Охирги сонда



Кўп ўқилган мақолалар



Долзарб мавзу



Мақолалар архиви

«    Mart 2017   
Du Se Cho Pa Ju Sha Ya
27 28 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
24.11.2016

«САЙЛОВДА ШАХСАН ЎЗИМ ОВОЗ БЕРАМАН»

Шу кунларда мамлакатимизнинг ҳар бир ҳудудида муҳим ижтимоий-сиёсий воқеа — Президент сайловига қизғин тайёргарлик кўрилмоқда. Президентликка номзодлар ва уларнинг ишончли вакилларининг сайловчилар билан учрашувларида фуқароларда сиёсий-ҳуқуқий маданият юксалиб, мамлакат тақдирига дахлдорлик туйғуси кучайиб бораётгани яққол намоён бўлмоқда.

«Ўзбекистон Республикаси Президенти сайлови тўғрисида»ги қонунга асосан Президентни сайлаш фуқароларнинг ихтиёрий равишда яширин овоз бериши орқали амалга оширилади. Яъни қайси номзодга овоз бериш ҳақида сайловчиларнинг ўзи мустақил қарор қабул қилади.

Сайловчиларнинг фаоллиги ва масъулияти юрт раҳбарлигига муносиб номзод сайланишини ҳал этади.

Хўш, фуқаролар, айниқса, ёшлар сайлов ҳуқуқини амалга ошириш ва Президент сайловининг аҳамияти ҳақида қандай фикрда?

 

Ёқутхон МЎМИНОВА, ўқитувчи (Андижон вилояти):

— Сайлов демократиянинг энг муҳим белгиси, фуқаролар хоҳиш-иродаси ифодаланишининг мустаҳкам кафолатидир. Агар таққослаб кўрадиган бўлсак, одамларнинг бугунги дунёқараши билан бундан 10-15 йил олдинги тушунча ва тасаввури орасида ер билан осмонча фарқ бор. Ҳозир ҳамюртларимиз сайлов тизими ва тартибини, ўзининг сайлаш, сайланиш ҳуқуқини теран идрок этади.

Шуни айтиш керакки, ўз шахсий фикри, позициясига эга ҳар бир инсон сайловда, албатта, иштирок этади. Сайлов куни ўзим истаган номзодга эркин овоз беришим жамиятимизнинг тенг ҳуқуқли аъзоси, эканимни билдиради. Бу, албатта, зиммамизга катта масъулият юклайди.

Аввало, сайлов қонунчилиги бўйича чуқур билимга эга бўлишимиз, номзодларнинг сайловолди дастурлари билан атрофлича танишиб чиқишимиз, шундан кейингина муносиб деб билган номзодимизга овоз беришимиз лозим, деб ўйлайман.

 

Шерзод РАҲМОНОВ, «Ҳамро-Раҳмон» фермер хўжалиги раҳбари (Бухоро вилояти):

— Мамлакатнинг тараққиёти, жаҳон ҳамжамиятида тутадиган ўрни, миллий хавфсизлиги, фуқаролар ҳаёти эртага қандай бўлиши кўп жиҳатдан Президентга боғлиқ. Шу боис Президент сайлови аҳамиятини ҳар биримиз чуқур англашимиз керак.

Айниқса, ҳаёт шиддат билан ўзгариб, дунёда ижтимоий-иқтисодий муаммолар кескинлашиб, геосиёсий манфаатлар тўқнашуви кучайиб бораётган ҳозирги шароитда мамлакатда ким Президент бўлиши ўта муҳим аҳамиятга эга, деб ҳисоблайман.

Аҳолининг ижтимоий-сиёсий фаоллиги мамлакат тараққиётида муваффақиятни таъминловчи муҳим белги ҳисобланади. Сайлов куни фуқаролар билдирган ишонч ва истаклар янги муваффақиятлар, янги ютуқларга пойдевор бўлади. Бу мамлакатимизнинг дунё ва минтақадаги нуфузини янада юксалтириш, халқ­аро майдондаги позициясини мус­таҳкамлашга хизмат қилади.

Ўзини ҳурмат қилган одам сайловда шахсан қатнашади ва оиласи, яқинлари, Ватанимиз келажаги, равнақи учун овоз беради. Барча юртдошларимизни эртамизни белгиловчи сайловда масъулият билан фаоллик кўрсатишга чақираман.

 

Шоҳсанам НИШОНОВА, ЎзДЖТУ халқаро журналистика факультети талабаси:

— Бу йил сайловда иккинчи марта иштирок этаман. Лекин бу сафар ҳам кўнглимда ҳаяжон бор. Буни яширмайман. Чунки зиммамизда юртимизнинг эртаси, келажаги учун қайғурадиган, эл-юрт ташвишини ўз ташвиши, деб биладиган муносиб номзодга овоз бериш масъулияти турибди. Курсдошларим, тенгдошларим билан Президент сайловининг аҳамияти ҳақида фикр алмашиб турамиз. Президентликка номзодларнинг дастури, уларда илгари сурилаётган ғоя ва таклифлар ёшларни кўпроқ қизиқтирмоқда.

Тенгдошларимнинг ўз тақдирини мамлакат тақдири билан узвий боғлиқ билиши мени ҳам руҳлантиради. Менимча, бу ёшларимизнинг амалга оширилаётган ислоҳотларга бефарқ эмаслигини англатади.

Давлат ва жамият бошқарувида овозим билан иштирок этишим бу ҳаётда муносиб ўрним борлигидан далолат беради. Ватанимизнинг келгуси тараққиёти менинг овозимга ҳам боғлиқ эканини яхши англайман. Ўзини шу юрт фарзанди, деб билган тенгдошимларим қаторида мен ҳам, албатта, Президент сайловида муносиб номзодга овоз бераман.

 

Феруза АБДУРАҲМОНОВА, уй бекаси (Тошкент шаҳри):

— Мамлактимизда хотин-қизларга катта эътибор ва ғамхўрлик кўрсатилади. Буни опа-сингилларимизнинг турли соҳаларда эркаклар билан елкама-елка туриб фаолият юритаётгани, жамиятнинг тенг ҳуқуқли аъзоси сифатида ўз ўрни, фикри, мавқеи ва танловига эгалиги мисолида кўриш мумкин. Президент Сайлови билан боғлиқ жараёнларда ҳам бу яққол акс этади.

Уй юмушларидан бўш вақтимда Президентликка номзодларнинг дастурлари билан танишишга ҳаракат қиляпман. Сайлов участкасига бориб, у ерда яратилган шароитларни кўрдим ва билдимки, мен каби ёш болали оналар учун ҳам қулай имконият ҳозирланган. Шунча шароитларга энг муносиб жавоб сайловда фаол қатнашишимиз, деб ҳисоблайман.

Менинг танловим фарзандларимнинг манфаатлари, уларнинг келажаги учун хизмат қилиши керак. Президент сайловида шунинг учун овоз бераман.

 

Шукрулло ҚОДИРОВ, Ўзбекистон Миллий университети қошидаги С.Х.Сирожиддинов номли академик лицей ўқувчиси:

— Яқинда 18 ёшга тўлдим ва бу йил сайловда биринчи марта иштирок этаман. Албатта, ҳам масъулият, ҳам ҳаяжон ҳис қиляпман. Чунки орзуларимдан бири амалга ошди ва менда овоз бериш имкони юзага келди.

Ўйлайманки, тинч, фаровон мамлакатда Президент сайловида иштирок этишимнинг ўзи катта бахт. Яқинда бир янгилик, яъни бу йил брайль шрифтли сайлов бюллетенлари жорий қилингани ҳақида эшитдим. Шундан ҳам кўриниб турибдики, мамлакатимизда сайловлар демократик тамойиллар асосида ўтаказилади, ҳамма хоҳиш-иродасини эркин билдириши учун имконият яратилади.

Сайловда иштирок этиш нафақат ҳуқуқ, балки муқаддас бурчимиз, деб ҳисоблайман. Чунки биз ўз келажагимиз, Ватанимиз тараққиёти учун овоз берамиз.

 

Зилола УБАЙДУЛЛАЕВА,

ёзиб олди.

 


Фикр ва мулохазалар

Защита от автоматических сообщений

Сўнгги янгиликлар: