27.12.2016

ШОИР ВА ЗАМОН

Ўзбекистон давлат жаҳон тиллари университетида Ўзбекистон Қаҳрамони, халқ шоири Эркин Воҳидов таваллудининг 80 йиллиги муносабати билан адабий-бадиий кеча ўтказилди.

Унда сўзга чиққан университет проректори Акбар Нурматов, профессорлар Баҳодир Каримов, Хуршид Дўстмуҳаммад, доцент Сайди ­Умиров ва бошқалар шоирнинг адабий-эстетик қарашлари, маърифати ва фазилатлари, адабий меросининг ёшлар тарбиясидаги аҳамияти ҳақида самимий фикрлар билдирди.

Зулфия номидаги Давлат мукофоти совриндорлари ва бошқа талабалар шоир шеьрларидан намуналар ўқишди, халқаро журналистика факультети талабалари эса ўзлари тайёрлаган саҳна асарларини намойиш этишди.

Учрашувда таъкидланганидек, ­Эркин Воҳидов шеърияти халқимиз қалбига сингиб кетган. Айниқса, ёшларимиз унинг кўплаб асарларини ёд билишади.

Мисол учун, исталган мактаб ўқувчиси олдида «Тарихингдир минг аср­лар...» деб шеър ўқишни бошласангиз, у завқ билан, ғурур билан давом эттиради.

Қаҳрамон шоиримиз ўзидан жуда бой маънавий мерос қолдириб кетди. Биз, ёшлар бу меросни чуқур ўрганишимиз, ундан сабоқ олмоғимиз зарур, деб ўйлайман.

 

Манзура ПАРВОЗ,

ЎзДЖТУ халқаро журналистика факультети талабаси.



DB query error.
Please try later.