01.01.2017

НУРОНИЙЛАРГА ҒАМХЎРЛИК КЎРСАТИШ — ИНСОНИЙ БУРЧИМИЗ

Феруза ЭШМАТОВА, Олий Мажлис Қонунчилик палатаси депутати, Ўзбекистон ХДП фракцияси аъзоси:

— Одам ёши ўтган сари меҳрга, эътиборга кўпроқ эҳтиёж сезади. Ҳаётда кўриб-кузатганлари, чиқарган сабоқ ва хулосаларини фарзандлари, набираларига айтгиси келади.

Янги йил арафасида қабул қилган «Ўзбекистон фахрийларини ижтимоий қўллаб-қувватлаш «Нуроний» жамғармаси фаолиятини янада такомиллаштириш чора-тадбирлари тўғрисида»ги Фармон юртимиздаги барча отахону онахонларимизга энг қадрли байрам совғаси бўлди.

Фармонда кексаларни қўллаб-қувватлаш тизимини янада такомиллаштириш мақсадида қариялар ва фахрийларни ижтимоий ҳимоялаш, уларнинг фаоллигини ошириш, мамлакатнинг ижтимоий-сиёсий ҳаётида тўлақонли иштирок этишлари учун шарт-шароитлар яратиш бўйича муҳим вазифалар белгиланди.

Шунингдек, ёлғиз ва муҳтож кексаларга ижтимоий ва моддий кўмак кўрсатиш, «Нуронийлар маскани» комплексларини яратиш ва уларда ўқув заллари, ҳордиқ хоналари, даволаш физкультураси, овқатланиш хоналари ва тиббий кабинетларни ташкиллаштириш, бир сўз билан айт­ганда, ёшу улуғ инсонларга ҳар томонлама ҳурмат ва эъзоз-эҳтиром кўрсатиш, уларнинг саломатлигини тиклаш ишларини тубдан кучайтириш чора-тадбирлари қайд этилди.

Кексаларга ҳурмат кўр­сатиш хал­қимизнинг табиатига хос эзгу фазилатлардан. Нуронийларимизнинг панд-насиҳатлари ҳаётимизни ­безайди, нурли чеҳраси хонадонимизга файз киритади. Шунинг учун давлатимиз томонидан кексаларни эъзозлаш, ижтимоий муҳофаза қи­лиш мақсадида доимий равишда эътибор ва ғамхўр­лик кўрсатиб келинмоқда.

Ҳар қандай жамиятнинг ёши улуғ одамларга бўлган эътибори ва ғамхўрлиги унинг маънавиятини белгилайди. Содда қилиб айтганда, кексаларга ҳурмат-эҳтиром, меҳр-оқибат кўрсатиш ҳаётимизнинг ажралмас қисмига айланмоқда.

Ўз ҳаётини, оиласини пиру бадавлат ота-оналар, бобо-бувиларсиз тасаввур қила олмайдиган ўзбек ­халқи учун ушбу Фармоннинг аҳамияти ва қадри осмон қадар баланддир. Меҳр ва эътибор хонадонларимиз фариштаси бўлган нуронийларимизнинг умрига умр, кучига куч қўшади, уларга руҳий мадад бўлади.

Фармонда белгиланган вазифалар қандай ижро этилади? Имконият ва имтиёзлардан ёши улуғ кексаларимиз қай даражада фойдаланишади? Бундай саволлар доим партиямиз ташкилотлари ва депутатлар эътиборида турмоғи керак, деб ўйлайман. Негаки, нуроний кишилар асосан бизнинг электоратимиз вакиллари ҳисобланишади.

Ёлғиз кексалар, пенсионерларни безовта қилаётган ижтимоий-иқтисодий масалаларни ўрганиш, уларни мутасадди ташкилотлар вакиллари билан ҳамкорликда ижобий ҳал этиш, лозим бўлса, мазкур масалалар юзасидан давлат органлари раҳбарларининг ҳисоботларини мунтазам эшитишимиз зарур.

Бугун эришаётган ютуқларимизда ота-оналаримиз, мўътабар қария­ларимизнинг улкан хизмати бор. Шунинг учун улар олдида умрбод қарздор эканимизни унутмаслигимиз, қўлимиздан келганича нуронийларимизнинг оғирини енгил, умрини узоқ қилишни инсоний бурчимиз, деб билишимиз лозим.

Уларга мустаҳкам соғлиқ, узоқ умр тилайман.



DB query error.
Please try later.