20.12.2016

МАЪҚУЛ ВА МАНЗУР РЕЖАЛАР

Ўзбекистон Республикаси Конс­титуцияси қабул қилинган санани умумхалқ байрами сифатида нишонлаш мамлакатимизда қутлуғ анъанага айланиб қолди. Бутун халқимиз ушбу байрам арафасида ўтадиган тантанали йиғилишни орзиқиш билан кутади.

Чунки ушбу анжуманда ўтаётган йил давомида қилинган ишлар сарҳисоб этилиб, Янги йилга ном берилади.

Хусусан, 2017 йилнинг Халқ билан мулоқот ва инсон манфатлари йили, деб эълон қилинишида катта маъно бор. Демак, давлат органларининг фуқаролар билан муносабатлари тубдан яхшиланади. Бошқача қилиб айтганда, бу борада амалга ошириладиган ишлар аҳолининг давлат ва жамиятга ишончини янада мустаҳкамлашга хизмат қилади.

Айни пайтда иқтисодий, ижти­моий, ҳуқуқий, маданий-маърифий соҳаларда амалга ошириладиган барча ишлар мамлакатимиз фуқароларининг манфаатларини ҳимоялашга, ҳаётидан рози бўлиб яшашига хизмат қилади.

Мен оддий фермерман. Шу билан биргаликда, ер ва мулкнинг, меҳнатим туфайли орттирилган даромад ва фойданинг эгасиман. Шунинг учун жамия­тимиздаги ўзгаришларга, янгиланишларга фермер нуқтаи назаридан, қишлоқда яшайдиган фуқаро нуқтаи назаридан қарайман ва баҳо бераман.

Бош қомусимиз қабул қилинган куннинг 24 йиллигига бағишланган тантанали йиғилишда Ўзбекистон ­Республикаси Президенти Шавкат ­Мирзиёевнинг маърузасини диққат билан тингладим. Ҳал қилиниши керак бўлган вазифаларнинг кўлами кенг, миқёси катта эканига яна бир бор иқрор бўлдим.

Маърузада аҳолимизнинг ярмидан кўпи яшайдиган қишлоқ жойларда ҳаёт даражаси ва сифатини оширишга қаратилган фикрларни диққат билан эшитдим, матбуотда ўқидим. Айниқса, хом­ашёни, энг аввало, пахта хомашёсини чуқур қайта ишлаш бўйича аниқ режалар белгиланмоқда, деган сўзлар менга ҳам, фермер хўжалигимиз аъзоларига ҳам, жуда маъқул тушди.

34 кишилик жамоамиз 265 гектар майдонда пахта ва ғалла етиштиради. Ҳар йили шартномавий мажбуриятларни ошириб бажариб келаяпмиз. Лекин ҳосилдорликнинг ҳам чегараси бор. Фақат ердан чиққан ҳосилни сотиш билан шуғулланадиган бўлсак, турмушимизда жиддий ўзгариш бўлмайди.

Демак, бундан кейин илғор технологияларни жорий этишга, етиштирган ҳосилни қайта ишлаш ва унинг тайёр маҳсулот сифатида жаҳон бозорида сотилишига ҳам эътибор қаратишимиз лозим.

Шундагина даромад ортади, деҳ­қоннинг турмуши янада фаровонлашади. Бир сўз билан айтганда, инсон манфаатларининг ҳимояси кучаяди.

 

Элибой ТАНИЕВ,

Пастдарғом туманидаги «Умсин момо» фермер хўжалиги раҳбари,

 Ўзбекистон Республикасида хизмат кўрсатган пахтакор, ЎзХДП фаоли.



DB query error.
Please try later.