Охирги сонда



Кўп ўқилган мақолалар



Долзарб мавзу



Мақолалар архиви

«    Iyul 2017   
Du Se Cho Pa Ju Sha Ya
26 27 28 29 30 1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31 1 2 3 4 5 6
12.01.2017

ТИББИЁТ РИВОЖИ

энг аввало, малакали кадрларга боғлиқ

Республикамиз Президенти Шавкат Мирзиёевнинг соғлиқни сақлаш соҳаси ходимлари билан учрашувида тиббиёт тизимидаги ислоҳотлар, йўл қўйилган камчиликлар, ҳал этилиши зарур бўлган масалалар очиқ-ойдин муҳокама қилинди, таклифлар, мулоҳазалар билдирилди.

Аввало шуни алоҳида таъкидлаш керакки, Истиқлол йилларида соғлиқни сақлаш соҳасида жуда катта ишлар амалга оширилди. Аҳоли саломатлигини муҳофаза қилиш бўйича яхлит тизим яратилди.

Бироқ ўтган давр мобайнида ана шу тизим тўлиқ ишлаши учун нималардир етишмади. Балки, биз шифокорлар ҳам фидойилик кўрсатмагандирмиз. Буни қишлоқ врачлик пунктлари мисолида ҳам кўриб турибмиз. 2007-2008 йилларда Саломатлик-2 лойиҳаси доирасида барча қишлоқ врачлик пунктлари тиббий жиҳозлар билан таъминланган эди. Ўтган вақт давомида улар янада такомиллашди, янгидан-янги асбоб-ускуналар яратилди. Аммо бизда мавжудлари замон талабига тўлиқ жавоб бермайди. Шунингдек, сўнгги йилларда соғлиқни сақлаш соҳасига маҳаллий бошқарув органларининг эътибори ҳам сусайиб кетди.

Учрашувда кўтарилган яна бир ўткир муаммо — бу кадрлар масаласи. Охирги вақтларда тиббиёт олий ўқув юрт­ларини битирган ёшлар қишлоққа деярли бормаяпти ҳисоби. Мана шу омиллар йиғилиб, долзарб муаммоларни келтириб чиқарди.

Очиқ мулоқотда Президентимиз томонидан берилган кўрсатмаларни ҳал этиш юзасидан бугун чора-тадбирлар белгиланмоқда.

Биринчидан, тиббиёт соҳасида малакали мутахассислар тайёрлаш мақсадида битирувчиларга имтиёзлар бериш масаласи кўриб чиқилмоқда. Шунингдек, тиббиёт олий ўқув юрт­ларида ўқиш муддатларини қайта кўриб чиқиш режалаштирилаяпти. Ўқишни тамомлаган мутахассис икки йил давомида мажбурий равишда биринчи бўғинда, қишлоқ врачлик пунк­ти ёки оилавий поликлиникада ишлаши кўзда тутилмоқда. Шундан кейингина у магис­тратурада ўқиши мумкин.

Мулоқотда кўтарилган яна бир муҳим масала — пойтахтимизда фаолият кўрсатаётган ихтисослаштирилган тиббиёт марказлари фаолиятини қуйи бўғингача ташкил этишдир. Мутахассис сифатида айтишим керакки, очиғи, бу тиббиёт марказларининг фақатгина Тошкент шаҳрида бўлиши чекка ҳудудларда истиқомат қилаётган аҳоли учун кўплаб қи­йин­чиликларни келтириб чиқармоқда. Аслида мазкур марказларнинг вилоят филиаллари ҳам бўлиши керак. Бу масала учрашувда жуда қатъий қилиб қўйилди. Бемор даволаниш учун Тошкентга келиши керак эмас, мутахассис беморни даволаш учун вилоятларга чиқиши зарур. Ҳозирда ана шу тизимни ишлаб чиқиш устида ҳам иш кетмоқда.

Президентимиз учрашувда таъкидлаганидек, ҳар йили 40 мингга яқин фуқаромиз чет элларда даволанишга мажбур бўлмоқда. Мен уларнинг баъзилари билан суҳбатлашганимда, бу ҳолат беморларга ҳам моддий, ҳам маънавий жиҳатдан ноқулайлик туғдираётганига гувоҳ бўлдим. Шу ўринда яна бир гап. Беморларнинг бирортаси кўз билан боғлиқ масалада чет элга бориб келганини эшитмадим. Нимага? Чунки мамлакатимизда офталмология соҳаси анча ривожланган, малакали мутахассислар бор. Қолаверса, хорижлик шифокорлар билан ҳамкорлик яхши йўлга қўйилган.

Учрашувда хориждаги мутахассисларни Ўзбекистонга таклиф қилиб, илғор амалиётларни ўзимизнинг клиникаларда ўтказиш масаласи ҳам ўртага ташланди.

Хулоса сифатида шуни айтишим керакки, халқаро тажрибадан маълумки, тиббиёт соҳасининг биринчи навбатдаги вазифаси одамларнинг тиббий маданиятини оширишдир. Халқимиз онгидан «касал бўлсам, кейин даволанаман», деган фикр­ни чиқариб юборишимиз керак. Энг асосий урғуни тар­ғибот масалаларига, аҳолининг тиббий саводхонлигини оширишга қаратишимиз лозим, деб ўйлайман. Бу борада, айниқса, оммавий ахборот воситалари имкониятларидан янада самарали фойдаланишимиз керак. Шунда тиббиёт соҳасида амалга оширилаётган ислоҳотлар ўз натижасини беради.

        

Мақсуда ВОРИСОВА,

Олий Мажлис Сенати аъзоси,

Зангиота туманидаги «Назарбек» қишлоқ врачлик пункти мудири.



DB query error.
Please try later.