10.12.2016

«ЎЗБЕКИСТОНДА САЙЛОВ ДЕМОКРАТИК РУҲДА ЎТДИ»

Бу хорижлик кузатувчиларнинг фикри

Лихтер Волфганг Диетмар, Европада Хавфсизлик ва Ҳамкорлик ташкилоти миссия­си аъзоси (Германия):

 — Сайлов кунигача Сурхондарё вилоятида бўлдим. 9-Сурхондарё сайлов округи ва жойлардаги участка сайлов комиссиялари фаолияти билан яқиндан танишдик. Шароитларни ўргандик. Сиёсий тадбирга алоҳида тайёргарлик кўрилганига гувоҳ бўлдик. Одамлар кўтаринки кайфиятда, ёшлар чеҳрасида қувонч. Нафақат туман ва шаҳар марказлари, балки чекка ҳудудлардаги участкалар ҳам замонавий техникалар билан таъминланган. Оналар ва болалар, тиббиёт хоналари ташкил қилинган. Кексалар ва ногиронлар алоҳида эътиборда.

 

Заведникова Жана, Европада Хавфсизлик ва Ҳамкорлик ташкилоти миссияси аъзоси (Чехия):

— Сурхондарёга биринчи марта келишим. Серқуёш воҳа мени ўзига мафтун этди. Жойларда бизни алоҳида ҳурмат ва эҳтиром билан қарши олишди. Меҳмондўст, очиқкўнгил халқингизнинг урф-одатлари билан танишишга ҳам улгурдим. Одамлар байрамона кайфиятда. Миллат давомчилари бўлган ёшларнинг юзида эртанги кунга ишонч бор.

Сайлов ҳар жиҳатдан демократик руҳда ўтди, деб айтишим мумкин. Тили, дини ва жинсидан қатъи назар, овоз беришда ҳеч кимга монелик қилингани йўқ. Муҳим тадбирда кўплаб хорижлик кузатувчилар иштирок этгани жаҳон Ўзбекистонга қизиқиш билдираётганидан далолат беради. Осмони мусаффо, юрти тинч, дастурхони тўкин элга барча-барчанинг ҳаваси баланд. Хулоса қилиб айтганда, мамлакатдаги сайлов очиқ, ошкора, жаҳон андозаларига мос ва хос ўтгани мени қувонтирди.

 

«Ўзбекистон овози» мухбири

Абдумалик ҲАЙДАРОВ

ёзиб олди.



DB query error.
Please try later.