13.12.2016

ИМПОРТ ЎРНИНИ БОСУВЧИ МАҲСУЛОТЛАР ЎЗИМИЗДА ТАЙЁРЛАНМОҚДА

Истиқлол йилларида Навоий вилоятида ҳам енгил саноат соҳаси жадал ривожланди. Ишлаб чиқаришда кенг кўламли модернизация ишлари амалга оширилиб, салмоқли натижаларга эришилди.

Ўтган даврда вилоятда етиштирилаётган пахта толасини қайта ишлайдиган 4 корхона, йилига 9 минг тонна ип-калава ишлаб чиқарувчи «Бахт-текстиль» қўшма корхонаси, 3 минг тонна маҳсулот ишлаб чиқарувчи «Бизнес Азия» масъулияти чекланган жамияти модернизация қилинди. Йилига 6,3 минг тонна пахта толасини қайта ишлаш қувватига эга «Навбаҳор-текстиль» чет эл корхонаси янгидан ташкил этилди. Нав­баҳор туманида «Bright Navoi Textile» қўшма корхонаси фаолияти йўлга қўйилди. Бугунги кунда ушбу корхоналарда мингдан зиёд хотин-қиз меҳнат қилмоқда.

Ҳозирда вилоятда етиштирилаётган пахта толасининг қарийб 64,5 фоизи шу ернинг ўзида қайта ишланаётгани қувонарлидир.

Бугунги кунда маҳаллийлаштириш дастури асосида 50 дан ортиқ лойиҳа бўйича янги турдаги маҳсулотлар ишлаб чиқарилмоқда. Кейинги 5 йилда вилоят корхоналари томонидан импорт ўрнини босувчи маҳсулотлар ишлаб чиқариш кўламини кенгайтириш ҳисобидан 573,5 миллион доллар валюта тежалишига эришилди. Вилоятда мақсадли дастурлар амалга оширилиши эвазига янги турдаги тикув-трикотаж, ип-газлама, шприц, иситиш батареялари, металлпрофнастил, гипсокартон, металл черепица, керамик плита ва лак-бўёқ маҳсулотлари ишлаб чиқариш йўлга қўйилди.

Навоий кон-металлургия комбинатига қарашли «Агама» трикотаж-тўқимачилик фабрикаси юртимиз енгил саноатида ўз мавқеига эга.

350 нафарга яқин хотин-қиз меҳнат қилаётган мазкур фабрика комбинат бўлинмаларини махсус иш кийимлари билан таъминлаб келмоқда. Корхона йилига 9 миллиард сўмлик маҳсулот ишлаб чиқариш қувватига эга.

Бугунги кунда «Агама»да нафақат буюртма асосида махсус иш кийимлари, балки барча талабларга жавоб берадиган, сифатли, замонавий андозалардаги, ҳар томонлама қулай бўлган аёллар ва эркаклар, болалар учун мавсумий кийимлар, қишки куртка, кўрпа-ёстиқлар тайёрланмоқда.

Ҳар йили Навоий кончилик ҳамда Зарафшон компьютер технологиялари касб-ҳунар коллежини битирган йигит-қизларнинг кўпчилиги ушбу фабрикада мустақил иш фаолиятини бошламоқда.

 

Илҳом САТТОРОВ,

«Ўзбекистон овози» мухбири.



DB query error.
Please try later.