19.11.2016

МЕҲНАТ МУҲОФАЗАСИ ТИЗИМИ ТАКОМИЛЛАШМОҚДА

Ҳар бир шахс меҳнат қилиш, эркин касб танлаш, адолатли меҳнат шароитларида ишлаш ва қонунда кўрсатилган тартибда ишсизликдан ҳимояланиш ҳу­қуқига эгадир.

Ўзбекистон Республикасининг

Конституцияси, 37-моддасидан.

 

Жорий йилнинг 22 сентябрида имзоланган янги таҳрирдаги «Меҳнатни муҳофаза қилиш тўғрисида»ги қонун меҳнатни муҳофаза қилиш тизимини янада такомиллаштиришга хизмат қилади. Мазкур ҳуқуқий хужжат 2016 йилнинг декабрь ойидан кучга киради.

Ўзбекистон Республикаси Олий Мажлиси Қонунчилик палатасининг Меҳнат ва ижтимоий масалалар қўмитаси томонидан қонуннинг мазмун-моҳиятини кенг тарғиб этиш масалаларига бағишланган тадбир ташкил этилди. Унда Меҳнат вазирлиги, Ўзбекистон Касаба уюшмалари федерацияси кенгаши, турли идоралар вакиллари иштирок этди.

Олий Мажлис Қонунчилик палатасининг Меҳнат ва ижтимоий масалалар қўмитаси раиси Ё.Умаров ва бошқалар мамлакатимизда аҳоли фаровонлигини юксалтириш, фуқароларнинг меҳнат ҳуқуқларини таъминлаш учун зарур шарт-шароит яратиш борасида амалга оширилаётган кенг кўламли ислоҳотлар улкан натижалар бераётганини таъкидлади.

Янги таҳрирдаги «Меҳнатни муҳофаза қилиш тўғрисида»ги қонунда ходимларнинг ҳаёти ва соғлиғи устуворлигини таъминлаш, меҳнатни муҳофаза этиш соҳасидаги давлат дастурларини ишлаб чиқиш ва амалга ошириш, давлат ва хўжалик бошқаруви органлари ҳамда маҳаллий давлат ҳокимияти органларининг шу соҳадаги фаолиятини мувофиқлаштиришга доир қатор вазифалар белгиланган.

Мазкур ҳуқуқий ҳужжат соҳадаги муносабатларни тартибга солиш, инсоннинг меҳнат жараёнидаги хавф­сизлиги, сиҳат-саломатлигини таъминлаш борасидаги чора-тадбирларни рўёбга чиқаришда муҳим аҳамиятга эга эканлиги қайд этилди.

Ушбу қонунга мувофиқ энди ташкилотларда меҳнатни муҳофаза қилиш хизматлари ташкил этилади. Бундан кўзланган мақсад меҳнатни муҳофаза қилиш талабларига риоя этилишини таъминлаш, уларнинг бажарилиши устидан назоратни амалга оширишдан иборат. Элликта ва ундан ортиқ транспорт воситаси мавжуд бўлган ташкилотларда йўл ҳаракати хавфсизлиги хизмати ташкил этилади ёки йўл ҳаракати хавфсизлиги бўйича мутахассис лавозими жорий қилинади.

— Янги таҳрирдаги «Меҳнатни муҳофаза қилиш тўғрисида»ги қонун фаолиятимизни янада самарали ташкил этишда мустаҳкам ҳуқуқий асос бўлиши шубҳасиз, — дейди Ўзбекистон Касаба уюшмалари федерацияси кенгаши бўлим мудири Нодира Каримова. — Ушбу қонунда ходимлар вакили ҳисобланган касаба уюшмалари ваколатларини янада кучайтириш белгиланган.

Тадбирда соҳага оид қонунчиликни янада такомиллаштириш, ҳуқуқий ҳужжатлар ижросини таъминлашда давлат ва нодавлат ташкилотлари олдидаги устувор вазифалар хусусида фикр-мулоҳазалар билдирилди.

 

Г.САТТОРОВА,
ЎзА мухбири.



DB query error.
Please try later.