиқарилади.

Мазкур ҳужжатга нафақат мамлакатимизда, балки хорижлик экспертлар томонидан ҳам қизиқиш билдирилмоқда. Унинг қабул қилиниш жараёнига демократиянинг муҳим белгиси сифатида баҳо берилди. Буларнинг барчаси Ўзбекистон тараққиётда янги босқичга кўтарилаётганидан далолат беради.

 

 

2

 Нодира ҲАКИМОВА, Фуқаролик ишлари бўйича Зангиота туманлараро суди судьяси:

— Ҳаракатлар стратегиясининг иккинчи йўналиши қонун устуворлигини таъминлаш ва суд-ҳуқуқ тизимини янада ислоҳ қилишга қаратилган чора-тадбирлардан иборат.

Маълумки, фуқароларнинг ҳуқуқларини ҳимоя қилишда суд тизими муҳим ўрин тутади. Чунки одам бирор муаммога дуч келса, судга мурожаат қилади. Шу боис бу масала иккинчи асосий йўналиш сифатида эътироф этилган. Ҳужжатда судларнинг том маънодаги мустақиллигини таъминлаш, жамоатчилик назоратини кучайтиришга алоҳида эътибор қаратилган.

Судларнинг шаффофлигини таъминлаш аҳоли мурожаатларини ҳал этишнинг янги механизмларини жорий этишни талаб қилади. Шу мақсадда маъмурий судларни, хўжалик судлари тизимида минтақавий апелляция судларини тузиш, ­судья ёрдамчиси лавозимини таъсис этиш орқали судларни келгусида ихтисослашувини ва уларнинг девонини мустаҳкамлаш назарда тутилмоқда.

Бу вазифалар алоҳида белгилаб қўйилиши замирида энг аввало, халқимизнинг қонуний манфаатларини таъминлаш масаласи ётибди.

 

 

3

 Зафар АЗИМОВ, Марказий банк департамент директори ўринбосари:

— Ҳаракатлар стратегиясида белгиланган учинчи йўналиш иқтисодиётни янада ривожлантириш ва либераллаштиришга қаратилган масалаларни ўз ичига олади.

Айтиш керакки, бу борада банк соҳаси олдида ҳам муҳим вазифалар турибди. Хусусан, тадбиркорликни қўл­лаб-қувватлаш, уларни кредит билан таъминлаш фаолиятимизнинг асосий йўналишидир. Биргина 2017 йилда тижорат банклари томонидан тадбиркорлар учун қарийб 17 триллион сўмлик кредитлар ажратилиши кўзда тутилган.

Агар йўналишларга эътибор қаратадиган бўлсак, оилавий тадбиркорлик, ҳунармандчилик учун жорий йилда 650 миллиард сўм, қорамолчилик, эчкичилик, қуёнчилик ҳамда иссиқхоналар ташкил этишга 400 миллиард сўм кредитлар берилиши режалаштирилган.

Аёллар тадбиркорлигини ривожлантириш учун 1 триллион сўм ёки хизмат кўрсатиш ва сервис соҳасини кучайтиришга 1 триллион 2 миллиард сўм кредит ажратилади.

Ҳаракат стратегиясидан келиб чиқиб, жорий йилга мўлжаллаб қабул қилинган ­давлат дастурида яна кўп­лаб масалалар белгиланган. Шулардан бири — 10 мингдан ортиқ касб-ҳунар коллежи битирувчиларини тадбиркорлик фаолиятига жалб этган ҳолда уларга ўз ишини йўлга қўйиш учун кредитлар ажратилишидир. Мамлакатимизда янада кўпроқ битирувчиларга кредит бериш имконияти бор. Фақат бу борада ташаббуслар бўлиши керак. Битирувчиларга бизнес-режаларни тузиш, тадбиркорликнинг самарадор йўналишларини тушунтириш лозим. Ана шунда Ҳаракатлар стратегиясида белгиланган вазифалар ижросини сўзсиз таъминлашга эришамиз, деб ўйлайман.

 

 

4

 Ботир АЛИМУҲАМЕДОВ, Меҳнат вазирлиги илмий маркази директори ўринбосари:

— Ҳаракатлар стратегиясининг тўртинчи йўналиши ижтимоий соҳага қаратилган. Унда аҳолини иш билан таъминлашнинг амалий ва таъсирчан чораларини кўриш бўйича муҳим масалалар белгиланган. Янги иш ўринлари ташкил этишда ҳудудларда саноат лойиҳаларини амалга ошириш, хизмат кўрсатиш соҳаси, қурилиш ва қишлоқ хўжалигини жадал ривожлантириш устувор аҳамият касб этади.

2017 йилда 345 минг барқарор иш ўринлари яратилиши кўзда тутилган. Яна бир муҳим йўналиш аҳолини тадбиркорликка жалб этиш орқали иш ўринлари яратишдир. Жорий йил тадбиркорлик соҳасида 97 минг иш ўрни яратиш режалаштирилган. Қишлоқ ҳудудларида томорқалардан самарали фойдаланиш масаласи ҳам жуда долзарбдир. Эътибор беринг, Ўзбекистонда 3 миллион 500 мингдан ортиқ томорқа бор. Агар оилаларга 100 донадан парранда бериш амалиёти жорий этилса, ҳар бир оила бир йилда қарийб 3 миллион сўм қўшимча даромад олиш имкониятига эга бўлади.

Ҳозирда тижорат банклари ходимлари уйма-уй юриб, аҳолининг эҳтиёжларини ўрганишмоқда. Бу ҳам янги иш ўринлари яратилишига асос бўлади. Яна бир йўналиш кичик корхона ва фермер хўжаликларига турли имтиёзлар бериш орқали иш жойлари очишдан иборат.

Жорий йилда фаолияти тўхтаган корхоналарни тиклаш орқали 44 минг иш ўрни яратиш кўзда тутилган. Ҳар бир иш ўрни одамлар учун имконият, даромад дегани. Шунинг учун Ҳаракатлар стратегиясида аҳоли бандлигини таъминлаш, янги ва барқарор иш ўринлари ташкил этиш масалаларига алоҳида эътибор қаратилган ва бу жуда муҳим, деб ўйлайман.

 

 

5

 Насриддин МУҲАММАДИЕВ, Республика байналмилал маданият маркази раҳбари:

— Мазкур ҳужжатнинг бешинчи йўналиши хавфсизлик, миллатлараро тотувлик ва диний бағрикенгликни таъминлаш, ўзаро манфаатли ва амалий руҳдаги ташқи сиёсат юритиш масалаларини ўз ичига олади.

Албатта, келгуси беш йилликдаги тараққиётимиз концепциясига миллатлараро тотувлик ва диний бағрикенглик масалаларининг алоҳида киритилиши бежиз эмас. Чунки дунёдаги нотинчликлар, қарама-қаршиликлар, диний низолар билан боғлиқ муаммолар ҳамон давом этмоқда.

Мамлакатимизда 130 дан зиёд миллат ва элат вакиллари тинч-тотув яшаб келмоқда. Уларнинг ҳуқуқ ва эркинликларини таъминлаш борасида кўплаб ишлар амалга оширилмоқда.

Ҳозирги таҳликали замон бу йўналишдаги ишларни янги босқичга олиб чиқишни тақозо этади. Шу боис байналмилал маданият маркази ва унинг қошидаги миллий маданий марказларнинг фаолиятини тубдан такомиллаштириш, халқлар ўртасидаги дўстлик ва биродарлик, ҳамкорликни янада кучайтириш, таъсирчан тар­ғибот усулларидан фойдаланиш, айниқса, ёшларимизни миллатлараро тотувлик руҳида тарбиялаш устувор вазифаларимиздан ҳисобланади. Бу ўз навбатида давлатимизнинг жаҳон ҳамжамиятидаги ўрни ва нуфузини янада оширишга хизмат қилади.

 

«Ўзбекистон овози» мухбири

Нурали ОРИПОВ ёзиб олди.


Фикр ва мулохазалар

Защита от автоматических сообщений

Сўнгги янгиликлар: