07.01.2017

АСКАР ОНАЛАРИНИ ШАРАФЛАЙМИЗ

Хоразмда Ўзбекистон Республикаси Қуролли Кучлари ташкил этилганининг 25 йиллиги ҳамда Ватан ҳимоячилари куни муносабати билан ўтказилган маънавий-маърифий тадбир шундай номланди.

Вилоят ҳокимлиги, хотин-қизлар қўмитаси, «Камолот» ёшлар ижтимоий ҳаракати вилоят кенгаши, «Маҳалла» хайрия жамоат фонди вилоят бўлими ва вилоят мудофаа ишлари бошқармаси ҳамкорлигида ташкил этилган тадбирда муддатли ҳарбий хизматни ўтаётган хоразмлик аскарларнинг оналари, оммавий ахборот воситалари ходимлари иштирок этди.

Мамлакатимиз мустақиллиги, хавфсизлиги, ҳудудий яхлитлиги ва барқарор тараққиётимизнинг ишончли кафолати бўлган миллий армиямизни янада такомиллаштириш йўлида амалга оширилаётган изчил ислоҳотлар юксак самаралар бераётгани таъкидланди.

Тадбирда йигитлик бурчини ўтаётган аскарларнинг оналарига сов­ғалар топширилди. Самарқанд вилоятида муддатли ҳарбий хизматни ўтаётган бир гуруҳ хоразмлик йигитларнинг тадбирга кириб келиши оналар учун кутилмаган совға бўлди.

— Ўғлим Раҳматжон ўзига ярашиб турган ҳарбий либосда қўлида гул билан даврага кириб келишидан бошим осмонга етди, — дейди ҳазорасплик Гулбаҳор Сафоева. — Фарзандим хизмат қилаётган ҳарбий қисм раҳбарияти томонидан отаси ва менга йўлланган ташаккурномани ўқиб, қалбим ғурурга тўлди. Ўғлим билан фахрланаман. Бугун юртимизда аскар онаси — энг бахтли она. Мен барча оналар номидан ана шундай тадбирни уюштирган ташкилотчиларга, аскар ўғлонларимизга шароит яратиб бераётган Президентимизга миннатдорлик билдираман.

Тадбирда Ватан, истиқлол, тинч­лик, дўстлик, ёшлик ва меҳр-оқибатни тараннум этувчи куй-қўшиқлар янгради.

 

А.ШОКИРОВ,

ЎзА мухбири.



DB query error.
Please try later.