21.01.2017

КЎПЧИЛИК КУТМАГАН ҒАЛАБА

Денис Истомин дунёнинг иккинчи рақамли ракеткаси Новак Жоковични мағлуб этди

Шу кунларда Мельбурн (Австралия)да теннис бўйича дунёдаги энг йирик мусобақа — «Катта дубулға» туркумига кирувчи тўртта турнирдан бири Australian Open баҳслари қизғин давом этмоқда.

Унда ҳамюртимиз Денис Истомин мусобақанинг дастлабки босқичида хорватиялик Иван ­Додигни мағлубиятга учратганди.

Қуръага кўра, иккинчи даврада Денис ­Истомин дунёнинг иккинчи рақамли теннисчиси сербиялик Новак Жоковичга қарши кортга чиқди. Аксарият мутахассис ва мухлислар ушбу жуфтлик баҳсидан олдин сербиялик спортчи осонгина ғалаба қозонишини тахмин қилишганди. Чунки Новак Жокович бунгача Australian Open мусобақасида олти марта (2008, 2011, 2012, 2013, 2015 ва 2016 йиллар) ғолиб бўлган. У «Катта Дубулға» туркумига кирувчи барча мусобақаларда бош совринни қўлга киритган. Жокович уч марта Уимблдон, икки бор US Open ва бир марта Роланд Гаррос сингари нуфузли турнирларда пешқадам бўлган.

Шунга қарамай, Денис номдор рақиб олдида довдираб қолмади, ўзини йўқотиб қўймади. Аксинча, у учрашувнинг биринчи сетида рақибига қарши тезкор ўйин намойиш этди ва 7/6 ҳисобида зафар қучди. Учрашувнинг иккинчи ва учинчи сетларини 7/5, 6/2 ҳисобида ўз фойдасига ҳал қилган Новак тўртинчи сетда «тай-брек»да теннисчимизга қаршилик кўрсата олмади. Сўнгги ҳал қилувчи бешинчи сетда Денис Истомин катта ирода ва маҳорат кўрсатиб 6/4 ҳисобида ғалаба қозонди. Умумий ҳисоб — 3:2 (7/6, 5/7, 2/6, 7/6, 6/4).

Энди Денис учинчи даврада испаниялик Пабло Каррено Буста билан куч синашади. Турнирнинг 30-рақамли теннисчиси сифатида қайд этилган бу спортчи илк босқичда британиялик Кайл Эдмондни (6/2, 6/4, 6/2) мағлубиятга учратган.

Нимчорак финал йўлланмаси учун кечадиган навбатдаги баҳсда ҳамюртимизга омад тилаймиз.

 

Эркин ХОЛБОБО



DB query error.
Please try later.