16.01.2017

ФАОЛ ИНСПЕКТОРЛАР ТАҚДИРЛАНДИ

Самарқандда «Ички ишлар органларининг намунали таянч пункти» кўрик-танловининг ви­лоят бос­қичи ғолибларини тақдирлашга бағишланган маросим ўтказилди.

Унда танловнинг туман, шаҳар босқичларида ғолиб бўлган милиция таянч пунктлари профилактика инспекторлари, фуқаролар йиғинлари раислари, давлат ва жамоат ташкилотлари вакиллари иштирок этди.

Самарқанд вилояти ҳоки­мининг биринчи ўринбосари ­Ш.Худойбердиев, вилоят ички ишлар бошқармаси бошлиғи Ф.Қувондиқов ва бошқалар хал­қимиз осойишталигини таъминлаш, жиноятчилик ва ҳуқуқбузарликларнинг олдини олишда ички ишлар идораларининг фаолияти муҳим аҳамият касб этаётганини таъкидлади. Бунда тизимнинг энг қуйи бўғини ҳисобланган маҳаллалардаги милиция таянч пунктларининг муносиб ўрни бор.

Бугунги кунда Самарқанд вилоятида 400 дан ортиқ милиция таянч пункти фаолият кўрсатмоқда. Уларнинг аксарияти маҳалла фуқаролар йиғинлари билан бир бинода жойлашгани, профилактика инспекторларининг маҳалла раиси, диний маърифат ва маънавий-ахлоқий тарбия масалалари бўйича маслаҳатчи, посбон ва фуқаролар йиғини комиссиялари билан ҳамкорликда иш олиб бора­ётгани ҳудудда осойишталикни таъминлаш, турли нохуш ҳолатларнинг олдини олишга хизмат қилмоқда. 2016 йилда вилоятдаги 150 дан ортиқ маҳаллада жиноят қайд этилмади.

Танлов ғолибларини аниқлашда милиция таянч пунктларининг хизмат кўрсатиш ҳудудидаги вазият, профилактика инспекторларининг маҳалла фуқаролар йиғини ва аҳоли билан ҳамкорлиги, билим ва тажрибаси, вояга етмаганлар билан ишлаш борасидаги фаолиятига алоҳида эътибор қаратилди.

Пайариқ туманининг Алишер Навоий номидаги маҳалла фуқаролар йиғинида жойлашган 199-милиция таянч пункти биринчи ўринни қўлга киритди ва танловнинг мамлакат босқичига йўлланма олди. Иккинчи ўрин Жомбой тумани «Тут» маҳалла фуқаролар йиғинидаги 119-, учинчи ўрин Тайлоқ тумани «Янги Тайлоқ» маҳалла фуқаролар йиғинидаги 289-милиция таянч пунктларига насиб этди.

– Ўтган йили маҳалла фуқаролар йиғинининг замонавий биноси бунёд этилиб, бу ерда таянч пункти ҳам самарали ишлаши учун шароит яратилгани фаолиятимизда ўз натижасини бермоқда, – дейди 199-милиция таянч пункти профилактика инспектори Аслиддин Муродов. – Янги тадбиркорлик субъектлари ташкил этилаётгани, ёшлар доимий иш билан таъминланаётгани, «Мактаб – маҳалла – оила» ҳамкорлигининг изчил йўлга қўйилгани ҳам муваффақиятларимизнинг бош омилидир. Бу борадаги ишларни жорий йилда янада кенг кўламда давом эттириш юзасидан чора-тадбирлар белгилаганмиз.

Танловда «Энг маҳоратли профилактика инспектори», «Ёш авлод ҳимоячиси», «Фидойи маҳалла посбони», «Маърифатпарвар маслаҳатчи» каби номинациялар бўйича ҳам ғолиблар аниқланди.

Тадбир доирасида ёш тадбиркор ва ҳунармандлар томонидан тайёрланган маҳсулотлар кўргазмаси, спортчи ёшларнинг кўргазмали чиқишлари намойиш этилди.

 

Ғ.ҲАСАНОВ,

ЎзА мухбири.



DB query error.
Please try later.