05.01.2017

2017 ЙИЛ МАМЛАКАТИМИЗ ТАРАҚҚИЁТИДА

янги саҳифалар очилади

Қутлуғ ниятлар, катта орзу ва режалар билан Янги йилга қадам қўйдик. 2016 йилда мамлакатимизда муҳим ижтимоий-сиёсий воқеалар бўлиб ўтди. Бу жараёнларда халқимиз янада жипс ва ҳамфикр бўлиб, ягона мақсад йўлида ҳаракат қилди. Янги йилдан умидларимиз катта, кўнглимизга тугиб қўйган ниятларимиз бисёр. Юртдошларимизнинг кўзида-ю, кўнглида янада қутлуғ кунларга етишга ишонч бор. Бу ишонч Президентимизнинг халқимизга йўллаган Янги йил табригини тинглаб яна бир карра мустаҳкамланди.

 

Мақсуда ВОРИСОВА, Олий Мажлис Сенати аъзоси:

— 2017 йилни катта шоду-хуррамлик билан кутиб олдик. Айниқса, Президентимизнинг телевидение орқали халқимизни Янги йил билан табриклагани одамларимизнинг кайфиятини жуда ҳам кўтариб юборди. Таъбир жоиз бўлса, давлатимиз раҳбари янги йилни хал­қимиз билан бевосита мулоқотдан бошлади.

Бу йил ҳар биримизнинг олдимизда жуда катта масъулиятли вазифалар турибди. Халқ билан мулоқот ва инсон манфаатлари йилида одамларни ўйлантираётган масалаларни аниқлаш ва ҳал этиш, уларнинг мурожаатлари билан ишлаш, ижро ҳокимияти масъулиятини янада ошириш борасида қилинадиган ишлар талайгина. Бу борада Олий Мажлис Қонунчилик палатаси депутатлари ва Сенат аъзолари зиммасида ҳам ўта муҳим вазифалар турибди. Яқинда эълон қилинган «Жисмоний ва юридик шахс­ларнинг мурожаатлари билан ишлаш тизимини тубдан такомиллаштиришга доир чора-тадбирлар тўғрисида»ги Президент Фармони ижросини таъминлаш халқимизни рози қилишда долзарб аҳамиятга эга.

Зеро, Фармондан кўзланган асосий мақсад ҳам одамларни рози қилишдан иборат. Инсонлар қачон рози бўлади? Қачонки, ҳаётидан мамнун бўлса, ўзини ўйлантираётган муаммоларга ечим топа олса. Бу йил фуқароларнинг мурожаатлари билан ишлаш бўйича Халқ қабулхоналари ташкил этилиб, уларнинг фаолияти тизимли равишда йўлга қўйилиши — одамлар ҳал бўлмаётган муаммоси юзасидан давлат идоралари эшиги олдида сарға­йиб ўтирмайди, деганидир.

Бу эса ҳар бир корхона ва ташкилотни, айниқса, катта-кичик масъул раҳбарларни қонуний фаолият юритишга, инсон манфаатларини таъминлашга, одамларни эшитишга мажбур қилади. Бундай тизим ўз-ўзидан фуқароларимизнинг давлатдан, жамиятдан, ҳаётидан рози бўлиб яшашига хизмат қилади.

 

Нурмуҳаммад АБДУЛЛАЕВ, халқ депутатлари Тошкент вилоят Кенгашидаги ЎзХДП гуруҳи аъзоси:

— Янги йил, айниқса, биз нуронийлар учун жуда файзли ва баракали бошланди. Президентимизнинг Ўзбекистон фахрийларини ижтимоий қўллаб-қувватлаш «Нуроний» жамғармаси фаолиятини янада такомиллаштириш чора-тадбирлари тўғрисидаги Фармони мамлакатимиздаги минглаб кексаларнинг кўнглини тоғдек кўтарди.

Ҳаёт синовидан ўтган бир ҳақиқат бор. Қайси жамиятда фахрийлар эъзозланса, кексалар ҳурмат-эътибор кўрса, ёши улуғ инсонларга кўмак берилса, ўша мамлакатда тараққиёт, ривожланиш, ўсиш бўлади.

Бу Фармонда белгиланган вазифаларнинг қадри юксак. Чунки мазкур ҳужжат орқали «Нуроний» жамғармасининг фаолияти янада кенгаяди ва жонланади. Ходимлар моддий ва маънавий жиҳатдан рағбатлантирилади.

Шарқона менталитетга кўра, оилавий ҳаётда кексаларнинг ўрни беқиёс. Ҳар қандай юмуш олдидан, энг аввало, оиланинг каттасидан маслаҳат олинади, рухсат сўралади. Ёш авлод тарбиясида нуронийларнинг ўрни ва аҳамиятини ҳеч нарса билан қиёслаб бўлмайди.

Аммо ҳозир жамият ва оилада уларнинг таъсири бироз сусайгандек, назаримда. Ушбу Фармон нафақат жам­ғарма фаолиятини тубдан такомиллаштиради, балки кексаларимизнинг маҳалла ҳамда оиладаги мавқеини янада оширишга, уларнинг ҳурмат-иззатини жойига қўйишга хизмат қилади, деб ўйлайман.

 

Шокир БОЛТАЕВ, Сурхондарё вилояти Бойсун туманидаги 6-умумтаълим мактаби директори ўринбосари:

2017-2021 йилларда мактабгача таълим тизимини янада такомиллаштириш чора-тадбирлари тўғрисидаги Президент Қарори 2016 йилнинг сўнгги кунларида қабул қилинган энг муҳим ҳужжатлардан бири бўлди. Албатта, жамиятда таълим-тарбия тизимини мукаммал йўлга қўймай туриб, бошқа соҳаларни ривожлантириб бўлмайди.

Педагог бўлганим учун болаларни кўп кузатаман. Уларнинг дунёқараши ва билимга қизиқишини оширишда мактабгача таълим тизими беқиёс аҳамият касб этади. Чунки мактабгача таълим тўғри йўлга қўйилса, болаларнинг кейинги ривожланиши юқори даражади бўлади. Болалар боғчасида тарбияланган ўқувчи бошланғич синфларданоқ ўз фикрини эркин билдиради, қизиқиши ва интилиши билан тенгдошларидан ажралиб туради. Буни ўз фаолиятимда кўп кузатганман.

Қарорда алоҳида қайд этилганидек, мактабгача таълим муассасаларида 5-6 ёшдаги болаларни мактаб таълимига тайёрлаш бўйича 6100 қисқа муддатли гуруҳлар ташкил этилади. Бу жуда муҳим аҳамиятга эга.

Фикримча, мазкур гуруҳлар фаолиятини юритишда мактаблардаги бошланғич синф ўқитувчилари билан ҳамкорлик ўрнатиш зарур. Шунда болаларни мактабга тўлиқ тайёрлашда яхши натижаларга эришилади.

Бир сўз билан айтганда, қарор мактабгача таълим муассасалари фаолиятини ҳам моддий, ҳам маънавий жиҳатдан қўллаб-қувватлаш, қолаверса, таълим тизимидаги энг биринчи ва энг муҳим бўғин ишини янги босқичга кўтаради.

 

Дилшод ШУКУРОВ, Санъатшунослик илмий-тадқиқот институти кичик илмий ходими:

Янги йилни илм-фан фидойилари, олимлар ҳам катта қувонч ва мамнуният билан кутиб олди. Чунки байрам арафасида Президентимиз мамлакатимизнинг етакчи илм-фан намояндалари билан учрашди, ўз фикр-мулоҳазаларини билдирди.

Албатта, ҳар қайси соҳанинг тараққиётини илм-фан ютуқларисиз тасаввур қилиб бўлмайди. Қолаверса, жамиятда мавжуд муаммоларни бартараф этишда ҳам айнан шу соҳа муҳим ўрин тутади. Шу боис мамлакатимизда илм-фан ривожи, олимлар, тадқиқотчиларни қўллаб-қувватлашга алоҳида эътибор қаратилмоқда.

Президентимизнинг яқинда қабул қилинган Ўзбекистон Фанлар академияси академиклари фаолиятини такомиллаштириш ва рағбатлантириш тўғрисидаги Фармонида соҳани ҳар томонлама тараққий эттириш бўйича муҳим вазифалар белгиланган.

Давлатимиз раҳбарининг учрашувда айтган фикрлари мени жуда тўлқинлантириб юборди. Айнан илм йўлидан кетганимдан, очиғи, фахрландим. Бироқ ҳали олдимизда улкан вазифалар турибди. Шахсан ўзим шу йили докторлик диссертациямни ҳимоя қилишни режалаштираяпман. Қатор илмий мақолаларим вақтли матбуот, интернет нашрлари ҳамда чет эл оммавий ахборот воситаларида эълон қилинди. Яна айримлари чоп этилиш арафасида.

Айтмоқчи бўлган фикрим шуки, илм-фанга берилаётган бундай эътибор менга ўхшаган ёш олимларни янада руҳлантиради, кучига-куч, ғайратига-ғайрат қўшади. Эртага сафимиз янада кенгаяди. Ўзбекистонимиз тараққиёти учун бел боғлаб, астойдил меҳнат қиламиз.

 

«Ўзбекистон овози» мухбири

Нурали ОРИПОВ ёзиб олди.


Фикр ва мулохазалар

Защита от автоматических сообщений

Сўнгги янгиликлар: