01.01.2017

ЎЗБЕКИСТОН РЕСПУБЛИКАСИ ФУҚАРОСИМАН ВА БУНДАН ФАХРЛАНАМАН

Президентимиз фармонига асосан «Ўзбекистон Республикасининг фуқаролиги тўғрисида»ги Қонун кучга кирган вақтда турли объектив ва бошқа ҳаётий вазиятларга кўра чет элда бўлган республиканинг маҳаллий аҳолиси орасидан 179 нафари Ўзбекистон Республикаси фуқаролигига қабул қилингани 2016 йилнинг энг муҳим воқеаларидан бири бўлди.

2016 йил мен учун, оиламиз учун энг бахтли йиллардан бири бўлди. Президентимизнинг Фармони билан Ўзбекистон Республикаси фуқаролигига қабул қилинганим ҳақидаги хабар кўксимни тоғдек кўтарди. Болаларим «Онажон, қутлуғ бўлсин!», дея қучоқ очишди. Олам кўзимга бошқача кўрина бошлади.

Мен улуғ юртнинг фуқаросиман, бу билан чексиз фахрланаман, деб ҳайқиргим келади. Маҳалла-кўй уйимизга табриклагани келганида оқибатли қўшниларим, қишлоқдошларимнинг хурсандчилигини кўриб, севинчим ичимга сиғмай кетди. Яширмайман, йиғладим, қувонч­ларимни, армонларимни тўкиб йиғладим. Ахир бу кунни қанчалар орзиқиб кутган эдик!..

Яккабоғ туманининг «Қатағон» қишлоқ фуқаролар йиғинига қарашли Нуғайли қишлоғида туғилиб, ўсганман. Ўқиб, муаллим бўлдим, анча йил ёшларга таълим бердим. 1983 йилда ҳам­қишлоғим ­Оллоберди Якубовга турмушга чиқдим. Гап шундаки, умр йўлдошим саксон иккинчи йилда Тошкент политехника инс­титутини битириб, консерва тайёрлаш бўйича муҳандислик ихтисослигини эгаллади. Уни йўл­ланма билан қўшни Туркманистоннинг Ашхабод шаҳридаги корхонага ишга юборишди. Мен ҳам турмуш ўртоғим билан бирга кетдим.

Ҳомиладор бўлганимда қайнонам «Болангни уйингда туғасан», деб қаттиқ туриб оларди. Икки ўғил ва икки қизим ўз юртимизда, она қишлоғимда туғилди. Орадан йиллар ўтди, 1998 йилда юртимизга қайтиб келдик. Умр йўлдошим боғбонлик билан машғул бўлди. Мен уй бекаси эдим. Фарзандларимиз улғайди. Катта қизим Соҳиба олий маълумотли, чет тили ўқитувчиси бўлди. Акмалжон яхши уста, уйлар қураяпти. Азизбек тадбиркор. Кенжам Сабрина коллежда таълим оляпти.

Менга ва умр йўлдошимга вақтинчалик паспорт берилган эди. Кўпинча ўзимни омонатдек сезардим. Фарзандларим ҳеч нарса дейишмаса ҳам, баъзан нега бизга вақтинчалик ҳужжат берилган, деб таъна қилгандай туюлаверарди. Ростига кўчсам, гўёки она қишлоғимда ўзимни бегонадек ҳис қилардим.

Менинг бахтим — оиламизнинг, фарзандларимизнинг бахти, қувончи. Ана шу бахтни ­инъом этгани учун Президентимизга раҳматлар айтаман. Оиламиз ва фарзандларим билан юртимиз, халқимизга сидқидилдан хизмат қиламиз.

Фурсатдан фойдаланиб, барча юртдошларимизни Янги йил билан қутлайман. Илоҳо, кириб келаётган йил ўзи билан қут-барака, яхшиликлар олиб келсин. ­Ватанимиз янада юксалсин. Бундан-да яхши, қутлуғ кунларни кўриб яшаш ҳаммамизга насиб этсин!

 

Саида ЭРНАЗАРОВА,

Ўзбекистон Республикаси фуқароси,

Қашқадарё вилояти, Яккабоғ тумани.



DB query error.
Please try later.