05.12.2016

«ТОШКЕНТ ДУНЁНИНГ ЭНГ ГЎЗАЛ ШАҲРИ,

деб ишонч билан айта оламан»

Сайлов муносабати билан мамлакатимизга келган халқаро кузатувчилар, хорижлик журналистлар турли сайлов участкаларида бўлишди. Сайловчилар учун яратилган шароитлар билан танишишди, ҳамюртларимизнинг сайловга муносабатини кузатишди.

Улардан айримлари таҳририятимиз меҳмони бўлишди.

Кеча исроиллик халқаро кузатувчи Эдуард Якубов ва таниқли журналист Виктория Мартинова таҳририятимизга ташриф буюришди. Улар Ўзбекистонда истиқлол йилларида барча соҳаларда эришилган ютуқларни эътироф этишди. Хусусан, бунёдкорлик ишларига юксак баҳо беришди.

— Мен дунёнинг кўплаб мамлакатларида бўлганман, турли шаҳарларни кўрганман. Лекин Тошкентдагидек миллийлик ва замонавийлик уйғунлашиб кетган, кенг кўчаларга эга, дарахти кўп, озода шаҳарни кўрмаганман. Тошкент дунёнинг энг гўзал шаҳри, деб ишонч билан айта оламан, — деди ­халқаро кузатувчи, Холон техника институти президенти, профессор Эдуард Якубов. — Бундай гўзал ватанда яшаётганларни чинакам бахтли инсонлар, деб биламан. Буни бугун кўтаринки кайфият билан, ёш болаларини етаклаганча овоз беришга келган одамларнинг юз-кўзларидан ҳам кўриш мумкин. Улар сайловга нима учун келаётгани, келажак уларнинг овозига боғлиқ экани ва улар танлаган номзод мамлакатни тараққиётнинг янги босқичига олиб чиқишини яхши билишади.

Эрталаб Москва давлат университетининг Тошкентдаги филиали биносида жойлашган сайлов участкасига борганимизда 80 фоиздан ортиқ сайловчи овоз бериб бўлганини кўрдик. Эски шаҳардаги 111-умумтаълим мактабида ва яна бир қанча сайлов участкаларида бўлдик. Одамлар овоз бериш учун навбат кутиб турганига қойил қолдим. Чунки сайловчилар сайловнинг натижаси уларга боғлиқ эканини яхши англашади.

Тўғри, Ўзбекистон учун 2016 йил оғир келди. Ўзининг Биринчи Президентидан жудо бўлган халқ учун бу сайловни ўтказиш осон эмас, албатта. Ислом Каримов танлаган йўл қанчалар тўғри эканини бугун бутун дунё тан олмоқда. Бутунлай янги мамлакатни ҳеч қандай ташқи кучлар, ёрдамисиз оёққа туришида, умуман, янги давлат барпо этишда унинг меҳнатлари беқиёс.

Яна бир муҳим жиҳатни тан олиш керак. Юртингизда ҳукм сураётган тинчлик ва осойишталикни ҳеч нарсага тенглаштириб бўлмайди. Бугунги сайлов эса халқингизнинг бирлигини, Ислом Каримов ғоялари барҳаётлигини кўрсатди.

— Албатта, мен ҳам профессорнинг гапларига қўшилган ҳолда, айтишим керакки, 25 йил ичида баркамол авлодни вояга етказиш, ҳар бир соҳада улкан ўзгаришларга эришиш учун катта куч, меҳнат ҳамда жасорат талаб этилади, — деди журналист Виктория Мартинова. — Юртингизда санъатга ва маданиятга, спорт, илм-фан ривожи, умуман, ҳар бир соҳа бўйича алоҳида дастурлар ишлаб чиқилиб, уни бос­қичма-босқич ривожлантиришга эътибор бериляпти. Бу кўплаб давлатлар учун ўрнак бўлса арзийди.

Мен Урганч шаҳридаги сайлов участкаларида бўлдим. ­Урганчни эски бинолардан, асосан, бир қаватли уйлардан иборат шаҳар сифатида тасаввур қилган эдим. Адашган эканман. Янги ва замонавий шаҳар мени мафтун этди.

Шунингдек, сайловни ёритадиган журналистлар учун яратилган шароитларга ҳам тўхталиб ўтишни истардим. Айниқса, Тошкентда ташкил этилган Пресс клуб юқори савияда иш олиб бормоқда. Энг замонавий техникалар билан таъминланган. Бунинг ўзи ҳам сайловнинг демократик принципларга мос равишда ўтказилганидан далолат беради.

 

Зилола УБАЙДУЛЛАЕВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: