Охирги сонда



Кўп ўқилган мақолалар



Долзарб мавзу



Мақолалар архиви

«    Aprel 2019   
Du Se Cho Pa Ju Sha Ya
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 1 2 3 4 5
26.01.2017

ОЛГАН МУКОФОТИМНИ ЎПИБ, КЎЗИМГА СУРТДИМ...

Бу — Президентимиз Шавкат Мирзиёев фармони билан «Дўстлик» орденига сазовор бўлган Республика озарбайжон миллий маданий марказининг «Озарбайжон қизлари» ансамбли бадиий раҳбари Кайкеп АЛИЕВАнинг дил сўзлари

— Бутун умрини, бор кучи ва ғайратини ўзи севган касбга бағишлаган инсон борки, хизматлари қадрланишини, эътироф этилишини хоҳлайди, — дейди Кайкеп Алиева. — Аммо бу кун қачон келишини ҳеч ким билмайди. Кеча мукофот олган бўлсам, бугунгача уни неча марта ўпиб, кўзимга суртганимни тасаввур қила оласизми? Илгари Озарбайжонда хизмат кўрсатган артист унвонини олгандим. Лекин бундай ҳаяжон сира бўлмаган.

Эронда туғилганман. Тақдир тақозоси ила оиламиз билан Ўзбекистонга келиб қолганмиз. Шу ерда ўсиб-улғайдим. Ўзбекистонни ўзимнинг Ватаним деб биламан.

Ўзбекистон ва ўзбек халқини нега севишимни биласизми? Бир гапни баралла айтаман: Эй жаҳон аҳли! Миллатлараро ҳақи­қий дўстлик ва тотувликни кўрмоқчи бўлсангиз Ўзбекистонга келинг! Турли халқларнинг бир тану бир жон бўлиб, бир-бирини қўллаб, эъзозлаб келаётганини кўргингиз келаяптими? Марҳамат, Ўзбекистонга келинг!

Дунёнинг айрим мамлакатларида рўй бераётган воқеа-ҳодисаларни ҳаммамиз кўриб, билиб турибмиз. Комил ишонч билан айта оламанки, Ўзбекистон жаҳоннинг энг тинч давлати.

Шу ўринда Президент Шавкат Мирзиёев ҳақида ҳам фикрларимни айтмасам бўлмайди. Бу инсон халқ ишончига сазовор бўлди. Халқнинг кўнглидан жой олди. Одамларни анча вақтдан бери қийнаб келаётган муаммоларга ҳам ечим топаяптики, буни юксак даражада қадр­лаш зарур. Қисқа вақт ичида мамлакат ривожланишининг кейинги стратегиясини ишлаб чиқди ҳамда уни амалга татбиқ этиш учун бир қатор қарор ва фармонларни имзолади. Энг муҳими, халқни тушунаяпти, халқни тинглаяпти.

Президентимизнинг қўлидан мукофотни олар эканман, ўша пайтда дунёда мендан бахтли одам йўқ эди! У кишининг самимий фикрлари ва таклифларини айтмайсизми? Шавкат Миромонович мендан миннатдор эканини билдирди. Уйга қайтар эканман, одам шунчалар ҳам эътиборли бўладими, деб ўйлаб кетдим.

Ўзбекистонда кўп миллатли одамлар яшайди. Шавкат Мирзиёев ҳам Биринчи Президентимиз ишларини давом эттирган ҳолда, Ўзбекистон фуқароси бўлган ҳар бир одамни тенг кўраяпти. Миллати ва динидан қатъи назар, бирдек муносабатда бўляпти. Ўйлайманки, шу сабабли ҳам Ўзбекистонда тинчлик ҳукмрон. Шу сабабли ҳам Ўзбекистон ўзи танлаган йўлдан оғишмай кетаяпти. Ўйлайманки, шунинг учун ҳам Ўзбекистонга Яратган одил ва доно раҳбарларни бош қилмоқда...

Озарларда «сизга қурбон бўлай» деган гап бор. Шавкат Мирзиёевнинг ҳар бир чиқишини телевизор орқали кўрганимда, шу гапни беихтиёр айтиб юбораман. Бу инсонга бўлган ҳурматимни намойиш этишдан чарчамайман. Тилагим, Президентимиз соғ-омон бўлсин. Қилаётган хайрли ишларини давом эттиришида Худо куч-қувват ато этсин.

«Озарбайжон қизлари» ансамблимизда ўзбек қизлар ҳам бор. Ўзбек ва озар халқлари қардошлик алоқаларига ўзгача муносабатда бўлиши билан ажралиб туради.

Мен, ўз навбатида, хизматларимиз юзага чиқишида амалий ёрдам бераётган Озарбайжоннинг Ўзбекистондаги элчихонаси қошидаги Ҳайдар Алиев номидаги Озарбайжон маданият маркази раҳбари Самир Аббосовга алоҳида миннатдорлик билдирмоқчиман. Улар бизга зарур бўлган барча шароитларни яратиб бермоқда.

Ўзбек ва озар халқларини бир-биридан айро тасаввур қила олмайман. Ишонасизми, иккала сўз ҳам менга бир хил эшитилади. Ўзаро мустаҳкам алоқаларимиз абадий бўлишини истайман.

Қанча умрим қолганини билмайман. Аммо қатъий қарорга келганман: энг охирги нафасим ҳам Ўзбекистон ҳавоси бўлишини ва Ўзбекистон тупроғида мангу ором топишни истайман. Шу халқ учун хизмат қилишни ўзим учун олий шараф, деб биламан.

 

«Ўзбекистон овози» мухбири

Темур АЪЗАМ ёзиб олди.



DB query error.
Please try later.