27.12.2016

ЯНГИ ҚОНУН ЛОЙИҲАСИ

Ўзбекистон Республикаси Вазирлар Маҳкамасининг тегишли қарорига мувофиқ, «Темир йўл транспорти тўғрисида»ги қонунга ўзгартириш ва қўшимчалар киритишни назарда тутувчи қонун лойиҳаси ишлаб чиқилди. Ушбу ҳужжат лойиҳасининг мазмун-моҳиятини тушунтириш, талаб ва таклифларни ўрганиш мақсадида бир қатор вазирлик ва идоралар вакиллари иштирокида «Ўздавтемир­йўлназорат» инспекциясида йиғилиш бўлиб ўтди.

Мажлисда мутахассислар қонун лойиҳасининг афзалликлари, тизимда кутилаётган янгиликлар хусусида атрофлича маълумот беришди. Шу билан бирга, мутасадди ташкилот вакилларининг ахборотлари ҳам тингланди. Таъкидланганидек, қонун лойиҳаси темир йўл транспорти соҳасини янада ривожлантириш учун қўшимча шарт-шароитлар яратиш мақсадида тайёрланмоқда.

— Қонунга киритилаётган ўзгартишларга кўра, темир йўл транспорти объекти, инфратузилмаси, тизимдаги корхона, ташкилот ва муассасаларнинг мулки тўғрисидаги тушунчаларга аниқлик киритилмоқда, — дейди «Ўзбекис­тон темир йўллари» АЖ юридик бош­қармаси мутахассиси Алишер Олламов. — Шу билан бирга, темир йўл транспорти соҳасида давлат бошқаруви ва назорат органларининг ваколатлари аниқ белгилаб қўйилмоқда. Шуни ҳам қайд этиш керакки, махсус ваколатли хўжалик бошқарув органларининг ваколатлари қонунда биринчи марта белгилаб бериляпти.

Тадбир иштирокчилари мавзу доирасида ўзаро фикр алмашишди ва галдаги ишлар белгилаб олинди. Шунинг­дек, қонун лойиҳаси ҳар томонлама муҳокама этилиб, уни такомиллаштириш юзасидан таклиф ва тавсиялар ишлаб чиқилди.

 

Жамшид ШЕРМЕТОВ



DB query error.
Please try later.