26.11.2016

ХОТИН-ҚИЗЛАР САЙЛОВ ЖАРАЁНЛАРИДА ФАОЛ ҚАТНАШМОҚДА

Бугун бутун дунёда хотин-қизларнинг сиёсий жараёнлардаги иштироки тобора ортиб бормоқда. Буни мамлакатимиздаги сайлов жараёнларида ҳам кузатиш мумкин. Сайлов кампанияси пайтида қонунийликни таъминлашда опа-сингилларимизнинг сайлов органларида, партия фаолияти ва сайлов кампаниясини олиб боришда, сайловчиларнинг ҳуқуқий мадания­тини оширишда фаол қатнашиши муҳим аҳамият касб этади.

Ўзбекистон ХДП Тошкент шаҳар кенгаши, Тошкент шаҳар ҳокимлиги, Хотин қизлар қўмитаси ҳамкорлигида Тошкент тиббиёт академиясида ўтказилган тадбирда шу ҳақда фикр юритилди.

Таъкидландики, Президент сайловига тайёргарликнинг барча босқ­ичида опа-сингилларимиз юксак фаолликни намойиш этаётгани ниҳоятда қувонарлидир. Чунки бунинг учун юртимизда барча шарт-шароит яратилган. Мамлакатимиз Конституциясида барча фуқаролар бир хил ҳуқуқ ва эркинликларга эга бўлиб, жинси, ирқи, миллати, тили, дини, ижтимоий келиб чиқиши, эътиқоди, шахси ва ижтимоий мавқеидан қатъи назар, қонун олдида тенг эканлиги мустаҳкамлаб қўйилган.

— Айни пайтда Ўзбекистон Республикаси Президенти сайловини ўтказувчи округ сайлов комиссиялари таркибида аёллар 36,8 фоизни ташкил қилади, — дейди Тошкент шаҳар ҳокими ўринбосари, шаҳар Хотин-қизлар қўмитаси раиси Фарида ­Абдураҳмонова. — Тошкент шаҳридаги сайловга тайёргарлик кўриш ва овоз беришни бевосита ташкил қилиш зиммасига юклатилган участка сайлов комиссиялари аъзоларининг 50 фоиздан ортиғи аёллардан иборат. Уларнинг аксарияти аҳоли, айниқса, ёшлар орасида катта обрўга эга бўлган, овоз беришда ҳар бир сайловчи иштирокининг муҳимлигини тушунтира оладиган педагог-ўқитувчилардир.

Мамлакатимизда 21 миллион 435 минг нафардан зиёд сайловчи рўйхатга олинган бўлса, уларнинг 10 миллион 825 минг нафардан ортиғи аёллар, 555 мингдан зиёди эса биринчи марта овоз берадиган ёшлардир. Тошкент шаҳрида 35 минг 600 нафардан ортиқ биринчи марта овоз берадиган сайловчи рўйхатга олинган бўлса, уларнинг 17 300 нафардан ортиғини хотин-қизлар ташкил этмоқда.

— Мен бу йил биринчи бор Ўзбекистон Республикаси Президенти сайловида иштирок этаман, — дейди Тошкент тиббиёт академияси 1-курс талабаси ­Гулираъно Хўшбоқова. — Бу менга ғурур ва ифтихор бағишлайди. Ҳозир биз сайлов жараёнлари ҳақида кўпроқ маълумотлар олишга ҳаракат қиляпмиз. Номзодларнинг сайловолди дастурлари билан яқиндан танишаяпман. Сайлов жараёнларида фаол қатнашиш орқали нафақат сиёсий ҳуқуқимиздан фойдаланамиз, шу билан бирга, мамлакатимиз истиқболи, тараққиёт йўллари ҳақида фикримиз, тушунчамизни кенгайтириш имконига эга бўламиз. Демак, сайлов биз ёшлар учун ҳар томонлама муҳим воқеадир.

Тадбирда, шунингдек, халқ депутатлари Тошкент шаҳар Кенгаши депутатлари, партия фаоллари сайлов жараёнлари, сайловга оид қонунчилик ҳақида атрофлича маълумот беришди.

 

Гулруҳ ОДАШБОЕВА,

«Ўзбекистон овози» мухбири.



DB query error.
Please try later.