24.11.2016

ДАВЛАТ БЮДЖЕТИ ИЖРОСИ КЎРИБ ЧИҚИЛДИ

Олий Мажлис Қонунчилик палатасидаги Ўзбекистон ХДП фракциясининг навбатдаги йиғилишида Ўзбекистон Республикаси Давлат бюджетининг ва давлат мақсадли жамғармалари бюджетларининг жорий йилдаги 9 ойлик якунлари ижроси тўғрисидаги масала қизғин муҳокама этилди.

Таъкидландики, Давлат бюджетида ижтимоий соҳани қўллаб-қувватлаш, аҳо­лининг турмуш даражасини ошириш ва ижтимоий ҳимоясини таъминлашга қаратилган маблағлар ҳажми йилдан-йилга ошиб бормоқда. Бу мамлакатимизда амалга оширилаётган ислоҳотларнинг ижтимоий йў­нал­­тирилганлиги кучаяётганидан далолат беради.

Ҳисобот даврида мамлакат ялпи ички маҳсулотининг ўсиш суръати 7,8 фоизни, шунингдек, саноат маҳсулоти ишлаб чиқариш 7,2 фоиз, қурилиш ишлари ҳажми 15 фоиз ҳамда хизматлар кўрсатиш ҳажми ўсиши 12,4 фоизни ташкил этди.

Давлат бюджетидан ижтимоий соҳа ва аҳолини ижтимоий ҳимоя қилиш харажатларини молиялаштириш учун йўналтирилган маблағ жорий йилнинг 9 ойи давомида қарийб 17,5 миллиард сўмни ташкил қилди. Шундай қилиб ижтимоий соҳага ажратилган маблағ 2010 йилга нисбатан қарийб 3,1 баробарга ошмоқда.

Фракция аъзолари Давлат бюджетининг ­ижтимоий йў­нал­тир­ил­ган­лиги мамлакатимизда ижтимоий ҳимоя кафолатларини мус­таҳкамлашда, аҳолининг турмуш даражасини янада яхшилашда муҳим аҳамият касб этаётганини алоҳида таъкидлашди.

Йиғилишда, шунингдек, жаҳон бозорида сақланиб қолаётган беқарорлик шароитида, рақобатбардош маҳсулотлар ҳажми ва номенклатурасини ошириш юзасидан қабул қилинган чора-тадбирлар самараси ўлароқ товар ҳамда хизматлар экспортининг ўсиши таъминланганига алоҳида эътибор қаратилди. Маълумотларга кўра, аввал маҳсулот экспорт қилмаган 835 корхона экспорт фолиятига жалб этилиб, улар томонидан таш­қи бозорга янги 246 турдаги маҳсулот етказиб берилган.

Ҳисобот даврида Давлат бюджети даромадлари ялпи ички маҳсулотга нисбатан 21,7 фоизни, харажатлари эса 21,6 фоизни ташкил қилди.

Атрофлича таҳлил ҳам­да савол-жавоблардан кейин ЎзХДП фракцияси аъзолари Давлат бюджети ижроси юзасидан фикр-мулоҳазалари ва таклифларини билдиришди.

Турсунпўлат Норбоев, Олий Мажлис Қонунчилик палатаси депутати, Ўзбекистон ХДП фракцияси аъзоси:

— Фракциямиз Давлат бюджети ижросида ижтимоий соҳани янада ривожлантириш, аҳолининг даромадлари ва турмуш даражасини муттасил ошириб бориш масалалари доимий эътиборда бўлаётганини қайд этади.

Молия вазирлиги ҳузуридаги бюджетдан ташқари Пенсия жамғармасининг харажатлари 10 434,9 миллиард сўмни ташкил этиб, 3,1 миллион нафардан ортиқ фуқарога ҳар ойда пенсия, ижтимоий нафақа тўловлари ва ойлик талабномаларнинг ўз вақтида тўланиши таъминланган.

Бу борадаги ислоҳотлар Ўзбекистон Халқ демократик партиясининг дастурий мақсадларига ҳамоҳанг бўлиб, партиямиз электорати манфаатларини ҳимоя қилиш, Сайловолди дастуримизда белгиланган вазифалар рўёбга чиқишида муҳим ўрин тутади.

Зулайҳо Акрамова, Олий Мажлис Қонунчилик палатаси депутати, Ўзбекистон ХДП фракцияси аъзоси:

— Айтиш керакки, Давлат бюджети ижросида соғлиқни сақлаш соҳасини ўз вақтида ва самарали молиялаштириш масаласига жиддий эътибор қаратилган.

Аҳоли саломатлигини мустаҳкамлаш, оналар ва болалар соғ­лиғини муҳофаза қилиш, соғлом авлодни вояга етказиш масалалари Ўзбекис­тон Халқ демократик партияси дастурида белгиланган устувор вазифаларга мос келади. Шунинг учун фракциямиз тиббиёт соҳасини ривожлантиришга қаратилган саъй-ҳаракатларни қўллаб-қувватлайди.

Давлат бюджети ижросида таълим, соғлиқни сақлаш, аҳолини мақсадли ижтимоий қўллаб-қувватлаш, иш ҳақи, пенсия, стипендия ва нафақаларни ҳамда биринчи даражали тўловларни ўз вақтида молиялаштириш, бюджет маблағларининг ғазна ижросини таъминлаш ҳамда уларнинг самарадорлигини оширишга алоҳида эътибор берилгани эътироф этилди. Ушбу ҳолат Ўзбекистон ХДП электорати манфаатларига ҳамоҳанг экани таъкидланди.

Депутатлар, шу билан бирга, иш ҳақи, унга тенглаштирилган тўловлар ҳамда нафақаларни молиялаштириш ва тўлашда узилишлар кузатилаётгани, айрим ҳудудларда аҳоли томонидан пластик карточкалардаги маблағларни ишлатишда муаммолар юзага келаётганини қайд этишди. Ушбу масалалар юзасидан тегишли вазирлик ва идоралар вакилларининг ахборотлари тингланди.

Давлат бюджети ижросида мутасадди вазирлик ва идоралар, ҳокимликлар масъулия­тини ошириш, молиявий интизомга риоя этиш ҳамда бу борада назоратни янада кучайтириш бўйича фикр-мулоҳазалар билдирилди.

Йиғилиш якунида Ўзбекистон ХДП фракцияси Давлат бюджетининг 9 ойлик ижроси тўғрисидаги ҳисоботни қўл­лаб-қувватлаш ҳақида қарор қабул қилди.

 

Лазиза ШЕРОВА,

«Ўзбекистон овози» мухбири.


Фикр ва мулохазалар

Защита от автоматических сообщений

Сўнгги янгиликлар: