05.01.2017

ҚУТЛУҒ ВА БАРАКАЛИ ЙИЛ ОРЗУСИ

Янги йил оқшомида бутун оила аъзолари жамул-жам бўлиб, Президентимиз табригини ҳаяжон билан тингладик. Табрикдаги самимий тилаклар кўнглимиздаги орзу-ниятларимизга қўшилиб, эртанги кунга ишончимизни янада оширди. Тинчлик, барқарорлик, ўзаро ҳурмат, меҳр-оқибат тўғрисида билдирилган фикрларни тўла қўллаб-қувватлаймиз. Чунки олий мақсадимиз ҳам шу аслида, тинч-тотув яшаш, бир-биримизга меҳр-оқибат кўрсатиш, бун­ёдкорлик ишлари билан шуғулланишдир.

Айниқса, табрикдаги «2017 йилнинг қадами жонажон Ватанимизга қутлуғ ва баракали келсин», деган тилак ҳаммамизнинг дил изҳоримиз бўлди, десам хато қилмайман. Аммо тўғрисини айтиш керак, бу орзу ниятга ўз-ўзидан эришилмайди. Бунинг учун меҳнат қилиш керак бўлади. Меҳнат кишини улуғлайди, деган мақол ҳақиқатлигини ўз ҳаётим мисолида кўрдим. Кўп йиллик тажрибаларимдан келиб чиқиб айтадиган бўлсам, қишлоқ хўжалигидаги қатор масалаларда туб ўзгаришлар қилиш вақти келди. Аввало, ризқ-рўзимиз манбаи бўлган ерни асраб-авайлашимиз керак. Тупроқ унумдорлиги пасайиб кетаётганига ҳар доим ҳам эътибор бермаяпмиз. Қишлоқ хўжалигига агро­ким­ёвий ҳамда техник хизмат кўрсатиш ишларини янада такомиллаштиришимиз керак, деб ўйлайман.

 Бундан ташқари, алмашлаб экишни кенгроқ жорий қилиш лозим. Бунинг фойдасини ўз тажрибамдан биламан. Биз 86 гектар ерда деҳқончилик қиляпмиз. Ўтган йили ғалла ва пахта топшириш шартнома мажбуриятини ошириб бажардик. Ғалладан бўшаган 12 гектар ерга мош, сабзи ва бош­қа экинлар экдик, яхшигина ҳосил олдик. Хўжалик аъзоларининг рўзғорини таъминладик, ортган маҳсулотни бозорга чиқариб сотдик. Кузда 2 гектар ерга пиёз уруғини сочган эдик, ҳозир ниҳоллари яхши кўкарган. Жами 110 уя асаларимиз, 18 бош зотли молимиз бор. Ушбу соҳаларни янада ривожлантирамиз.

Сабзавот экинлари орасида энг сер­ҳосил, харидоргир ва сердаромад маҳсулот помидор ҳисобланади. Аммо кейинги йилларда Шаҳрисабз, Китоб, Яккабоғ туманларида умуман помидор ўстириб бўлмаяпти. Қандайдир касаллик сабабли помидор ниҳоли нобуд бўлиб кетмоқда. Ушбу муаммони селекциячи олимларимиз, тад­қиқотчи агрономларимиз тезроқ ҳал қилиб беришса, помидорни катта майдонларга экиш, мўл ҳосил олиш, халқимизни таъминлаш ва экспортга чиқариш имконига эга бўлардик.

Хуллас, ҳар бир соҳадаги муаммоларни ўз вақтида ҳал қилиб, ташаббус кўрсатиб, ёниб ишласак, бир тан бир жон бўлиб яшасак, йилимиз қутлуғ ва баракали келади. Халқимиз дастурхони тўкин, ҳаётимиз файзли бўлади, юртимиз янада гуллаб-яшнайди.

 

Абдимурод БОЗОРОВ,

Қашқадарё вилояти Қамаши туманидаги «Бозор ўғли Абди» фермер хўжалиги раиси,

Ўзбекистон Қаҳрамони,

Олий Мажлис Сенати аъзоси.



DB query error.
Please try later.