16.01.2017

ТАБИИЙ ВА ЭКОЛОГИК ТОЗА МАҲСУЛОТЛАР

Мамлакатимизда аҳолини сифатли дори-дармон воситалари билан таъминлаш, четдан импорт қилинаётган тиббиёт воситаларини маҳаллийлаштириш асосида ўзимизда тайёрлаш борасида изчил ишлар амалга оширилмоқда.

Навоий вилоятида ҳам мазкур йўналишда қатор лойиҳалар ишлаб чиқаришга жорий этилиб, истеъмолчилар талабига мос, экологик тоза, энг муҳими, инсон организми учун фойдали компонентларга эга препаратлар тайёрлаш йўлга қўйилмоқда. Президентимизнинг 2016 йил 16 сентябрдаги «2016-2020 йилларда республика фармацевтика саноатини янада ривожлантириш чора-тадбирлари дас­тури тўғрисида»ги қарори бу борада муҳим дастуриламал бўлаётир.

Ўтган йили вилоятда тиббиёт воситалари, тайёр дори-дармон маҳсулотлари ишлаб чиқариш бўйича 4 лойиҳа амалга оширилди. Бунинг учун 7 миллиард 300 миллион сўмдан ортиқ маблағ сарфланди. 40 янги иш ўрни яратилди.

Кармана туманидаги «Кармана Ал-Азиз Авиценна» масъулияти чекланган жамиятида замонавий технологиялар асосида табиий гиёҳларни қуритиш ва қадоқлаш йўлга қўйилди. Тадбиркор Шоҳрух Шаропов раҳбарлик қилаётган корхонада 7 киши иш билан таъминланди.

– Президентимиз раҳнамолигида тадбиркорларга кенг имтиёз ва шароитлар яратилмоқда, – дейди Ш.Шаропов. – Бундай эътибор ва рағбатдан самарали фойдаланиб, таркиби табиий гиёҳлардан иборат 7 турдаги дори воситалари қадоқлашни ўзлаштирдик. Маҳсулотларимиз табиий ҳолда ўсадиган доривор ўтлардан тайёрланади. Тиббиётда дамлама сифатида кенг қўлланиладиган гиёҳлар аҳоли саломатлигини тиклаш ва мустаҳкамлашда муҳим омил бўлмоқда.

Тадбиркорлик фаолиятини бошлашда 20 минг доллар миқдоридаги шахсий сармоя ҳамда «Асака» банкнинг вилоят филиалидан олинган 100 миллион сўмлик кредит маблағи қўл келди. Хориждан замонавий қайта ишлаш ва қадоқлаш ускуналари келтирилди.

2016 йил ёш тадбиркор учун омадли келди. «Камолот» ёшлар ижтимоий ҳаракати томонидан ташкил этилган «Ёш тадбиркор – юртга мададкор» танловининг мамлакат босқичида ғолибликни қўлга киритиб, 65 миллион сўм миқдорида имтиёзли кредит олиш имконини берувчи сертификат билан тақдирланди.

Ёш ишбилармон ўтган йили Хитой Халқ Республикасида ташкил этилган халқаро кўргазмада иштирок этиб, доривор экстракт ва қиёмлар ишлаб чиқаришга мўлжалланган замонавий технологик линияни харид қилиш бўйича хорижлик ҳамкорлар билан 100 минг долларлик шартнома тузди. Жорий йилнинг иккинчи чорагида ишга туширилиши режалаштирилаётган ушбу лойиҳа асосида 5 турдаги тайёр табиий дори воситалари ишлаб чиқарилади ва қўшимча 10 янги иш ўрни яратилади.

Вилоятда фармацевтика соҳасини янада ривожлантириш, бу йўналишда фаолият юритувчи тадбиркорлик субъектларини қўллаб-қувватлаш мақсадида 2017-2021 йилларга мўлжалланган режа ишлаб чиқилган. Хусусан, шу давр мобайнида 26 лойиҳа учун 54 миллиард 735 миллион сўм миқдорида сармоя ажратиш белгиланган. Бу 357 янги иш ўрни яратиш имконини беради.

 

Н.РАҲИМОВ,

ЎзА мухбири.



DB query error.
Please try later.