28.01.2017

БУЮК ИСЛОҲОТЧИ

Мустақил Ўзбекистон давлатининг асосчиси, жаҳон миқёсида тан олинган улкан сиёсат арбоби, энг муҳими, бугунги тинч ва фаровон ҳаётимиз меъмори Биринчи Президентимиз Ислом Каримов билан замондош бўлганимиздан ҳақли равишда фахрланамиз.

Республикамиз истиқлолга эришиш арафасида юзага келган ғоят мураккаб сиёсий-иқтисодий бўҳ­рон йилларида Ўз­бекис­тон раҳбари этиб сайланган Ислом Каримов «Биз энди эскича яшай олмаймиз ва бундай яшашга замоннинг ўзи йўл қўймайди», деб баралла таъкидлаган эди. Мустабид тузумнинг субутсизлиги ва ўша пайтдаги раҳбариятнинг уқувсизлиги оқибатида ҳукм сурган ўта оғир вазиятдан, таъбир жоиз бўлса, қайнаб турган қозон ичидан халқимизни омон олиб чиққан Биринчи Президентимизнинг мардлиги, буюк жасорати барча замонлар учун ибрат бўлиб қолажак. Бугун, орадан шунча вақт ўтиб Ватанини, туғилиб ўсган юртини жондан ортиқ суйган инсонгина ана шундай буюк ишларга қодир бўлишини янада теранроқ англамоқдамиз.

Камина Биринчи Президентимиз Ислом Каримов билан икки марта юзма-юз учрашиш бахтига муяссар бўлганман. Илк бор 2008 йилнинг 5 декабрида Оқсаройда кўксимга «Олтин ­Юлдуз» қадаб қўйганида у кишининг иссиқ тафтини, меҳр тўла қалбини ҳис қилган эдим. Қорақалпоғистон ҳақида, қорақалпоғистонликлар ҳақида билдирган ўта самимий фикрлари мени тўлқинлантириб ­юбо­р­ган эди. Мен оддий бир инсон сифатида давлатимизнинг юксак мукофотига сазовор бўлганимда, уни Юрт­бошимиз қўлидан ­олаётганимда кўнглимдан кечган ҳис-ҳаяжонни ҳали-ҳамон энтикиш билан эслайман.

Иккинчи марта 2010 йилнинг 5 октябрида Қорақалпоғистонга сафари чоғида Кегейли туманидаги «Даулет» фермер хўжалиги дала шийпонида пахтакорлар билан бўлган учрашувда суҳбатлашдим. Ўлкамиз тарихи, қадимий ёдгорликларимиз, уларни тадқиқ қилиш ишларининг бориши, мустақиллик туфайли хорижлик ҳамкасблар билан ҳамкорликда олиб борилаётган тадқиқотларимиз ҳақида сўзлаб берганимда Президентимиз бу йўналишда қандай муаммолар борлигини сўраб қолди. Мен мамлакатимизда ар­хео­логик ёдгорликларга бой бўлган ҳудудлар бўй­лаб сайёҳлик йўналишлари ташкил этиш лозимлигини айтдим. У киши фикримни тасдиқлаб, бу борадаги вазифаларни бирма-бир санаб кетдилар. Ўзим шу соҳанинг академиги бўлсам-да, Ислом Каримовнинг қадимшунослик бўйича билими, дунёқараши нақадар кенг ва теран эканига тан берганман. Катта бир мамлакатнинг раҳбари юрт бош­қаришдек ғоят оғир ва масъулиятли вазифадан ортиб, қадимий ва бой маданиятимиз, қаерда, қанча ва қандай маданий ёдгорликлар бор, уларни келажак авлодларга бус-бутун етказиш учун нималар қилиш керак, ўрганиш, тадқиқ этиш ишларининг аҳволигача билса-я, деб ҳайрон бўлган эдим.

Биринчи Президентимизнинг ташаббуслари ва қўл­лаб-қувватлашлари билан бой маданий меросимизни асраб-авайлаш ва ўрганишга алоҳида эътибор қаратилди. У кишининг бевосита ғамхўрлиги туфайли ўзининг бебаҳо дурдона экс­понатлари билан жаҳон сайёҳларини лол этиб келаётган ­И.Савицкий номидаги Қорақалпоқ давлат санъат музейининг янги биноси барпо этилди. Ислом Каримовнинг музейда сақланаётган «Қорақалпоқ халқи бундай бетакрор ва ажойиб музей билан ҳар қанча фахрланса, арзийди» деган дастхати қорақалпоғистонликлар учун жуда қадрли ва бундан фахрланамиз.

Истиқлол йилларида хорижлик ҳамкасблар билан ҳамкорликда ишлаш им­кония­ти туғилди. Қорақалпоғистонда австралиялик археологлар билан биргаликда ­фаолият олиб борган халқ­аро экспедиция томонидан бундан икки минг йил илгариги даврга тааллуқли картиналар галереяси очилди. Фольклоршунослар томонидан тайёрланган 100 жилдли «Қорақалпоқ фольклори» китоби жаҳон маънавиятининг олтин фондига қўшилган бебаҳо мерос бўлди. Маънавий меросимиз саналмиш халқ жировларининг жонли овозлари олтин дискларга ёзиб олиниб, жаҳон мусиқа маданиятига киритилди.

Буларнинг барчаси мамлакатимизнинг Биринчи ­Президенти Ислом Каримов­­нинг эътибори, ғамхўрлиги ва қўллаб-қувватлаши самарасидир. Бинобарин, буюк давлат ва сиёсат арбоби, толмас ислоҳотчи, ғамхўр инсон Ислом ­Каримовнинг порлоқ хотираси қалбимизда мангу яшайди.

 

Ғайраддин ХЎЖАНИЁЗОВ,

археолог олим, Ўзбекистон Қаҳрамони.

ЎзА



DB query error.
Please try later.