05.01.2017

ЎЗБЕКИСТОННИНГ ИҲТ ДОИРАСИДАГИ ТАШАББУСЛАРИ ВАШИНГТОНДА МУҲОКАМА ЭТИЛДИ

Мамлакатимизнинг Вашингтондаги элчихонасида Америка Қўшма Штатлари ва Ислом ҳамкорлик ташкилоти ўртасидаги биринчи маслаҳатлашув мулоқоти ҳамда Ўзбекистоннинг ИҲТ Ташқи ишлар вазирлари кенгашидаги раислиги мавзусига бағишланган тадбир бўлиб ўтди.

Учрашувда ИҲТ билан маслаҳатлашувга жалб этилган Америка маъмурияти, Ислом ҳамкорлик ташкилотининг катта даражадаги вакиллари ҳамда АҚШда аккредитациядан ўтган ИҲТга аъзо давлатлар дипломатия миссияларининг раҳбарлари иштирок этдилар.

Тадбир чоғида унинг қатнашчилари 18-19 октябрь кунлари Тошкент шаҳрида бўлиб ўтган Ислом ҳамкорлик ташкилоти Ташқи ишлар вазирлари кенгашининг 43-сессияси якунлари ҳамда Ўзбекистоннинг бу тизимда раислигидаги устуворликлар билан батафсил танишдилар. Мамлакатимиз томонидан таклиф этилган сессия кун тартибининг асосий ғояси — «Таълим ва маърифат — тинчлик ва бунёдкорлик сари йўл» шиорининг мазмун ва моҳияти тилга олинди. Шунингдек, республикамиз раҳбариятининг ташкилот доирасида, жумладан, Ўзбекистоннинг бой маданий-тарихий ва маънавий мероси ҳисобга олинган ҳолда ислом динига хос бўлган маърифат ва бағрикенглик қадриятларини илгари суришга бўлган интилиши алоҳида таъкидланди.

Юқоридагилар билан бирга, тадбир қатнашчилари Ўзбекистон раҳбари Шавкат Мирзиёевнинг Ислом ҳамкорлик ташкилоти Таш­қи ишлар вазирлари кенгашининг Тошкентда бўлиб ўтган сессиясининг очилиш маросимидаги нутқида ўз ифодасини топган муҳим жиҳатлар, жумладан, ташкилот шафеълигида Самар­қандда Имом Бухорий халқаро тадқиқот марказини ҳамда Тошкент ислом университети таркибида Таълим, фан ва маданият масалалари бўйича ислом ташкилотининг (ISESCO) махсус кафедрасини ташкил этиш ташаббуслари билан ҳам танишдилар.

Учрашувда Ўзбекистонда шаффофлик шароитида, барча демократия тамойилларига риоя этилган ҳолда ўтган Президент сайловининг якунлари ҳам муҳокама этилди. Таъкидланганидек, Ўзбекистон Республикаси ташқи сиёсатнинг асосини тинчликпарварлик, бошқа давлатларнинг ички ишларига аралашмаслик, юзага келадиган зиддият ва қарама-қаршиликларни фақат тинч, сиёсий йўл билан ҳал этиш, мамлакатимизнинг бошқа давлатлар ҳамда халқаро ташкилотлар билан очиқ ва прагматик муносабатларга содиқ эканлиги таъкидланди.

Тадбирда сўзга чиққан Америка Қўшма Штатларининг ИҲТдаги махсус вакили вазифасини бажарувчиси А.Сулеман элчихонада ушбу тадбирни ташкил этгани ва самимий меҳмондўстлик учун ўзбек томонига миннатдорлик билдирди.

— Яқинда Ислом ҳамкорлик ташкилоти Ташқи ишлар вазирлари кенгашининг Тошкентда бўлиб ўтган сессиясида қатнашиш учун Ўзбекистонга уюштирган сафарим доирасида жаҳон цивилизациясининг ганжиналари ҳисобланадиган Самарқанд ва Бухорога боришга муяссар бўлдим. Турли кучлар халқ­лар ўртасига низо-нифоқ солишга уринаётган ҳозирги давр­да Ўзбекистоннинг маънавий мероси улкан аҳамият касб этади. Ана шундай маҳобатли шаҳарлар ўзларининг мавжудлиги билан дунёга бирдамлик ва бағрикенгликни сақлаш зарур эканлигини эслатиб туради. Уларда қарор топган илм масканлари жаҳонга буюк олим ва мутафаккирларни етказиб берди, уларнинг илмий кашфиётлари инсоният цивилизацияси салмоқ билан ривожланишига кўмаклашди. Бугун биз дунё­да турли интилишлар мавжуд бўлганига қарамасдан бу меросни авайлаб асрашимиз зарур.

Шунингдек, А.Сулеман АҚШ ва ИҲТ ўртасидаги биринчи маслаҳатлашув муваффақиятли ўтганини қайд этди. Турли низоларни ҳал этиш ва экстремизм билан курашишдан тортиб (ўқитиш ва диний арбоблар нуфузини ошириш, интернетда радикал ғоялар тарқатилишига қарши туриш, ёшлар учун маърифий дастурларни йўлга қўйиш) то гуманитар инқирозларни барқарорлаштириш (кенг ҳудудларга тар­қаладиган эпидемик касалликларга қарши кураш, донорларни жалб этиш, инсонпарварлик ёрдамларини тарқатиш) сингари аниқ-равшан соҳаларда томонларнинг ўзаро ҳамкорлик қилиши тилга олинди.

Учрашув доирасида ўзининг бой меросидан, жумладан, диний тадқиқотлар соҳасидаги меросидан фаол фойдаланиш юзасидан Ўзбекистоннинг жаҳон ҳамжамиятига таклифларига катта қизиқиш билдирилди. Тошкент­нинг мазкур ташкилот доирасидаги таклифлари ўз вақтида илгари сурилгани ва уларнинг моҳиятан янги эканлиги, жумладан, Имом Бухорий халқ­аро тадқиқот марказининг таш­кил этилиши ҳамда маърифий, бағрикенг ислом тарғиботига катта аҳамият берилаётгани таъкидланди. Кўпгина мусулмон мамлакатлари аҳолига диний таълим бериш тизимини модернизациялаш ва янгилашга эҳтиёж сезиб турган бир даврда бу масалаларнинг долзарблиги янада ошиши алоҳида қайд этилди. ИҲТ ҳудудида ёшларнинг радикаллашуви муаммоси, жумладан, исломшунослар етарли малакага эга эмаслиги туфайли сифатли диний таълимга эҳтиёж ортиб бормоқда.

Шунингдек, Ўзбекистон Ғарб мамлакатлари ўртасида ҳақиқий ислом қадриятлари ва тамойилларини илгари суришда алоҳида ўрин тутиши ҳам эътироф этилди. Қайд қилинганидек, бунинг сабаби дунёвий давлат ҳисобланадиган мамлакатимиз маданий-тарихий меросни авайлаб асрашга улкан эътибор қаратаётгани, катта қисмини мусулмонлар ташкил этадиган республикамиз аҳолиси эса ҳақиқий ислом издошларининг энг яхши намунаси бўлиб хизмат қилиши билан изоҳланади.

 

«Жаҳон» АА,

 Вашингтон.


Фикр ва мулохазалар

Защита от автоматических сообщений

Сўнгги янгиликлар: