26.01.2017

БУЮКЛАР МЕРОСИ ҲАР ДОИМ ҚАДРЛАНАДИ

Шу кунларда мамлакатимизнинг барча ҳудудларида Биринчи Президентимиз Ислом Каримовнинг таваллуд куни муносабати билан унинг ҳаёти, фаолияти ва бой меросини ўрганиш ва тарғиб қилишга бағишланган маънавий-маърифий тадбирлар бўлиб ўтмоқда.

Самарқанд давлат университетида ўтказилган тадбирда университет ректори Рустам Холмуродов, Ўзбекистон Республикаси Бош вазирининг маслаҳатчиси Муҳаммаджон Қуронов, «Ўзбекистон овози» ва «Голос Узбекистана» газеталари Бош муҳаррири Сафар Остонов, Тошкент давлат юридик университети доценти Эшмуҳаммад Қодиров ва бош­қалар сўзга чиқиб, мустақиллик йилларида Биринчи Президентимиз раҳнамолигида давлат ва жамиятнинг барча соҳаларида кенг кўламли ислоҳотлар амалга оширилгани, тарихий ютуқларга эришилгани хусусида сўз юритишди. Ушбу тадбир мустақиллигимиз асосчиси, Биринчи Президентимиз Ислом Каримов хотирасини абадийлаштириш, Буюк Йўлбошчимиз бошлаб берган бунёдкорлик ишларини муносиб давом эттиришга қаратилгани билан аҳамиятли эканига урғу беришди.

Ўзбекистон Республикаси Президенти Шавкат Мирзиёев шу йилнинг 14 январида бўлиб ўтган Вазирлар Маҳкамасининг кенгайтирилган мажлисида Ислом Абдуғаниевич Каримов томонидан ишлаб чиқилган тараққиётнинг «ўзбек модели»ни амалга ошириш ва замонавий давлат барпо этиш борасидаги стратегик тамойил­ларга доимо суянишимизни алоҳида таъкидлади.

Дарвоқе, бу тамойиллар мамлакатимизда бундан ке­йин ҳам сиёсий, иқтисодий ва ижтимоий ўзгаришларга мустаҳкам асос бўлиб хизмат қилади.

Биз яхши биламизки, Биринчи Президентимизнинг давлатимиз, халқимиз учун амалга оширган буюк хизматлари ўзлигимизни анг­лаш, инсоний қадр-қимматимиз, урф-одат ва қадриятларимиз, муқаддас ислом динимиз, миллий-маънавий меросимизни тиклаш, алломаларимиз номларини абадийлаштириш, юртимиздаги муқаддас қадамжо ва зиёратгоҳларни обод этишда ўз ифодасини топди.

Бундай эзгу ишларга мустақиллигимизнинг дастлабки йиллариданоқ киришилди. Мамлакатимизнинг турли ҳудудларида, шу жумладан, тарихий шаҳарларимизда кенг кўламли бунёдкорлик ишлари амалга оширилди. Натижада Имом Термизий, Абдухолиқ Ғиждувоний, Имом Бухорий, Имом Мотуридий, Аҳмад Фарғоний, Баҳовуддин Нақшбанд сингари улуғларимиз номи билан боғлиқ қутлуғ масканлар барпо этилди. Тошкент, Самарқанд, Бухоро, Термиз, Хива, Қўқон, Қарши, Марғилон каби қадимий шаҳарларимиз янгича қиёфа касб этди.

Соҳибқирон Амир Темур таваллудининг 660 йиллиги муносабати билан Тошкент, Самарқанд, Шаҳрисабз шаҳарларида катта ҳажмдаги қурилиш-таъмирлаш ишлари бажарилди. Бу тарихий шаҳарларда бобомиз Амир Темурнинг ҳайкаллари ўрнатилди. Самар­қанддаги Амир Темур мақбараси, Шоҳи Зинда мажмуаси ва темурийлар даврига оид бошқа тарихий-маданий объектлар, Шаҳрисабздаги Оқсарой маданий ёдгорлиги ва улар атрофи ободонлаштирилди.

Тадбир давомида шулар ҳақида сўз бориб, Биринчи Президентимиз томонидан ишлаб чиқилган тараққиётнинг «ўзбек модели» бугун ўз натижасини бераётгани алоҳида таъкидланди. Хусусан, Кадрлар тайёрлаш миллий дас­тури асосида таълим тизими тубдан ислоҳ қилиниши самараси ўлароқ, ҳуқуқий демократик давлат ва эркин фуқаролик жамияти барпо этишга, мамлакатимизни ҳар томонлама равнақ топтиришга қодир бўлган маънан етук, юксак интеллектуал салоҳиятга эга кадрлар тайёрланмоқда. Бу Буюк Йўлбошчимиз томонидан бошлаб берилган эзгу саъй-ҳаракатлар бугун ўз мевасини бераётганининг ёрқин тасдиғидир.

Учрашувда Биринчи Президентимиз ҳаёти, серқирра сиёсий фаолияти ва бой илмий мероси барчамиз учун ибрат ва дастуриламал бўлиши таъкидланди. Бу меросни чуқур ўрганиш фарзандларимизни комил инсон этиб тарбиялашда муҳим ўрин тутади.

— Бугунги учрашуда Биринчи Президентимиз ҳаёти ва фаолияти тўғрисида кўп маълумотларга эга бўлдик, — дейди университет талабаси Сангин Қурбонов. — Биринчи Президентимиз ҳаёти курашлардан иборат бўлганини чуқур англаб етдик. Биз ёшлар пухта билим олиб, баркамол авлод бўлиб вояга етишимиз учун ҳаловат билмай, меҳнат қилганликлари ҳақида айтилган гаплардан жуда таъсирландим. Биринчи Президентимиз васиятларига содиқ қолиб, аъло ўқишим, юртимизга малакали кадр бўлиб етишишим кераклигини ҳис этдим.

Биринчи Президентимиз Ислом Каримов ўқиган Самар­қанд шаҳридаги 21-умумтаълим мактабидаги учрашув ҳам жуда ҳаяжонли ўтди. Унда кўп савол-жавоблар бўлди. Сўзга чиққан ўқувчилар Ислом Каримов ҳақида шеърлар ўқишди. Улардан бири бу мактабда ўқиётганидан фахрланишини айтди. Биз Биринчи Президентимизга ўхшаб фақат аъло баҳоларга ўқишга ҳаракат қиламиз, деди. Бу сўзлар билан у бутун мактабдошлари фикрини ифода этган эди.

Мамлакатимизнинг барча ҳудудларида ўтказилаётган ана шундай ҳаяжонли учрашувлар Ислом Каримов қолдирган буюк мерос — мустақил, барқарор ривожланаётган, эркин ва фаровон Ўзбекистонни асраб-аввайлаш, Буюк Йўл­бошчимиз бошлаб берган ислоҳотларни изчил давом эттириш, уларни янги босқичга олиб чиқиш мақсади ҳар биримизни бирлаштириши керак, деган хулоса чиқаришга ундайди.

 

Абдурасул САТТОРОВ,

«Ўзбекистон овози» мухбири.



DB query error.
Please try later.